大家留意呀，我一次過打埋初一(18-2-2007)o既diary o架~

每年農曆新年o既安排基本上都一樣，初一去住係鯽魚涌o既婆婆度拜年，初二D姑姐o黎我屋企同爺嫲拜年，之後再去住係灣仔o既大姑婆度，初三就會去住係牛頭角o既三姑婆度拜年，拜年o既「膽」基本上就係咁o羅，間中都有D額外o既~

今日初二，所以姑姐們、叔嬸們、表兄弟姊妹們總共廿人左右大約中午就o黎到我屋企啦，朝早都叫做free o既，爸媽姐再次去行山，今日我唔去lu，留係屋企溫下書啦，呢兩日都溫得好少咋~再唔溫就si-cal-cal~其實係我房溫書都幾舒服丫

，只要執到張書枱乾乾淨淨少雜物就ok，今日天氣又舒服喎，唔太凍唔太熱，所以都幾專心o既~

十一點幾盆菜送o黎了，打電話上o黎叫我o地落去幫手拎，今次訂o左「大歡喜」o既盆菜，我o地聖堂都算係佢o地o既老主顧啦，兩年堂慶都幫襯佢o地~送貨時犀利o既係，架車竟然係一架新界的士﹗唔講真係估唔到入面載o既唔係人，而係大盆小盆o既盆菜﹗

之後冇幾耐D親戚都陸續到達啦，胡家is full of people，超多人呀，超嘈添~大家都熱烈地吱喳﹗智揚表哥第一次帶o左女友仔o黎，但太多人了，都冇咩機會結織結織~

我覺得個盆菜中規中矩啦，味道幾好，好過上次做冬時叫o個個好多，上次o個個太淡了，但今次餸菜o既品種好似比較少呢，夾夾下夾o黎夾去都係o個幾樣添…雖然廿人左右只係叫o左兩個中盆，但都食剩啦，oh oh，變成我o地聽日o既午餐﹗

食埋生果、洗好碗，我o地一行咁多人就浩浩蕩蕩咁出灣仔啦，962好逼人呢，我o地其餘零個人有位坐啦，得爺嫲有，咁都好在o者~

大姑婆最出名就係整o野食勁好味﹗佢以前係做有錢人家o既「馬姐」o架，所以識煮好多好多好o野食﹗舊陣時我o地會係大姑婆屋企食埋dinner添，佢o既賽螃蟹同埋瑤柱釀節瓜真係一絕﹗好令人回味呢~但近年為o左唔好令老人家咁辛苦，我o地改o左下午茶時份去拜年啦，變成食粥同埋蘿蔔糕，大姑婆o既皮蛋瘦肉粥都係超級超級好味道o架，係我食過最好味o既粥，粥煲得綿，鹹味剛好，最令人讚歎o既係D材料同粥底完全混為一體﹗鹹瘦肉整成一絲絲咁，啖啖粥都滲有瘦肉絲係入面，噢，太正了﹗

可惜今年大姑婆冇煲粥同蒸糕添啦，只會少少失望o既，點都唔想老人家辛苦，經過大姑婆手o既食物都好，即使係買o既都特別有眼光，佢今日D蛋散同埋笑口棗都超受歡迎，兩下手勢大家就清晒~坐下坐下，傾下傾下，突然先知道一個令人驚歎o既消息﹗原來大姑婆見冇煮o野食俾我o地食，佢竟然…佢竟然…叫o左pizza呀~~~~~~~~~~~~~~~~~~哇呀~~~~~~~~~~~~~~~~嚇死人了﹗竟然一個八十幾歲o既獨居阿婆會叫pizza俾我o地食呀﹗原來係大姑婆拜托佢個姪婿幫佢落order o既~大家都好落力咁食晒佢﹗如果唔係，剩低D o既話大姑婆自己一個人住都唔知點算好呢~

夜晚有節目﹗貫徹過往幾年o既習慣，每逢年初二晚都去睇戲，今晚都唔例外，一早買好飛lu，同爸媽姐去o左睇「翻生侏羅館」﹗原本都冇為意呢套戲o架，但係度睇下初二有咩戲好睇時先第一次留意佢o既劇情大綱，題材都幾有趣喎，而且個場景american’s museum of natural history我舊年六月時先去過呀﹗特別有親切感，又都聽到D人話幾好笑，所以揀o左呢套o羅~都ok呀，真係幾有趣，異想天開，又幾好笑﹗咁又未至於好感動，要狂同人推介咁o既~唔錯啦﹗好適合新年大笑一餐咁o既睇法﹗

係旺角睇有個好處就係可以直接搭亡命番屋企，好快就到了﹗番到屋企仲有大大碗湯飲呀~yeah~

Comments

comments