其實向來都好鍾意去睇話劇、舞台劇嗰類演出，但有小朋友之後真係去得少之又少，主要係演出唔歡迎太細既小觀眾，怕會騷擾演出，連好多合家歡既節目都要三歲以上，好不容易曉夠三歲，又有個詩出咗嚟，我又唔想掉低邊個去睇喎，所以呢類活動就減少咗好多~之前去過一次香港小交響樂團既<Classics for Kids>覺得好正，2018年頭又搞一次<Classics for Babies>我就專登安排帶兩隻嘢去睇，點知指揮講嘢講得太多，又講英文，小朋友們都聽得唔耐煩，曉少有地想提早離場，搞到我都有啲失望~今次經過屯門大會堂，貼咗呢個普劇場既<點點光>大poster，咦，係for bb既節目喎，不如去試下啦~我有諗過我同詩兩個去睇or我同day同詩三個人去睇or四個人一齊去睇呢幾個options，原來只招呼1.5歲以下既bb同佢哋既家長，咁曉即是唔去得了，只放低曉又慘慘，算啦，留爸爸陪佢啦~結果爸爸臨時去美國出差，唔該晒婆婆幫手照顧曉~
<點點光>係屯門大會堂文娛廳舉行，每場只招呼50人，一人一票，bb半價，果然去到真係大部份小觀眾係手抱嬰兒，識行既可能佔1/3左右，詩應該係識行既bb之中最初階嗰個~入場先放低個人物品係坐位，跟住就可以除鞋，圍住圓形既表演區坐低~開場前先有工作人員講解少少安全守則，原來bb可以隨意爬入去演出範圍度玩，不過行得太快既bb家長要適當地捉住，而想接近佈景同大提琴手既bb亦要捉住~
溫柔又單純既大提琴音樂響起之後，兩個演員就走出嚟了，演員係兩個可愛既女孩子，穿著感覺柔軟、顏色柔和、望落去舒適既工人褲裝，佢哋講既對白係模仿bb話既聲音，「呀~噢~哇~」嗰啲，應該令bb們好有共鳴同舒服吧﹗我諗演出可以分為三部份，第一部份既道具係柔軟既被子，第二部份係色彩繽紛既波波同好似水母既流蘇大圈圈，第三部份係燈光點題，演員會跟音樂舞動啲道具，近距離接觸小觀眾，俾佢哋直接觸摸、感受~
我哋睇既係下午2:45既場次，詩小觀眾午飯後要瞓一瞓覺，其實搣埋飛入埋場佢都未醒，我就輕輕放佢出嚟揹帶，佢慢慢醒咗見到周圍環境咁吸引，即使未瞓夠都冇大喊~雖然開頭係比平時黐身少少，但10分鐘後都可以稍稍離開我進入演區範圍活動，不過佢都好小心，唔會離開我超過2米以外，出去一陣又會擰番轉頭搵下我~詩都有啲緊張，唔係好敢摸啲道具，但就好專心睇演出，可能係新既體驗吧，表情有少少繃緊~觀察到佢最鍾意大提琴，成日走過去大提琴嗰邊，坐低睇時又會跟住節奏搖擺身體，你大個學唔學大提琴呀？
我覺得整演出好有心，亦好豐富，內容真係為bb度身訂造，推介﹗大人們睇住佢哋小寶貝既反應亦充滿娛樂性，每一個人仔都係獨一無二既呢~
演出期間唔可以影相，但結束後就可以同道具同埋演員影相，大會真係了解爸爸媽媽既需要~不過我哋趕住返去搵曉，影咗少少就走啦~
今次帶咗詩去睇節目，我買咗飛啦，下次帶曉去睇音樂劇，希望兩個小朋友都可以享受音樂藝術既樂趣，接觸多方面既啟發下成長~
普劇場網站：