今個trip真係好難得，除咗我哋嘅一家八口固定班底之外(爹媽、楊氏三口、邱氏三口)，特別有曉曉嘅兩位太婆－－我嘅嫲嫲同婆婆，加埋冰姑姐同埋菊姨，一行十二人一齊嚟呢個兩日一夜香港迪士尼之旅～其實我已經期待咗呢個日子好耐啦，不過估唔到事情未如我預期之中發展得順利⋯
出發嘅早上曉曉，摸落手掌心有少少熱熱地，我叫day摸下，day又好氣又好笑咁叫我，摸咩啫，探下熱啦，唉，我唔想面對現實先叫你摸下之嘛～37.9、再探38.0，僅僅有啲啲咁多燒，仲有少少清鼻水，去唔去呢？去唔去呢？因為早前有講過呢個weekend可能會打風，所以都一早問定改期、取消等事，爹爹話酒店房冇得改，門票就可以延遲用，如果萬一天氣唔好都可以照住酒店嘅～咁又係，我哋day 2先至入園，day 1都係住下酒店食下嘢啫，除咗熱熱地之外，曉都好鮮蹦活跳，咁都照去先啦～瞓醒個中午覺，藥都冇食過，直情連熱都已經退埋，午飯嘅胃口係差少少，但都又多嘢講又貪玩，我哋出發去也～
出發lu～
舊年曉第一次嚟迪士尼時，搭港鐵迪士尼綫嘅時候佢瞓著咗，今次大多一歲又醒目多咗，識得欣賞，「好得意呀～」btw，未試過搭迪一尼綫咁少人﹗因為平時嚟親都係早上吧，嗰嗰趕住早啲入園玩～
搭小巴出青衣+東涌綫+迪士尼綫港鐵+園區shuttle，好快就去到我哋今晚入住嘅迪士尼探索家度假酒店啦～曉瞓得晏咗啲，我哋比起大家約定嘅時間遲咗少少去到，三點幾四點嘅時間，哇，超多人排隊check in﹗﹗﹗辛苦爹爹同家姐為大家排隊謀幸福了～等候嘅時間，曉曉超鍾意酒店大堂嘅厚地氈，不停當係床咁撲上去瞓係度，要不停叫佢起番身，唔係真係會俾人踩扁～終於搞掂﹗大家可以上房換衫，跟住就開始第一個活動－－游水啦～
我哋嘅房間就係lobby位置嘅3/F，所以行過去都好方便，曉曉不嬲都好鍾意酒店嘅長走廊，一行到走廊就甩開我隻手，「我哋豹咁快丫～」，一齊跑跑跑佢就好高興了～
雖然只係九月中，但酒店房已經有少少Halloween佈置了，門口有個貼紙⋯
浴室裝住梳洗用具嘅鐵盒都係Halloween主題，可以當紀念品免費帶走～哇，洗頭水沐浴露係米奇頭嚟㗎，好可愛～
床頭燈掛咗隻毛巾做嘅鬼鬼，我話半夜起身見到咪好驚，day就話咁可愛點會驚呀，咁又係，佢嘅設計係cute多過想嚇你～
如果你問曉曉酒店係點嘅，佢就會話「張床好大～」，今次真係好大呀(雖然冇啱啱去完高雄嗰間酒店張床咁大)，因為有兩張雙人床﹗其中一張裝咗小童床欄，咁就即是預定咗係曉(同埋我)嘅床喇，另一張就係爸爸(同埋我)嘅床喇，冇錯，我向來都係無主孤魂^^”、居無定所⋯
舒服嘅房間～
今次訂房時特別標明為兩位老人家慶祝生日，所以五間房之中其中兩間入面有surprise毛巾生日蛋糕﹗
我就未有機會見過佢嘅真身，但睇相都覺得好靚呀～兩位老人家仲有生日襟章添，戴住嚟入園區玩時應該會接受到好多生日祝福吧～
其實有兩張雙人床咁多，係因為佢預咗四個人瞓呢間房，毛巾有四set，浴袍同拖鞋都係x4，不過都係預咗for帶小朋友嘅家庭，憑物件嘅size就知道～
等我搵下需要嘅物品先～
無論係浴袍定拖鞋都有分男裝、女裝、小童，非常貼心～
好啦好啦，我哋換泳衣出發啦～雖然早上曉有少少唔舒服，但佢成個下晝一直冇再發燒，又好精神同平時一樣，佢仲講咗好多次好想游水，見到狀況咁好都照俾佢游啦～
曉雖然有小朋友size浴袍，但都有少少oversize，唔唔，我會評價佢都係啱著嘅，第一、始終袍腳冇拖地，第二、佢一路著住嚟行路都冇kick跌丫～見到佢呢個look我就諗起上次去北海道嘅溫泉著浴衣，著到成個佬仔咁(請參閱：30-8-2016：北海道三人行day 3(part 3)．心のリゾート 海の別邸之食好啲、住好啲、開心啲)～
好不容易著住超大浴袍行到落去探索家酒店嘅游泳池，晴天霹靂﹗﹗泳池居然close咗？﹗今日太陽好好喎～聽其他酒店住客講，話啱啱有人係泳池嘔咗，要關門清潔，大概要一個半鐘至兩個鐘先可以重新開番呀，曉曉真係好失望呢，原本同佢講只要天氣好+冇發燒冇病就可以游水，點會諗到有其他突發事件㗎～我哋本來想打電話叫佢哋其他人唔好落嚟喇，打緊電話又未打到嘅時候，大家都同時出現晒了～家姐果然好可靠，佢提議我哋去其他酒店嘅游泳池﹗於是我哋就一行十二人，浩浩蕩蕩咁(著住浴袍+酒店拖鞋+拎住小朋友水泡)搭shuttle出發去迪士尼好萊塢酒店游水喇﹗﹗
待續
前往其他迪士尼之旅blog