成班小朋友玩完水,我陪逸逸去沖完涼換件衫之後,逸逸又再同小朋友去遊樂場玩,我又再次獨自上路去探險。
今次決定要去EXPLORE一下馬路另一邊的沖繩綜合公園。
原來對面都有個湖,好靚,不過我又收到CALL召我返去,又有好嘢玩。
於是我就急急卻散步返營地,一直行到尾就係海喇~
返嚟有咩玩?原來係劈柴呀﹗依個工具之前睇台灣綜藝《光露營就很忙了》都見過架~
小朋友一人拎一舊木排隊輪流劈柴,DEREK爸爸好好,一直協助小朋友等佢地可以成功將柴劈成兩半。
其實都唔容易,由其對於無乜力的逸逸~
想睇逸逸劈柴的過程請按上圖。
小朋友排咗N個ROUND個個都劈咗N次柴仍然樂此不疲~
我地平日睇韓國綜藝睇劈柴睇得多,但係咁大個人從來都未試過,咁有趣的事我同恆仔都梗係要試下喇,
劈完柴就開始煮飯任務,今日大家要合作煮今天的晚餐。早上同其他媽媽傾計講到今晚要煮飯好膽心,平日無乜煮飯的我其實真係幾有壓力。最弊係逸逸仲好大聲咁講:「我媽媽煮嘢食好叻架﹗」,攪到我滴晒汗,哈哈~
不過,女兒永遠覺得自己的媽媽最好又真係好心甜既。
小朋友每人負責一道菜,依家排隊抽簽。
究竟逸逸抽到負責煮乜嘢?我都好緊張。
開估:今晚我地負責釜飯同埋燒雞肉串,好彩好簡單,仲要有埋食譜,安樂晒。
首先要搵齊我們的食材
因為雞肉串未送到嚟,我地先煮釜飯,其實就係加了味素的飯,SOPHIA特地買了釜飯鍋增添儀式感。
首先要洗米
恆仔負責生火,係呀~我地今次露營完全無平日我地露營用開的GAS爐,所以要食飯就要生火,今日我地比起昨晚BBQ多個選擇,除咗用炭之外,仲可以用剛剛劈的柴都可以。日本的炭精好勁,不過都係要煸風是透得著炭,依個年代梗係唔再用報紙,恆仔學咗李瑞鎮用風扇助燃,真係舒服好多。
因為個鍋其實好重,我地都花咗唔少心思先成功放係火上面煮。
有家庭負責串燒
有家庭負責炒麵
亦有家庭負責豆腐麵豉湯
我地終於可以開始烤雞肉串了﹗燒到外脆內軟真係好好味﹗
今晚晚餐好豐富,串燒都有幾款,另外仲有炒雜菜、牛油煙肉粟米同埋烤蕃薯。
我地個釜飯完成了,大成功,味道ICHIBAN﹗
いただきます,我唔客氣喇~
今晚仲有營火晚會,中間嗰舊木係《搖曳露營》都出現過架,不過唔記得咗叫咩名。
氣氛好正
大家係度燒棉花糖
平日唔太鍾意食棉花糖的我都唔可以錯過
突然SOPHIA拎住滴滴金煙花出嚟,原來明天和後天是AIDEN同佢爸爸的生日,大家同佢地唱生日歌慶祝。
仲有生日蛋糕食添~
食完蛋糕又要趕去沖涼喇,今日為咗節省時間我同逸逸一齊入去沖,大家都成功3分鐘內沖完仲有少少時間剩可以享受一下淋熱水的舒適。
小朋友要約埋一齊去刷牙
今晚都係好多星星呀~
今晚我裝咗個觀星APP,不過都唔係咁識睇。
逸逸真係好怕熱,本來已經瞓著咗,後來紥醒咗之後覺得好熱瞓唔返開始係度喊,為免嘈到其他人,我帶咗佢出外面坐咗陣,吹下晚上的涼風冷靜返個人先可以再返入去瞓覺。
估唔到依個瞓唔到覺媽媽陪佢出去坐下吹下風成為逸逸今次露營其中一個重要的回憶呢﹗