二零二三年十二月九日(星期六)
今年公司康樂會的兒童遊戲日再次選擇在海洋公園舉行，一確定日子我就立即上網預約車位，不過因為疫情已經過去，香港人不再一窩蜂的在香港的旅遊景點出現，我們差不多2PM才到海洋公園的停車場還有大量空置的車位。
海洋公園我地嚟喇~
我地一如以往的帶埋KIKI入場。
職員：寵物唔可以入場架噃
媽： 佢係妹妹
職員：咁就可以喇
爸：但係無買飛
職：唔緊要，3歲以下免費入場
依個職員真係風趣幽默。
我地未食午餐，諗住係入口旁邊的水都餅店簡簡單單食個包。
無諗過水都餅店以小王子為主題的「海洋公園月光之約甜品拼盤」三層架甜品拼盤又平又好食，其他糕餅質素都很不錯。
今個聖誕節海洋公園周圍都係小王子
依張小王子搭纜車好靚~
見到聖誕老人就忍唔住想合照，依個聖誕老人真係會HoHoHo咁笑架﹗
小王子星河探索，進入小王子的冒險世界，入去影下相都唔錯既~
擺晒POSE係小王子的玫瑰前面影靚相
佢係美雪呀~逸逸因為麥當勞開心樂園餐送的海洋公園保育小故事而認識佢哋，我地講得故事多都好似同佢地好似好熟咁，哈哈~
可愛的小狐獴，好有性格的佢擺完POSE影相就行開咗喇~
點都要去巨人森林遊樂場玩下，不過大個咗明顯無上兩次咁樣玩到唔捨得走。
之前要付費的探索號R，現在簡化咗成為了免費設施。
依度主要係玩手眼腳協調的遊戲，模擬同AI超級動物拍檔在虛擬自然世界中挑戰任務，幾有趣，而且比想像中不簡單。
逸逸一向鍾意玩轉轉馬都預咗
但係無諗過咁大個仍然想玩呠呠小火車
轉頭又見到活潑可愛的包包
以前的雀鳥表演的地方，變成了大嘜礦石場，原意係俾小朋友探索岩石同埋礦物、建造各種結構以及探究水的流動，不過完全無人帶住學習，我真係睇唔依個地方到達到想要的目的。
因為想去睇樹懶於是周圍搵佢個館係邊度，睇指示以為係海洋奇觀附近，要問職員先知道原來係以前樹熊個位，經過水池正好遇上音樂噴泉表演，我地都駐足觀賞。
睇完音樂噴泉旁邊又遇上「海洋公園明星大決鬥」的演出，是一個跳舞+雜技的表演。
咁啱用咗逸逸跳舞比賽用過的音樂，睇得特別興奮。
我們來到香港老大街睇樹懶，外面仲掛住舊住客樹熊同袋鼠的門牌。
職員姐姐借樹懶公仔俾逸逸同KIKI攬下
這是以珍稀動物為靈感的AI畫作
一直都唔知道原來海洋公園有養樹懶，原來樹懶係海洋公園已經生活咗超過8年，仔仔仲要喺海洋公園出世架！
我地搭登山纜車上山，排隊時遇到同事AMY和她的女兒。上車前大家估下會搭到什麼顏色的纜車，最後我地搭咗我估的紅色，我估紅色的原因係唔知點解我地次次都搭紅色咁滯架﹗
山上面繼續都係小王子
首先我地玩咗逸逸終於夠高玩的熱帶激流，一組人自己一隻船所以都排得耐耐地。對於逸逸嚟講依個機動遊戲充滿未知，所以佢都唔太ENJOY，仲整到成身濕晒添﹗
之後我地去咗睇企鵝
今日企鵝非常活躍，游得快到飛出水面。
又係去食冰極餐廳，今次無再叫套餐，因為想試「小王子星河探索之旅」拼盤，入面有西班牙火腿配蜜瓜、迷你洋葱煙肉撻、忌廉野菌撻、焗素蟹餅伴日式芥末醬、燒帶子同埋芝士煙肉薯丸，樣樣都幾好食，加多個雜扒，兩個人SHARE都夠晒飽。逸逸就例牌食兒童餐，每次都忍唔住想講兒童餐盤架海洋列車咁高，小朋友係唔夠高食架~
逸逸食飽就自己行出去睇企鵝，我地就遠少少坐係度一邊食飯一邊觀賞。
之後係逸逸一直掛住的極地時速，玩完又玩，今日應該總共玩咗六次。
不過我就只係玩咗兩次極地時速，因為中間有段時間恆仔陪逸逸玩，我去咗ME TIME玩咗三個比較刺激的機動遊戲。
雷霆節拍係超快版轉轉狗，離心力真係好勁，坐我前面有個細路想嘗試坐直個人係無可能。
最悶係依個超速旋風，一啲都唔刺激但係轉到頭暈。
最好玩最刺激係依個翻天覆地，我未玩過依類型的機動遊戲，慢速倒轉地係天空FING來FING去，絕對係全新的體驗。
本來逸逸仲想玩第七次極地時速，又話好耐都無得再玩好沮喪，為了改變心情，我地去玩下攤位遊戲。
恆仔幫逸逸拎咗份禮物，即刻開心返晒~其實仲有枝樹懶鉛筆添﹗
搭逸逸最喜歡的海洋列車返落山腳
本來諗進衝埋海洋奇觀去睇魚，點知原來海洋公園為咗包場人士多上演一場光影都會同埋光影頌，咁不如睇SHOW喇~
個表演好精彩，印象中之前都已經睇過一次。不過如果下次再睇要企係對岸，睇得舒服啲。
亮燈後的小王子
今日依個MRC CHRISTMAS CHILDREN’S DAY 2023玩得好開心呀﹗