未出發之前，家姐已經同我講過，一定要叫美姨帶你去食蟹米粉，真係好味到不得了，蟹蚶啲肉厚到好似食雞脾咁～我都冇出過聲，美姨同我哋商量行程時已經加入咗食蟹呢個重點項目﹗
去完動物園美姨六點幾鐘接番我哋，佢打個電話之後，就話我哋知今晚可以去食蟹了～原來間鋪頭客人非常多，先訂枱會比較好，不過佢同美姨丈同個老闆係friend底，所以可以幫我哋留枱～佢哋嘅緣份原來係當年美姨丈帶北海道團時蟹老闆有參加，講起北海道嘅蟹，蟹老闆對自己嘅蟹更自豪，叫美姨丈返到去新加坡一定要去試下～今次食過，結論就係－－必食﹗
呢間Mellben螃蟹王位於住宅區嘅地鋪，幾間鋪連埋都係螃蟹王嘅王國，感覺有啲似較企理嘅大排檔，都係熱熱鬧鬧、燈火通明，雖然冇冷氣但晚上嘅新加坡尚算涼快，食住熱騰騰嘅蟹都唔覺得熱，而比起一般大排檔嘅好嘅係有乾淨廁所同埋bb椅，出面嘅停車場停車又好平，不過位就唔多，公共交通可能有啲難，要好好search下點搭車，但幾個人夾的士嚟都應該ok嘅～
等食期間開心自拍～
美姨請我哋食兩隻大蟹，一隻係傳說中嘅蟹米粉，一隻係個汁食到lam lam脷嘅奶油蟹，原來老闆起家嘅就係個蟹米粉，即使今日做到盤滿缽滿，請咗好多經驗老到嘅師傅去煮其他菜色，個蟹米粉嘅湯底依然唔假手於人～
非常厚肉又鮮甜嘅強勁蟹肉，奶油汁好香﹗食到人笑咪咪、喜孜孜～
蟹米粉可揀粗米線或幼米粉，我哋兩樣都點咗，但食唔晒要打包了～
果然名不虛傳(家姐嘅描述)，啲蟹果然非常厚肉，北海道嘅長腳蟹果然冇得比較，而且味道都好鮮甜，奶油汁香濃，配炸饅頭剛好，而蟹米粉嘅湯汁充滿蟹嘅鮮味又唔會太膩太鹹，米粉吸收晒湯嘅甜味，即使好飽都仲可以再食得落，兩款都好好味～
另外，兩個青菜都好味，美姨點咗一款當地特產嘅青菜，哎吔，我唔記得寫低個名而家已經唔記得了，另外一款係炒蘆荀，蟹未嚟到時，曉兩碟都密密食呀～
其實今次食蟹我就好盡興，但day都係有啲心理負擔的，佢食蟹肉ok，但蟹膏就有機會敏感，上次去韓國食醬油蟹就真係出咗一兩粒風爛(請參閱：25-5-2013：釜山麗水day 1(part 2)．豐盛蟹醬、麗水世博之特殊美術館)，而家睇番blog先知原來嗰次冇記錄到結果，佢係有出風爛的，不過數量唔多唔算嚴重，好似食粒Piriton就好快冇事～北海道嗰次就戰戰兢兢，肉同膏分得好清，完全「滴膏不沾」，結果安全(請參閱：28-8-2016：北海道三人行day 1(part 3)．手信街薄野狸小路、蟹將軍全蟹宴)﹗今次嘅蟹雖然係肉蟹，但個蓋都有少量膏，而蟹米粉嘅湯就肯定有膏入咗去，day都唔敢食太多，美姨就額外叫多兩個小菜了，我就顧住jap jap jap啲超美味嘅蟹，都冇乜點食過嗰兩個小菜添～
除咗美味嘅蟹之外，飲品更加係我同曉都好喜歡嘅椰青，實在太perfect了﹗多謝美姨～多謝美姨婆～
因為要通知表哥我哋嘅位置，所以影低咗餐牌背面餐廳嘅地址，大家有興趣可以參考下～
曉同day食飽咗，我仲好努力咁剥緊蟹嚟食，個小朋友開始唔耐煩，就由爸爸帶佢出去兜個圈又影下相啦～
今晚原先打算約day嘅Joseph表哥，不過表哥因搬屋嘅事要晏啲先free，所以冇同我哋晚飯，佢之後一個星期又要出差，只有今晚可以聚聚，所以食飽飽之後我哋去咗佢屋企附近嘅Starbucks傾下計～
雖然同day結咗婚五年幾，但移民新加坡嘅Joseph表哥我都係第一次見，5歲嘅仔仔對於曉曉又害羞又好奇呢，曉曉就好鍾意表伯嘅見面禮－－熊仔餅，成晚都攬到實，而原本已經好眼瞓嘅曉飲完果汁之後又醒神晒，臨到尾仲同表哥一齊唱ABC添呢～
超攰超充實嘅day 2結束，返到酒店我哋全部都極速倒下啦，好在曉都乖乖沖涼冇扭計～
待續
前往其他新加坡旅遊blog