27-12-2013:物質主義中的綠洲.香港藝術館

難得o既假期,對於一整日o既安排非常滿意呢~一日約好咗之前travelzoo local o既優惠,中午先嚟一個全身按摩+耳燭+facial,全身鬆一鬆,變得明艷照人後,又未到約好朋友打邊爐o既時間,去邊好呢?係尖沙咀雖然可以shopping,可以入戲院睇場戲,甚至去間cafe買杯嘢飲跟住篤篤篤部手機到夠鐘~但我真係難得地記起我哋買咗博物館通行證,一場嚟到尖沙咀,不如逛下museum啦~反正香港藝術館好多時都有啲專題展覽,就去睇下有咩啦~好似好突然咁,但其實我不嬲都鍾意行美術館o架,不過通常都去旅行時先會去行,一下子諗到印象深刻o既有呢兩個:

6-6-2008:遊金澤.祭典once more

28-5-2013:釜山麗水day 4(part 2).恬靜與哀愁的戰爭紀念、現代美術館

IMG_3012

影咗外觀,冇打咭,感覺去美術館仲要打咭好難為情咁,唔知炫耀自己咩藝術氣息…anyway,決定打呢篇blog因為好想share下今次o既經歷呢~

今次有個「香港當代藝術獎2012」就最吸引到我喇:

http://hk.art.museum/

https://www.facebook.com/artmaphkcaaIMG_3013

全部都係本地藝術家o既作品,我哋平時會諗,藝術 = 畫、書法、雕塑、音樂等等…但其實任何用各種媒介去表達一個概念或感受o既其實都可以叫做藝術﹗﹗我影咗相o既呢個作品係我印象最深刻的~

呢個睇落係家居梳化茶几套裝,原來作者有見人生結束時用o既棺木好唔環保,用一陣就燒光光,而且人生最後一刻呢個咁重要o既moment,竟然要瞓係一輩子都陌生o既木盒子入面,所以佢design咗呢張梳化床,先用佢三數十年,到舊舊地,又滿有感情時,兩腳一伸,又可以用嚟做棺木,我都好buy呢個諗頭bor,不過返到屋企同老公share時佢話,咁我哋兩個人屋企咪要放兩張嘢囉?哈哈,咁又係喎,冇位放添~IMG_3014

呢個犀利咯,入去間成一間房仔咁o既空間,牆壁上o既書法原來係「論語」﹗﹗360度都係「論語」﹗即刻諗起媽咪呢,媽咪未退休之前就係係中學教儒、釋、道思想,論語當然係範圍之內啦,即使我哋呢啲唔係咁專門讀過o既,中文堂都有學過少少,有啲句子都好熟悉o架,「學而時習之,不亦樂乎…」如果真係有讀過晒真係成為好有學問o既人了~IMG_3015

我小學時都有學過書法、國畫,但小朋友時主要都係練楷書,最多都係練埋棣書,至於行書、草書對我哋嚟講都係老師先識o既~雖然呢張字同係楷書,但不愧有個詞叫做「蠅頭小楷」,真係好細小﹗﹗「金剛經」有幾多個字?呢度就有幾多個字﹗﹗不得不佩服書法家o既耐性、耐力﹗毛筆字喎,一個錯咗就要由頭再嚟過o架lu喎,仲要係咁細o既字,咁整齊係一張紙上面,勁﹗﹗IMG_3016

香港藝術館另一迷人o既地方就係,上落樓梯時都會經過迷人o既維港風景﹗大玻璃前有好多長椅,可以稍稍休息同埋欣賞一下景色~對遊客、對忙碌o既香港人嚟講都係一個難得o既綠洲~IMG_3017

好漂亮o既紙皮兔子﹗藝術家慨歎香港人置業難,兔子尚且有三個洞洞居住,人要擁有自己o既安樂蝸居更難,兔子o既胃、肺、心臟有一間又一間o既房間、大門,反映咗香港人密集o既居住環境﹗呢度想講o既係,你要有idea之餘,真係要有對巧手﹗我有一樣o既紙皮、一樣o既釘子係手,俾成世我我都整唔到呢隻兔子出嚟﹗﹗IMG_3018

呢個係「雞地圖」,呢啲係大眾有份參與o既公眾行為藝術,放咗啲雞雞係大街小巷,拍攝途人o既反應,都幾有趣﹗﹗大家係街上見到呢啲雞雞,可以send短訊係指定電話號碼,就會plot多一個check point係「雞地圖」上面了﹗趣味之處在於人生百態﹗﹗IMG_3019

媒介係普通o既水彩畫,題材係我喜愛o既腸粉﹗一系列三幅水彩畫,其餘兩幅係白粥油條同埋豉油王炒麵,題材無分貴賤,貼近生活更叫人心頭暖暖~

同以往睇過o既現代藝術唔同o既係,今次真係好本地化,從作品可以見到自己同藝術家同聲同氣,一齊長大o既感覺,呢個係係外國行美術館時冇o既~係外國,你只會以欣賞o既角度去睇,但今次有種我哋都係參與者咁去睇~IMG_3020我哋平時行車路咪有好多大字係地下,好似「慢駛」、「選定行車線」之類,呢個作品你可以係上面o既字堆之中揀啲字出嚟寫成句子或詩詞,一click enter,你o既大字就會印係馬路(當然係虛擬啦)上面了﹗無聊的、鼓勵的、詩情畫意的、情情愛愛的,全憑你o既想像﹗

今日好享受去咗香港藝術館一趟~

係呢度順道推介一下博物館通行証,特別係家庭証﹗

http://www.lcsd.gov.hk/b5/cs_museum_pass.php

四個人一年$200,可以無限次入場幾間博物館,之前有啲特別展,好似歷史博物館o既秦俑、文化博物館o既Pixar展覽同埋畢加索展覽,大家撲飛撲到傻,而且仲限時限刻入場,有通行証你可以施施然到場、不分時段,正~

Comments

comments

4 關於 “27-12-2013:物質主義中的綠洲.香港藝術館” 的評論

  1. 真係好有趣喎,我都好喜歡那個梳化棺材的概念~
    有一次我同恆仔去逛香港藝術館,主題是《乾隆皇帝的秘密花園》,因為個時啱啱睇完《步步驚心》,所以都覺得內容好有趣好親切~

    • 係呀,不過恐怕好多中國人接受唔到吧?應該唔會變成商品﹗:p
      因為講啲後宮嘢?定係講皇宮入面o既陳設?

  2. 這樣的棺材很有心思,可能有銷路呀!因為它不是放在睡房的床,而是梳化床,放在客廳,既是日常所用,而用過的東西當隌葬才有親切感。

發表迴響

你的電子郵件位址並不會被公開。 必要欄位標記為 *