睇咗上次「1-7-2014:來玩棒球吧@PLAY」blog嘅朋友們都知道我有預告過,同一個星期日我同day會去玩抱石,點解一個星期內有咁多有趣新鮮嘅玩意,一來我哋呢排都好積極運動啦,要擺脫「兩條肥嘢」嘅命運,二來上次去行山晒到燶,炎炎夏日不如都係揀啲室內活動啦﹗呢排興去工廠大廈玩,就由呢個方向search啦~
比起上次嘅棒球,其實更加早search到呢個抱石場,不過要就啱時間參加初學者嘅introduction先得,所以就延遲到星期日至去喇﹗我哋去嘅就係位於新蒲崗太子道東一楝工廠大廈地下嘅Just Climb抱石場﹗由屯門出發,搭61X一程車去到都算方便啦~有興趣可以入去佢哋網頁睇下,可以網上登記上course,直接網上paypal或者信用卡俾埋錢,都幾方便~
不過入場就有少少混亂,唔知點解佢哋search唔到我訂咗上course嘅record,要我由e-mail forward番個confirmation俾佢哋~好似好high tech咁,登記做會員填form係用ipad自己輸入,再用個web cam同你影埋相~係locker放低東東就等開始上堂了﹗更衣室雖然唔係好大,但女仔嗰邊都有兩隔沖涼,玩完抱石大大汗咁沖個涼就爽晒﹗
我哋今個introductory course嘅instructor叫阿Mike,係個年輕有幹勁嘅小伙子,我哋呢班學生年齡應該二字頭至三字頭吧?Mike先帶我哋做少少stretching,最重要嘅拉筋練習原來係wrist嘅extension同flexion,因為抱石要用好多hand grip嘅力,用嘅就係前臂嘅肌肉,所以Mike話,爬到手軟軟手酸酸時就要stretch下了﹗
之後講解少少簡單抱石嘅規則,大家比較熟悉嘅應該係攀石,攀石通常要爬上高處,要用安全帶~講起攀石,其實上次去遊輪嗰陣我都勉強算有玩過嘅~(請參閱:21-2-2010:海洋神話號day 2.at sea (part 2))抱石就第一次﹗抱石就係向橫or向斜發展,Just Climb嘅牆最高只去到4米,唔需要用安全帶(小朋友course例外),保護措施就係地上嘅厚墊,更重要嘅係我哋由高處落下嘅正確動作﹗牆嘅數目有限,但玩嘅方法就好多了,因為同一幅牆標籤咗好多唔同顏色嘅number,原來代表唔同路線,每條路線有起點有終點,你可以用嘅「粒粒」就係你嗰條路線號碼嘅「粒粒」only~所以一幅牆可以同時俾初學者至高階者玩呢~
講完一輪就去試裝備了,借咗鞋仔先,原來攀石鞋嘅鞋頭特尖特窄,用意係可以聚腳嘅力去腳尖度,需要時可以用好細嘅area去support個身體嘅重量,所以著起嚟有啲辛苦呢,好似著全新又硬嘅女人鞋,Mike話大家係地面等時唔慣的話可以暫時鬆對腳出嚟休息一下﹗我都有咁嘅需要丫,即使平時著37-38號鞋嘅我,今次著39號嘅攀石鞋我著得耐咗都好辛苦~另一樣裝備就係拍上手用嘅鎂粉了,當手汗多會滑時就要拍一拍了﹗
之後我哋就輪流試最最最basic嘅粉紅色牆1號線,男男女女都順利一take過了﹗但之後同樣係beginner嘅10號線我都完成唔到啦~introduction course嘅費用已經包括全日任玩,所以上完堂之後你鍾意試攀邊幅牆邊條路線都得﹗攀時發現⋯都係肥肉太多肌肉太少﹗見人哋好輕鬆咁攀過去,感覺上個動作都唔係好難啫嘅時候,自己同一個動作係上面都會因為手嘅power唔夠而移動唔到~自己係牆上面時會見唔到啲粒粒嘅number,所以要朋友係地面指點指點,不過嘛,抱石都好需要decision making,而且越decisive越好,因為你諗得越耐,消耗嘅力量就越多,之後想攀都會變成冇力﹗要鍛練鍛練鍛練﹗唔,整體都感覺好玩,但真係唔夠力,所以平時要加強鍛鍊上肢嘅肌肉耐力,同埋要減磅,身體重即是等於人哋揹住好重嘅行李上去一樣咁辛苦~
雖然辛苦又唔成功,我哋結果都買咗10次入場套票,希望下次成績好啲啦~:D
加多句唔關事嘅,我哋玩完抱石就去咗旁邊嘅Mikiki商場食晚飯,平時係屯門市廣場逼逼逼嘅我哋去到呢個冇人嘅商場感覺好舒適,即使冇咩特別鋪頭都唔緊要,單單係個冇人嘅商場度逛已經好幸福了,晚飯時間?星期日晚都唔駛等位,想食邊間就邊間,直接入去就ok了,係屯門真係no way~
點解無你哋抱石嘅相呀~?
