閱微莊四合院嘅晚上嘛，蜜月套房嘅紅色薄紗簾子好浪漫，不過始終係舊式嘅床吧，轉身時好似咯吱咯吱咁嘅聲，都係新式酒店嘅床舒服啲～:p

到咗最後一日，都要善用時間，我哋唔想太晏出發，所以早少少起身食早餐啦﹗今次閱微莊嘅房價已經包咗自助早餐了﹗網上對於早餐嘅評論嘛，啲鬼佬們好似對於有得食西式早餐感覺好窩心咁，不過我睇嘛，都係中式早餐比較吸引，紫菜蛋花湯、包子、粽子始終好食過不太正宗嘅西式早餐吧？比較impress我嘅反而係放係餐廳枱面嘅英文「溫馨提示」，好似截的士嘅tips，酒店有咩設施服務，點解你會上唔到Facebook或者Twitter等等～

除咗同閱微莊職員say goodbye之外，仲有佢﹗呢隻會講「你好」嘅職員雀～

我哋食飽飽就執好行李check out離開啦，臨走時櫃枱職員送咗一罐茶葉俾我哋呢～哈，佢見我哋兩個一人一個大背包，聽我哋講今日要去機場，佢誤會咗我哋係全國旅行嘅背包客，終於嚟到最後一站北京，跟住就返香港了⋯錯晒﹗咁大個背包⋯其實只係五日嘅行李～I’m sorry～:p

大家記得我哋由朝陽門地鐵站行入嚟胡同之中嘅閱微莊都有相當距離，所以我哋決定唔來回呢條路多一次了，反正北京火車站同朝陽門只差兩個地鐵站，而且係同一條線上面，不如我哋放低行李係北京火車站至去玩啦～我哋左望望右望望之際，已經有幾個人出嚟兜搭問我哋係咪要存放行李，好啦，咁盛意拳拳，跟咗佢去，原來係間超級市場入面﹗搞笑嘅係，佢叫我哋放背包過X-ray，點知塞唔落，instead of打開嚟檢查下，佢竟然話算數，哈，咁叫做有冇保安呢？﹗

好啦好啦，出發去玩啦﹗今日必去嘅行程係鳥巢同埋水立方，如果有時間剩就再作打算啦～講起2008北京奧運，就會記起呢個陳年故事，話說當年199x年時北京積極爭取2000年主辦奧運，嗰陣都出咗好多2000北京奧運嘅商品，小學生嘅我當時有一條呢個主題嘅單車褲，我本來好鍾意呢條黑底螢光黃邊嘅褲子，點知有一日晴天霹靂，北京申請主辦輪咗俾澳洲悉尼，呢條褲就令人非常困擾了，我亦唔肯再著，如果保留至今，應該都算係一件歷史嘅見證吧﹗

落咗地鐵行出嚟就見到售票處，旅遊書都冇乜點講參觀鳥巢水立方有咩門票，我哋見VIP同一般唔差幾多錢就試下VIP啦，原來有多啲地方可以參觀～等候上車時有得睇啲北京奧運嘅video，奧運有好多經典畫面、感動畫面我哋當然電視上睇過啦，但叫我最震憾嘅反而係殘奧嘅片段，雖然蘇樺偉痙攣同弱聽，但總算四肢健全，但原來有啲殘奧參賽者冇腳都可以跑步，推動自己嘅輪椅都可以競速，同一般嘅奧運同樣充滿汗水淚水同激情，睇video都叫人血脈沸騰呢～

出發了，我哋由售票處搭電瓶車前往鳥巢，一坐上車就有好多好多人走過嚟塞啲傳單係你手﹗話說旅遊書都提醒大家多啲拎地鐵站派嘅傳單，因為上面會印有最update嘅地鐵路線圖或街道map，好好用，但千祈唔好參加背後宣傳嘅超平旅行團，其實我真係有10個好奇嗰啲旅行團係點運作的，因為一日遊去超多景點，仲要送好多禮物俾你，包幾餐你食，仲包導遊費同旅遊巴費用，價錢都唔過RMB200，極度好奇﹗亦感覺極度恐怖﹗

電視上就見鳥巢見得多，佢嘅真身我都係第一次見，外型真係好突出、好時尚呢～

我哋平時只留意北京奧運嘅五隻福娃：「北京歡迎你－－貝貝、晶晶、歡歡、迎迎、妮妮」，而唔知道鳥巢都有自己嘅吉祥物呢，男仔一條辮子，女仔兩條辮子，分別叫Lino同Olin～

近距離嘅鳥巢好宏偉呢﹗

入去參觀﹗好大呀～唔知呢度大啲定上次去巴塞隆拿嘅魯營球場大啲呢？睇睇百度，原來鳥巢可以坐91000人，都同魯營不相上下噃～

不過鳥巢係田徑場，觀眾離中間嘅草地就遠少少，因為要隔住跑道嘛～

熱熱嘅天氣之中休息一下，合照一下﹗

之後仲有好多站參觀嘅地方呢，其中有呢個歷任國際奧委會主席蠟像展～

同(假嘅)薩馬蘭奇合照要俾錢⋯

我寧願同(圖片嘅)五月天合照lu～五月天真係好威水呀﹗﹗佢哋係呢個可以坐100000人嘅場館(座位椅+中間草地)，連續開咗兩場演唱會，而且仲要爆滿添呢﹗﹗

「鳥巢」啲「小樹枝」其實唔係裝飾咁簡單，事實上係靠佢哋支撐住成個場館嘅呢﹗

之後「普通客人」同埋「貴賓」就分道揚鑣了，我覺得佢哋咁樣稱呼我哋真係好尷尬呢，我哋只係俾多咗區區嘅幾十蚊而已⋯^_^” 呢度係金色大廳，係國家元首聚頭嘅地方呢，聽講之前都未開放出嚟俾公眾參觀㗎，所以之前爹媽家姐嚟北京時就應該未有得睇喇～

真係樣樣設計都有故事講，呢度係搭扶手電梯抬頭望嘅燈，話不規則嘅安排要仿效大自然，一個個洞洞就似係小鳥嘅家(？﹗)～

之後仲有幾個閃閃亮亮嘅大廳，應該都係重要人物會面見記者之類嘅地方～

呢個屏風畫上一啲中國古代嘅運動項目，原來東方西方發展嘅運動都有異曲同工之妙呢～之前睇韓劇「宮」講佢哋有啲類似哥爾夫球嘅玩意，唔知係咪真嘅呢？

成個鳥巢就只有一個「1」號座位，就係當時屬於國家主席江澤民嘅座位了～

呢個大廳都有啲好靚嘅裝飾呢～

其中有呢個雕刻嘅屏風～

之後就自由活動了﹗

展覽回顧咗當年嘅開幕典禮，有唔知幾多千人一齊彈嘅古箏﹗

仲有唔知幾多千人一齊划嘅船槳﹗

呀，尋日去圓明園時咪講過十二生肖獸首嘅，真品當然放係博物館入面啦，係鳥巢展示嘅有齊十二生肖，不過係當年成龍用嚟拍戲嘅道具～

呢個超大夜景poster都幾靚丫，我彷彿置身其中呢～彌補咗我哋冇機會睇嘅夜景～

鳥巢參觀到呢度，我哋過去水立方咯﹗

待續

前往其他中國旅遊blog

Comments

comments