詩詩前往筏子溪門戶迎賓水岸廊道搭車時瞓咗,回程返到酒店都仲一直瞓瞓瞓,我哋當然等佢瞓醒先再出動去食午餐啦,何況時間尚早呢~
覺覺豬詩~
返到酒店,我提議上去9/F既休息室度睇睇,book酒店時見到好多人comment都大讚呢個空間~
原來Hotel 7逢甲既9/F有一個休息室,有少少健身設施、氣墊球、足球機,最重要係有免費飲品無限供應,仲有個陽台可以出去坐下傾下計,如果天氣涼涼地一定好舒服~除咗有冷熱飲品之外,我仲發現雪櫃入面有雪條呀﹗﹗不過係迷你雪條,每包好似打嗰啲麻雀咁大咋,因為就快食飯,我哋只係share咗一舊小雪條同埋飲咗冰水~我抱住詩詩繼續瞓覺,day同曉就玩下啲設施~
曉好鍾意呢度有無限供應既冰水~平時屋企嘛,雪幾多先有得飲幾多,又要等,嘩,呢度話有就有,正﹗
兩父女都愛氣墊球﹗曉而家夠高自己玩啦,不過唔太夠力水~
曉唔玩得跑步機,但就係咁push爸爸玩俾佢睇~
午餐前仲有少少時間,我哋再返房休息,day一見到張床就要瞓一陣,詩詩都醒埋,我哋三母女就玩下貼紙咁~
原來爸爸都有份(被)玩喎~
好,出去搵食﹗酒店樓下其實都好多食肆,我哋揀咗呢間「石研室」石頭火鍋,睇落坐得好舒服咁,我search下有冇網站,先發現原來係全台灣都有分店既連鎖店呢~
石研室
呢度係一人一鍋既格局,我哋2大2小叫咗兩個鍋,一款牛肉一款雞肉,另外再加多少少餸,食得非常滿足~個牛肉鍋好特別,職員會幫你加洋葱先爆炒啲牛肉少少,爆香咗夾番上嚟先再放湯,係幾好味喎~另外追加既有一份鯛魚、一份蛤蜊,曉見到鯛魚以為係魚生,好興奮,唔係架,今次要煮熟先食得架~兩個小朋友嘛,曉向來食嘢除咗慢之外都算好合作既,詩既話有烏冬,有菇就冇問題啦~今次比較特別既係,蔬菜籃入面有舊麻糬,因為係凍既,我就食到最後時照放入鍋啦,原來好似湯丸咁做甜品~另外,有無限飲品,小朋友就最開心喇~
食完嘢返嚟,影下酒店個招牌~
食飽飽當然係盡快返去同曉午睡啦,詩分明未瞓覺住,但開頭唔肯同爸爸出去行街,後尾爸爸同佢玩匿埋,玩到興起就肯兩父女去拍拖了~我都估唔到我會同曉一齊瞓著,不省人事…
呢個時候爸爸原來同詩詩出去遊蕩,佢話逢甲商圈日間好靜,好多鋪頭都唔開,佢哋去咗逢甲大學,話有啲新生O camp之類喎,兩父女係大學入面行下樓梯,影下相咁,睇啲相幾溫馨丫~
去大學既好處,當然係好多空地可以任意走動啦~
仲有好多樓梯可以行~
仲有親親大自然~
婆婆知道我哋會去逢甲夜市,問我哋有冇去逢甲大學行下,答案係有同埋冇,爸詩組有去,曉媽組冇去呀,所以我都介紹唔到佢哋睇咗咩~
呢個係咩碑文呢?
詩詩都唔知自己影咩景點,爸而家都可能唔記得咗lu~
影乜都好,總之可愛啦~
其實呢個動作/指令,就叫做「可愛」,得閒我做埋「鬼臉」、「心心」、「花花」你哋睇啦~
好青春既大學生~
佢哋旅程既結尾就係買嘢飲返嚟大家飲喇~
day買過兩次凍朱古力俾小朋友,但都唔太受歡迎,後來終於搵到原因啦,原來爸爸以自己既心情幫佢哋叫咗少甜,哈哈,小朋友要飲嘢最重要就係夠甜,難怪冇銷路啦~
瞓醒晏覺,就到今晚另一個重頭節目—-高美濕地啦~
Hotel 7 逢甲
https://www.hotelse7en.com/tw/index.html
石研室石頭火鍋網站:
https://sys-hotpot.weebly.com/
待續
前往其他台灣旅遊blog