因為太忙、太累同埋太污糟了~
太忙->我哋上緊堂聽書嘛
太累->抱石用盡所有氣力,冇辦法理會其他事情
太污糟->因為手上有鎂粉,唔想摸落其他東東度
下次睇下有冇機會影啦~:D
攀石真係要減下肥先可以玩,身重好難搞,都係對於打棒球有興趣多D~
我記得以前去過宿營,營地都有類似抱石的設施~
辛苦係辛苦啲,但好好玩㗎﹗棒球消磨唔到咁耐時間,而且都多人排隊,玩耐啲都幾貴﹗
我都記得,嗰次應該係可風嘅day camp?我都係現場﹗但嗰時點解我冇玩呢?係咪太細個?定我太細膽?
其實需要敏捷多於力量~ 當然我們的體重也令我們敏捷不來⋯⋯
整體都好好玩,而且沒人理你玩成點!大家都專注爬自己的路線
少啲肥肉差好遠﹗﹗BMI<23的話一定輕盈好多~
雖然我玩得好差,但都想再去丫~
Rita你好,
SeeWide特搜網是一個全新互動生活分享平台,集齊各地遊山玩水好去處及講玩、講食、講扮靚、講生活,讓大家分享不同的生活體驗。
你的網誌十分切合我們網站主題,內容及相片也很有質素,請問可否讓我們轉載網誌內的相片及內容?(會注明出處及不作改動)
我們的目的,是盡力網羅優質的相片及內容,建立一個包含豐富生活資訊的玩樂休閒分享平台,讓一眾志同道合的網友可更輕易獲得寶貴的參考資料。現階段,SeeWide 已擁有超過十萬篇生活攻略,瀏覽量亦超過數十萬。
希望你能成為我們平台的一份子,助我們更有效地集結各樣不同的好玩好食生活資訊!
另外,我們亦設有「稿費」制度,透過發表文章所累積的本地瀏覽量,即可兌換稿費!
而我們亦可以你的名義,將稿費捐到香港宣明會,或你指定的慈善機構
詳情可參閱:http://www.seewide.com/space.php?do=help&essay_id=22#001
如有任何查詢, 歡迎電郵至: info@seewide.com
有多啲人睇到我個blog都係好事丫﹗轉載的話沒問題~
不過因為我哋係自家server,所以個網頁唔係太穩定,而家處理中,如果你哋唔介意便ok了~
好高興你欣賞我個blog﹗
🙂
首先謝謝你對SeeWide的支持!
你網誌內豐富的旅遊體驗, 是對我們十分重要的資料呢!
我們亦已替你在SeeWide 開設帳戶, 並已經開始轉載文章:
http://www.seewide.com/space-1736.html
如你希望取得該帳戶的資料, 以回覆留言或管理文章
歡迎你隨時發電郵到info@seewide.com索取有關詳情!
再次感謝你樂意與大家分享你的的旅遊經歷!
謝謝