由Diamond Head搭番巴士出嚟,我哋兩個都呼呼大睡,坐坐坐巴士坐到總站Ala Moana Center,係車程上好好充一下電先~
Ala Moana Center係酒店、shopping mall、交通樞紐集於一身,我哋今日嚟逛逛街,順道我想去下威基基海灘嘅另一邊--Ala Moana Center對出啲Ala Moana Beach Park,呢邊嘅沙灘連接住大草地,似乎又係另一番光景呢~
Ala Moana Center個shopping mall都幾大,有成三四層,而且好闊好大好多商店,由名店到平民化嘅都有,我都有少少收獲啦,係Victoria’s Secret買咗條連身裙,返到去著上身好滿意丫﹗但叫我最驚訝嘅係,呢度連接咗一個日本商場--你嘅感覺係100%去咗日本﹗﹗入面嘅店員啦、顧客啦、賣嘅商品啦、廣播啦⋯全部都係日本﹗﹗最吸引我嘅係賣熟食嗰層,有好精美嘅便當,好想食丫~~~~即使係香港都食唔到咁日式嘅日式便當,我已經餓咗去日本好多年嘛,好想食~最終嘅決定係,我哋消磨時間到晚飯時間就再返嚟買便當啦~好呀﹗
去書店睇下書啦﹗我好似好悠閒咁係度睇書⋯但幾分鐘後好似俾人趕咗起身~咩喎,我明明見到有第二啲鬼坐係地下我至跟住坐之嘛~
之後行出去海邊,去一下Ala Moana Beach Park,原來嗰度有遊艇會呢~
似乎「呢邊」嘅威基基同「嗰邊」最唔同嘅係,呢度有多啲本地人,佢哋帶晒帳篷、露營椅、燒烤用品嚟enjoy一整個下午,我都好羨慕呢啲family gathering呢,係香港的話就要遠離市區同埋都冇咁寛闊嘅環境了~
沙灘都冇嗰邊咁多遊客,感覺都係多啲本地人,話晒beach park有好多停車位,本地人應該方便啲吧,至於嗰邊就臨近酒店群,本地人又費事同遊客們逼啫~
時間咁上下,我哋返去「日本」買晚餐~其實可以有位坐係度食,但係商場食的話,不如⋯
非常豐富嘅日式便當﹗﹗:D我就揀咗銀鱈魚炸雞便當,day就揀咗炸鯡魚便當,仲有各式醃漬小菜呢,我嚟仲買咗多個苦瓜醃菜同埋蜜瓜哈蜜瓜做甜品,非常好~伴住海風、伴住美景,仲唔係完美嘅外賣晚餐?
Ala Moana Center嘅網頁:
http://www.alamoanacenter.com/
待續
前往其他美國旅遊blog
係書局,可能D鬼都有俾人趕,只係你睇唔到者~
梗係買外賣番去酒店食正喇,無敵大海景~
可能有嘅~
係呀,海景好正,日式便當都好正﹗知唔知香港邊度有得食?
在荃灣一田買過類似的便當~~
哦~係呀?不過荃灣間一田係邊度?^^”
屯門間一田冇添~
荃灣廣場啊~
初時被他們的南瓜飯、紅豆飯吸引,後來發現有一份份便當賣~都好精美的~
搵次要試下﹗