即使家姐同恒仔去過澳門好多次，佢哋依然繼續發掘未去過嘅新景點，今次就搵到龍爪角海岸徑，睇網頁介紹風景好似好靚咁呀～我哋由酒店搭的士過去海岸徑入口，分兩架的士，聽爹哋佢哋講個的士司機好似唔係好想載到咁遠咁，之後仲收咗附加費用(有欺騙之嫌？﹗)，我哋嗰個司機就話，你哋帶住咁細個小朋友去好危險喎，係啲人去釣魚嘅地方嚟㗎喎咁～我哋上網睇時啲路都好似修得幾靚丫，咁就笑住回答佢我哋知道㗎啦之類～
預備出發﹗
家姐話佢哋有一次住過呢間酒店，酒店係好大好舒服，不過離市區太遠，只能夠留係附近活動～
雖然本身都有打算俾曉自己行得幾多得幾多，話晒佢都有行山經驗(18m時去過行城門水塘﹗請參閱：10-10-2016：重陽登少少高之曉曉第一次行山＠城門水塘)，但我哋落的士之前，佢就咁挨住我旁邊都瞓著咗，咁冇辦法了，要一直抱住瞓了～換轉今時今日28m嘅曉，我哋已經唔再用揹帶，我又大住個肚唔適宜抱咁耐，得爸爸一個抱又攰死佢，恐怕就要暫時退出行程了～
睇呢個招牌，呢條海岸徑都有相當歷史～
成條龍爪角海岸徑沿住海邊岩石建成，所以每一段都係無敵大海景，即是零樹蔭﹗﹗今日又熱又曬，未出發前家姐先幫逸逸除咗條褲，等佢露出兩條脾可以好好散下熱～曉就冇辦法啦，唯有我少有地堅持幫佢擔遮啦，平時我都唔太care曬住太陽，但真係熱得太交關～
有各種奇怪大石頭～
day自拍都要皺住眉頭～
沿途風景都好靚呀，不過我自己就冇乜手影相﹗路其實修得算幾好，不過又高又低又上又落又大級，其實曉即使唔瞓覺都唔係好行到，俾佢行都會勁慢大人又會勁攰～
熱～
影咩？見唔見到家姐、恒仔同埋逸逸bb呀？
沿途風景
上落路段都唔少
要好專心咁行，特別係抱住個重b～
行行下時間有啲晏，但路又好似越嚟越難行，究竟我哋要繼續向前去定係行回頭路呢？我哋問過前面嚟嘅人，出口嗰邊離黑沙海灘有啲遠，我哋決定沿路返轉頭，返到黑沙海灘就去食嘢啦～睇番嗰陣啲相，原來我都真係好捱得喎，揹住曉咁耐可以行咁多路⋯今次嘅結論係－－曉曉又係冇參觀過龍爪角海岸徑嘅﹗
今次去黑沙海灘，主要去食家姐佢哋推薦嘅豬扒包同埋燒烤食物，一人一個豬扒包，再加烤牛仔骨、魷魚、雞翼等等，可能當時食得太論盡，居然冇人影到相？﹗我手頭上有家姐、day同我自己嘅相，一張食嘢嘅相都冇，問爹哋都話佢冇影～都明嘅，當時坐係小攤子旁邊嘅摺枱，抱住b嘅有優待可以坐有靠背嘅櫈，但都有啲辛苦，雖然有太陽傘，但都係啱啱好夠遮住大家，食嘢又要用手，所以冇手影相乎？曉啱啱瞓醒覺，身處不知名嘅地方，又曬又熱，都冇乜胃口，食得唔係好積極～
食飽飽去沙灘行一陣，影下相～
yeah～
加埋爸爸﹗
我諗我有十幾年冇去過黑沙海灘，點解我印象中嘅黑沙海灘啲沙好似再黑啲嘅？原來行到出去，濕咗嘅沙好似真係黑啲﹗
行下沙灘望下海～
呢個時候嘅曉都未識享受玩沙嘅樂趣呢～
一來冇時間，二來冇工具，三來太曬太熱，我哋都冇坐低慢慢玩沙了，行咗一陣就搭車出番市區啦～其實都巴不得快啲上去㗎有冷氣嘅巴士～上車可以休息一下，yeah～
黑沙龍爪角海岸徑官方網站：
https://nature.iacm.gov.mo/c/trails/detail.aspx?id=82371313-3f09-4339-8869-92e61490da03
前往其他中國旅遊blog