我哋行程基本上都好隨意，既然出到George Town，都想逛逛街，睇下呢度啲商場係點，本地人嘅生活又係點～我哋就向旅遊書入面有介紹嘅大商場步行進發吧～

入到呢間手信店，我哋好似係運吉冇幫襯的，但就扮cute影下相，順便幫人宣傳下啦～旅程後四個月打blog，呢一刻嘅感想，就只有⋯曉真係大個咗好多﹗頭髮長咗，長高好多，冇咁圓碌碌，最重要係，而家識得溝通同表達自己，曉話，我唔係B啦，我係小人仔﹗旅行嘅呢個時候得九個幾月大，仲係任人擺佈嘅小B呢～

天氣好好，天好藍，影相好靚⋯但真係好好好好好熱熱熱熱熱熱﹗熱到dur晒，熱到冇心機，唯有偷史官嘅相嚟裝飾下自己個blog啦～

九個幾月大嘅曉識嘅詞匯五隻手指數得晒，我記得佢指住啲燈籠話係波波﹗都啱啱地嘅，同波波一樣係圓圓地～

途經玩具店，好懷舊呀﹗入面啲貨品好似我哋細個時八十年代嗰啲咁呢～

熱熱熱﹗幾時去到？

其實搵路時唔係幾順利，可能因為熱得滯同有啲累吧，仲揹住差唔多20磅嘅曉，腦筋唔係好靈，加上冇prep過呢個trip嘅任何資料，我都只可以做一隻乖乖嘅羊咩咩跟住大隊行～

入咗商場，貨品雖然唔算吸引，但有個B同行經歷都唔同啲，曉曉伸出友誼之手，第一次國際性嘅交流丫﹗「Hi~」

終於搵到supermarket，入去行之前唔理啦，點都要坐下休息下恢復元氣先﹗我哋後來都要多謝有呢張長櫈呢，逛逛下supermarket曉有啲臭臭地，周圍都冇育嬰室嘅檳城，好在有呢張長櫈可以緊急換片，換好再入去血拼(其實都只係買少少嘢:p)～

曉曉第一次坐超級市場車仔丫﹗不過好似唔太enjoy，有少少驚咁，直到今時今日13個月大，佢都係prefer做貼身膏藥呢﹗係度冇乜大收獲，最記得係買咗提子，有見尋晚嘅第一餐晚餐曉食完自己嘅樽裝baby food之後唔夠飽要啜啜媽媽奶，都係作定兩手準備好啲﹗遲咗飯餐時間？唔驚﹗有提子﹗食完唔夠飽？唔驚﹗有提子﹗

買完嘢我哋就搵的士返酒店了，接住落嚟係我今個trip其中一樣最期待嘅活動丫，就係曉曉下水禮了～大家繼續收看我個blog丫～

待續

前往其他馬來西亞旅遊blog

Comments

comments