返part-time呢段時間，陪伴我度過空閒時間嘅，其中一樣就係去圖書館借書睇﹗﹗交咁多稅，睇多一半又感覺抵啲，而家有電郵功能提示還書，又有手機apps可以簡單續借，少咗好多遲還書嘅情況啦～好抵﹗睇得最多嘅都係我最愛嘅小說，雖然話要胎教，但我都睇咗唔少東野圭吾嘅小說～不過呢，都有借下書預備下做媽媽嘅～
今次係育兒類嗰度借咗兩本，一本係日本人出嘅講母乳餵哺，嗰本我冇睇完就還咗了，感覺上不太科學，又不太符合香港嘅情況，都係睇番啲香港媽媽嘅母乳書好啲～另一本就係呢本大廚Jamie Oliver太太Jools Oliver出嘅育兒書﹗﹗呢本都好有趣呀，由頭睇到尾～
睇到封面都知道本書有番咁上下時日，Jamie Oliver嗰陣都仲好細個，又未發福～本書講嘅係佢哋結婚後嚐試想生小朋友，以至第二個小朋友出世後嘅情形～後來wiki番佢哋一家，先知道原來至今時今日佢哋總共有四個小朋友啦，而書入面嘅大女二女而家都十幾歲lu～Jools真係好鍾意好鍾意小朋友﹗﹗不過佢哋初初結婚時想有B都唔容易呢，好勤力，勤力到出trip帶定排卵棒，要考慮到要唔要轉機時搵個地方製造BB﹗﹗後來仲要食排卵藥至生到大女Poppy呢～
Jools懷孕嘅過程，擔心緊張嘅事情，都同好多太太們好相似呢，不過我諗佢應該係反應比較誇張，又真情流露嗰種，所以有時都會覺得over咗～睇到嘅係Jamie Oliver好錫佢太太，好遷就佢～
英國嘅產科政策同我哋好唔同，國家提供好多免費嘅產前課程俾準爸媽，而「同班同學」亦會成為好朋友，成為peer support group，咁都幾好～另外，我哋生完之後會帶BB去健康院檢查覆診，而佢哋就會有姑娘上門探訪，可能地方太大吧～而坐月方面就更更更加唔同了，佢哋夫婦係女兒day 5就帶佢出去market﹗陪月當然冇啦，所以老公應該會放長啲嘅假幫手吧，佢有大廚老公，唔怕冇好嘢食啦～至於嬰兒食物方面，中國人講究食物要新鮮，原來佢哋會一次過煮好多糊仔，然後放入冰格冰起佢，例如紅蘿蔔cube或者菠菜cube，分開幾次嚟解凍翻熱，如果衛生同營養都ok嘅話又真係方便好多嘅～
第一個小朋友咁難先有，估唔到佢哋二女Daisy係大女13個月大時就出世了，Poppy都仲未識行呢～呢個媽媽真係辛苦咯，陀住B湊個小B，之後又要帶住個大少少嘅B嚟湊個小B，原來後來仲要生多兩個添～
睇到Jools同Oliver嘅故事，又了解下英國嗰邊嘅文化，又睇到佢哋一家嘅小趣事，都幾有趣呢～各位準爸媽新爸媽都可以借嚟睇下﹗
Jamie Oliver嘅wikipedia：
http://en.wikipedia.org/wiki/Jamie_Oliver
前往其他懷孕扎記blog