馬上就到晚餐時間了，全個Polynesian Cultural Centre有好多間餐廳，但似乎都係serve相同嘅自助餐，我哋一早門票上安排嘅嗰間餐廳嘛，同隔離嗰間只有少少盆栽做間隔，見到嗰邊都係相同嘅食物～

我哋被安排坐長枱嘅中間，旁邊有啲大大size嘅美國遊客(我估咋)，好啦，出去拎嘢食～雖然食物嘅counter好長，其實係不停repeat的，選擇唔算好多，比較吸引嘅係烤豬脾同埋似日式嘅蔬菜蛋花湯，其他食物嘛，主要係為咗填飽肚子囉～甜品造工比較粗糙，我哋都係食水果好了～餐廳氣氛都唔錯，有拎住ukulele嘅職員小隊會同客人傾下計，你有咩慶祝佢哋會過嚟唱首歌咁～:)

食飯時間好早，五點幾就開餐，食飽飽距離睇show仲有好多時間，點樣消磨好呢？

我哋周圍影下相啦～大門口呢度介紹咗Polynesia嘅幾個成員民族﹗

另外我哋又睇下大會官方晒咗嘅相，買就唔買了，太貴啦，價錢同上次去北京水立方嘅一樣，不過一個係美金一個係RMB～何況又冇話影得非常有特色～另外又逛逛紀念品店啦，但東東質素一般，曾經考慮過買紐西蘭嘅流星錘返嚟玩，但摸上手感覺返嚟屋企可以自製，所以都放棄了～

正百無聊賴之際，發現有個tram tour，好似門票有得撇飛參加㗎喎，話帶大家參觀當地人去嘅temple，好啦，去下啦～

坐上架唔知道目的地在何處嘅車子～

咦，馬上離開咗Polynesian Cultural Center？車上兩位年輕女性導遊介紹自己，佢哋係PCC旁邊嘅大學嘅畢業生，原來PCC同大學有個合作關係，大學生會過嚟PCC打工，賺啲錢support佢哋讀書，而畢業後亦有啲就業計劃～我哋正要經過大學嘅校園呢，原來學校叫Brigham Young University，導遊話學校係全球最國際化嘅學校之一，學生嚟自世界好多唔同嘅角落～

我哋係美輪美奐嘅建築物前面落車，原來呢度就係temple了～哦？係繁華嘅威基基or美國大陸嘅其他地方，都少見咁華麗嘅temple呢，何況仲要係人口相對稀疏嘅Oahu North Shore？心裡有種不太搭調嘅感覺⋯

落車有職員好熱烈咁歡迎我哋，仲主動話要幫我哋合照添～

temple前有個美麗嘅水池～

咦，有個耶穌像？但成個temple嘅感覺同我哋平時去慣嘅天主教堂or基督教堂or甚至東正教堂都完全唔同﹗﹗﹗睇一睇周圍嘅字，原來係「後期聖徒教會」嚟嘅，即是大家一般講嘅「摩門教」～真係奇遇，奇遇～

以我係天主教家庭長大，係基督教學校讀書，嫁咗俾信義會長大嘅老公，返嘅教會係傳統嘅天主教會同埋信義會教會，我從小對於「佢哋」嘅印象係「唔同的」，佢哋好熱切，早年前時時見到啲打扮正式又端莊，著住恤衫西褲打呔，操流利廣東話嘅鬼佬係屯門街頭兜搭途人，細個時受嘅教育係「佢哋唔同的」，所以只會見到時急急腳行過等佢哋唔好截停我～但從來都冇機會認識「佢哋」，亦感覺怪怪的～今次可以睇到佢哋嘅角度去present佢哋嘅信仰，都係新嘅體驗，temple有個visitor centre，好似museum的東東，展示咗唔同語言嘅摩門經啦，又有interactive嘅電腦programme，可以俾大家自由睇下講解嘅video～入面有啲聚會場所，超豪華﹗﹗令我諗起舊年年尾去過參觀嘅西班牙皇宮，但新淨同靚100倍，真係好有錢呢～umum，睇啲video，佢哋好似盡量講到佢哋嘅開始係一個神蹟，有耶穌係小男孩前顯現，佢叫成立新嘅教會，同埋強調後期聖徒們都用聖經，點講呢，返到嚟吸引咗我search下wiki睇多啲囉～睇番完來Brigham Young University根本就係教會大學﹗而且係美國仲有幾間分校添，勁﹗勁有錢﹗

我哋就係參加呢個Laie Tram Tour了﹗係咪睇唔出係傳教活動呢？呵呵～上車仲一人派一張咭，如果你有興趣知道多啲可以留contact﹗﹗

雖然有少少奇怪，又同PCC完全冇關係，我又唔討厭「被騙」咗上呢架車嘅，覺得都係難得嘅experience﹗如果我哋100%自由行，用一對腳去旅行，開宗明義見到外面寫住後期聖徒教會，我哋會唔會入去丫？梗係唔會啦～

時間差不多，我哋可以入去劇場準備睇show啦﹗呢個名為「HA Breath of Life」嘅show正式係啲乜我都唔係好sure，相信係啲民族舞蹈之類吧～開場前無聊自拍﹗睇清楚我哋嘅family tattoo﹗﹗:D

故事講嘅係一個部落男孩嘅一生﹗有佢媽媽懷孕，到佢出世，到成長，到遇到外敵入侵嘅挑戰，到遇到心儀嘅另一半，到贏得美人歸，到延續生命到下一代嘅故事﹗當中主要係唔同民族嘅舞蹈去貫穿啦，都好有熱情同張力﹗不過唔知係咪出咗嚟成日攰攰地呢，我哋上半場都有間中失去知覺，中場休息後就醒神啲﹗

九點幾散場，我哋搵返我哋嘅旅遊巴，上車當然呼呼大睡咯～充實嘅一日﹗

我哋去嘅Polynesian Cultural Centre網站：

http://www.polynesia.com/

待續

前往其他美國旅遊blog

Comments

comments