遊覽完七星潭，時間尚早，我o地決定趁今晚出去花蓮市最熱鬧o既地方逛一逛，同埋食個晚飯~雖然去台灣好多人都主攻地道小食、夜市之類，但我覺得，靚靚o既cafe都係台灣一大特色o黎o架~

未肚餓，我o地逛逛街先~見到一間原住民特色o既舖頭，入去睇下有冇咩souvenir買先~話說入到去望下o野時，個老闆娘對我部相機大sony powershot HX01非常感興趣，我就借俾佢睇下試下啦~

呢張相就係老闆娘操刀o架啦﹗佢即刻拎俾佢老公睇下，於時，佢老公就用手上o既東西o黎同我交換o左部大sony…

冇錯﹗就係個BB﹗哈哈~好耐冇抱過BB lu~好喜歡BB軟綿綿、暖笠笠o既o既感覺~connie就係度笑我抱人o地個BB抱到喜孜孜啦~根據我o地o既milestone判斷，個BB應該係細過三個月﹗因為佢仲未有head control~證實了，原來佢而家兩個月大~

結果同老闆、老闆娘吱喳o左一輪先走~我就係100%運吉o既，不過heehee，connie都有幫襯~

其實沿路都見到好多靚靚鋪頭o架，而且都有好多東東比香港平好多，都好想買，可惜花蓮市用visa、master呢D信用咭唔普遍o羅，我o地換o既台幣又唔係超充裕，所以都唔敢亂買o野…得個睇字~

遇上了﹗我o地揀定o左呢間餐廳了~樓下係精品店同埋餐廳cafe，樓上係民宿~

就係佢﹗「小熊森林」~淨係個名都夠可愛啦~

入面o既裝潢都係貫徹始終地咁可愛~

而且都唔貴呀~一個套餐250台幣起，即是仲平過double star、italian tomato、suzuki等等級數o既cafe﹗仲可以選擇意大利麵、扒類同埋中式飯類添~套餐包括沙律、餐湯、主菜、飲品、甜品同埋水果﹗太過份了~係香港嘛，靚o既餐廳又未必好食，好食o既又未必靚，又靚又好食o既又會好貴喎~究竟呢度做唔做得到三全其美呢？

心裏面又係度暗暗擔心，點算呀？個餐咁吸引，民宿老闆又仲請我o地食tiramisu喎…點食得落呢？﹗唔理啦，照食o左呢餐先算啦~

個沙律o黎到就知道，成功了﹗成功了﹗連個沙律都咁認真製作，其他都會高level啦~生菜、甘筍、椰菜都切成細絲，上面o既醬汁唔係撻皮o既即開沙律醬，而係經過調配o既蘋果味醬汁，甜甜的好開胃~仲撒o左D香草係上面添~

我揀o左明太子義大利麵做主菜，比起suzuki o黎講，明太子o既份量冇咁孤寒呢~

飲品都唔係一般o既咖啡或茶，而係台式飲品，我揀o左茉香奶茶，哇，好香呀，飲o左簡直好似個口可以開出一朶茉莉花呢~呢個都飲到我瞇瞇眼…

甜品可以揀自家製奶凍或者cheese cake，因為我o地仲有民宿老闆請我o地食o既tiramisu嘛，所以「有義氣」地揀o左奶凍﹗個奶凍都冇令人失望呢~上面o個pat杏子果醬，令個奶凍睇起o黎好似荷包蛋咁o既樣…

帶大家參觀下餐廳o既其他位置啦~

好適合情侶、三五知己、一家大細o黎高高興興咁食西餐~

果然係由小熊所組成o既森林﹗

鎮店之寶，巨型啤啤熊﹗

小熊所造成o既聖誕樹乎？﹗

小熊森林o既店面~

我一直提起o既tiramisu，其實係同民宿老闆娘鳳梨阿姨用e-mail聯絡時，佢應承請我o地食的，講過o既o野果然一一兌現呢~

就係呢間「提拉米蘇」喇﹗聽講好出名o架，而家全個台灣都有分店了~

打開個盒時真係高呼oh no no~哇？﹗咁大個tiramisu﹗兩個人點食呀？﹗我o地食完大大份o既小熊森林套餐之後，結果到午夜十二點先至再食tiramisu o羅~

肥死了…不過確實好好味o既~鳳梨阿姨冇介紹錯~thanks~

待續

前往其他台灣旅遊blog

Comments

comments