逛完圓明園，我哋要返去木棉花酒店拎行李咯，因為今晚要搬酒店﹗去得嗰五日四夜都要住兩間酒店？﹗因為今晚住嘅係－－四合院﹗﹗係今個trip嘅另一亮點呢～不過我哋返木棉花途中有少少意料之外嘅行程，所以四合院嘅blog要留下一篇至出場啦～

咦？呢個有麥當勞標誌嘅車仔，應該唔係麥當勞分店咁誇張吧？﹗

我哋由另一個出口離開園明院，本來打算隨便跳上一架巴士去到地鐵站就轉番地鐵返去木棉花，點知⋯

未到預計要落車嘅巴士站時見到⋯咦？﹗係Zoo Coffee？﹗原來我哋係首爾去過好喜歡嘅Zoo Coffee係北京都有分店呀？﹗(請參閱：13-4-2012：首爾濟州櫻花遊day 6(part 1)．汝矣島賞櫻)提議衝動跳落車嘅竟然係day而唔係我呢～(當然佢應該都係見到我兩眼發光至話落車吧？:p)

既然用咗北京八達通搭巴士，原價RMB1嘅車資只需要RMB0.4，我哋跳落車飲杯嘢再跳番上車都唔算太奢侈吧？我來也，Zoo Coffee﹗

http://www.zoocoffee.com/main.jsp

我哋由圓明園出來其實已經渴得不得了，係度涼下冷氣、飲下凍飲正好﹗day出發北京前其實已經打算買Fitbit Flex俾我做生日禮物，哈，好在禮物未到手，如果唔係呢杯肥嘢我就應該唔會叫嚟飲啦，告別啦，肥肥飲品﹗

其實以北京物價嚟講，Zoo Coffee嘅飲品一啲都唔平，但估唔到呢啲下午時分居然坐得幾滿呢，而且全部都係一人一notebook嘅大學生，冇錯，呢度係北京大學附近～呢度有冷氣涼又有free wifi，當然都係大學生嘅好蒲點嘅～但當年仲讀大學嘅我都唔係好捨得去外面啲cafe飲嘢咋，只捨得去HKU main lib旁邊嗰間Starbucks，叫tall嘅coffee of the day，自己帶tumbler去，折實只需要$14左右，大大杯可以飲成朝，咁就差唔多～不過而家呢，肥嘢生冷嘢都棄絕(棄80-90%啦)，呢啲cafe都真係冇乜嘢啱飲了⋯哎吔，越講越遠添～day叫我扮影佢順便影下坐無虛席嘅大學生，你知我膽小如鼠啦，結果都不太成功，sorry～:p

叉足電我哋又上路了﹗咁急？因為個free wifi都唔係好掂，算啦走喇～走時睇下有咩食先？主要都係三文治呀、沙律呀、小食呀之類～

仔細睇餐牌先發覺北京嘅Zoo Coffee唔係純西式or韓式cafe﹗﹗居然有中式碟頭飯食﹗可能要迎合大學生嘅需要吧～唔，好似氣氛破壞咗少少噃，同埋碟頭飯好大陣味嘛～雖然我唔係特別鍾意食包，但我將來要是開嘅cafe都係唔好賣碟頭飯了～

既然落咗車，順道係附近隨便逛逛啦，到時先再跳上架巴士去地鐵站就好了～

果然好多人踩單車，連單車嘅停車場都有兩層車位呢～

咦，呢個位我記得旅遊書見過呢個海淀區圖書城，既然係景點，都要入去埋下周吧﹗

入到去⋯都冇乜嘢睇吧？書店又冇，好多鋪頭都吉咗，睇番百度百科至知呢個圖書城已經沒落了～

http://baike.baidu.com/view/1262715.htm

冇乜好逛，不過沿途見到一間又一間嘅靚靚cafe，應該都係附近多大學生同埋上班族吧，如果逗留係北京時間長啲，可以逐間去坐下飲下嘢呢～

好，終於睇到路人嘅示意地圖了，咦，似乎附近嘅地鐵站都「walkable」喎，少少遠都行過去啦，順便經過下繁華嘅商業區～

等地鐵見到呢兩張有趣嘅廣告，廣告標語係有趣，更有趣嘅係「果然係兩姊妹」，話說我去完冇耐北京返來，家姐姐夫就去咗上海旅行，家姐又不約而同係上海影低咗相同嘅廣告標語呢﹗

返到王府井了﹗之前經過呢間吳裕泰茶莊幾次，次次都見到勁長龍排隊買雪糕，今次終於見到10人至內嘅短隊，好似冇乜理由唔趁機會買嚟食，抹茶？茉莉花茶？我梗係揀茉莉花茶味雪糕啦，上次係曼谷我第一次食過之後就深深愛上咗呢個口味了～(請參閱：17-8-2013：即興曼谷day 2(part 2)．學做泰廚之實戰篇)呢個都好正啊～果然係茶莊出品，味道芳香得嚟好真實﹗

原來吳裕泰茶莊仲有自己網頁呢：

http://wuyutai.com/default.php

返木棉花揹起行李我哋就出發前往位於朝陽門附近嘅四合院酒店了﹗我哋係背包客？nonono，我最鍾意就係拖喼，呵呵，不過今次要帶埋行李返工出發，都係咁樣方便啲～:p後來四合院個前枱小姐仲因為我哋嘅裝束誤會咗我哋遊歷全國最後一站係北京呢～(因為我哋提到要去機場返香港)

雖然行李唔算太輕，我哋都選擇搭地鐵再步行入去四合院，事關睇網上資料都講到，四合院啲小路比較窄，的士入去唔方便，而且啲司機都未必識咁細嘅路，唔怕啦，反正睇好地圖，我哋自己過去啦～

再次行過去王府井站，呢條行咗好多次嘅路，今次我哋行對面碼路，感受一下呢個附近熟食市場嘅活力﹗結果都係冇幫襯﹗我行時又要單起隻眼嚟快快經過呢，因為啲烤串鋪頭又再次出現嗰啲生氣勃勃嘅蠍子了⋯oops﹗真係有人幫襯，仲要係啲鬼仔鬼妹添丫﹗

我一直自己讀「朝陽明」做「”蕉”陽門」，直至聽到地鐵廣播係「”潮”陽門」至知正確意思，睇埋地鐵站呢幅畫就更清楚了﹗

原來朝陽門附近都係高樓大夏林立嘅商業區呢～

呢條十字天橋非常有氣勢﹗我都忍唔住要影低佢～

係呢個發展咁發達，咁多高樓大廈咁熱鬧嘅路段，轉一個彎、轉兩個彎⋯馬上就變咗另一個世界呢，我哋馬上就要去到位於東四四條胡同入面嘅閱微莊四合院啦～

待續

前往其他中國旅遊blog

Comments

comments