二零二三年十一月二十日(星期日)
昨晚都幾凍下,只有15度睡袋的我著返昨晚的T SHIRT加衛衣瞓覺,只係換條睡褲就算,仲要用件褸放旁邊擋一擋帳篷邊的風先頂得順,至於逸逸就睡袋再蓋上恆仔的羽絨背心保暖。
真係無諗過早上竟然會係俾太陽熱醒的。
好靚的藍天
沿住去洗手間梳洗的路,不停的被美麗的風景吸引停下來拍照。
昨日剛到營地逸逸已經話要在這個圓拱拍照,但昨天有空的時候天已黑齊,今天再幫她拍。
梳洗完話要玩搖搖椅,我提醒佢:玩一陣好喇,你又話今朝要負責整早餐……
因為逸逸係學校學咗整三文治,所以今次露營她自動請纓話要負責今日的早餐,材料仲要同老師教的一模一樣。
麵包指定要綠色的蜜糖雞蛋生命麵包,加上火腿、芝士、生菜同埋蕃茄,一樣都唔可以少。
麵包要切皮,再放上其他材料~
個樣真係幾靚架,而且好好味。
完成第一份三文治
開餐喇~多謝逸逸為我地預備早餐。
除咗食三文治,我的早餐當然唔少得咖啡喇,今次飲妹妹從台灣帶給我的手信。
食完三文治再食沙律,好FRESH~
本來逸逸話今朝要同我玩,例如我地露營的例牌活動放風箏、打羽毛球、畫畫之類,見我仲未食完早餐就自己落去遊樂場玩住等,結果就同成班小朋友玩得好開心,玩到唔捨得返嚟~
於是我就好好享受我的ME TIME,首先去EXPLORE下個營地。
前面的是有冷氣的印第安營,後面的則同是有冷氣的圓拱波波營。
入面有晒床同埋傢俬,外面又有桌椅和小花園,夏天來就一流﹗
對面高起的是冷氣和風小山屋
行下行下仲見到有古蹟添~
行返出去近入口附近,有一間好靚但係沒有營業的CAFE – 叫做bbf不是咖啡店,旁邉有一個閘門話係養蜂場,打算入去參觀一下,結果原來係一個類似CANTEEN的地方,好多人在吃早餐,估計是牧緣田里供應早餐的地方?
園區仲有好多不同的果樹
逸逸掛住同小朋友玩,每次返嚟只係飲啖水又走。
我就畫咗幅畫,今次都係寫生,我真係望住依棵花同埋依隻蝴蝶嚟畫架~
畫完畫就開始加入恆仔收拾的行列。
突然發現原來我們的帳篷前竟然有一株怕羞草。
逸逸終於又走返嚟,話有個姐姐帶隻狗仔同佢地一齊玩,叫我落嚟一齊睇。我幫逸逸問姐姐可唔可以同狗仔影相,估唔到姐姐仲教逸逸抱住狗仔影相,逸逸超級開心。
叫逸逸幫我影返張相,今次我地都帶咗係沖繩買的吊床嚟,可惜無位掛。
又係好靚的花
夠鐘返屋企了,又係恆仔先行行兩轉拎部份物資上車,第三轉我地三個一齊拎終於搬晒所有嘢上車。
我地駕車去以前間中都會同事嚟食午餐的金壘餐廳吃午餐,原來依家價錢比以前貴咗好多。
不過食物味道唔錯,環境又舒適,作為假日悠間地享用午餐的地方都唔錯既。