今年係真正的復常，逸逸的主日學在11月已經迎來第一個戶外活動日，二年級或以下小朋友歡迎家長陪同，我和恆仔也一起參予。
今日的目的地是童話世界農莊，原來英文係Cinderella Farm，係等旅遊巴的時候邵神父同大家傾下計，佢形容依度係沒有Cinderella的Cinderella Farm，有小朋友問見唔到Cinderella，會唔會見到Cinderella的男朋友？
我們的PACKAGE非常豐富，有飼料券、龜魚糧、地圖尋寶蓋印紙同埋夾公仔機幣，大人同小朋友仲分別有拼圖禮物同埋手繪陶瓷帶返屋企添﹗
先影大合照，之後就自由活動時間了。
信德2班的小朋友集體行動，一齊睇地圖，一齊決定目的地，一齊搵路，好開心。
依度地方唔算好大，不過玩意都算多元化。
首先用飼料券換咗一盒提摩西草用來餵馬仔，逸逸都係第一次餵馬仔咋。
本來諗住去到餵羊的地方再換飼料，原來剛才的提摩西草仲可以用嚟餵埋羊仔同兔仔，而且只有馬仔個邊有得換，於是我即刻跑返去剛才馬仔個度換多盒草返嚟俾逸逸餵羊仔。
依度啲羊好惡，我地仲見到有兩隻羊向住對方跳起用角打交，但逸逸大喝一聲「唔好打交」就停咗﹗
經過龜池就餵龜糧，不過啲龜好似唔係好肚餓。
剛才餵羊仔餵咗半盒草，淨返半盒用嚟餵兔仔，但係兔仔唔太肯食草，因為太飽定揀飲擇食？明明大棠的兔仔食紅蘿蔔食極都唔夠架喎~
去到魚池成堆魚仔都對魚糧無興趣，明明魚係唔知飽架？
來到小朋友不能抗拒的充氣彈床，成班小朋友衝晒上去瘋狂放電，同朋友一齊玩真係特別開心。不過原來都有小朋友唔鍾意玩充氣彈床，就覺得上到去企唔穩所以走返出嚟。
逸逸玩充氣彈床時我自己都享受下大鞦韆
依度好多打卡位，我都周圍影下相，同埋用埋最後一張飼料券換牧草餵馬。
原來餵馬好攪笑，佢地個嘴壓落嚟都幾大力。我去的時候只有我一個係度餵，職員仲主動叫我摸下隻馬添，佢地好乖架~
依度有啲展板介紹馬的冷知識
馬蹄鐵工場工具展示
返到嚟仲玩緊，直到時間差唔多，提佢地再唔走就趕唔切去夾公仔先肯走。
我地一家三口總共有十二個幣，任由逸逸自由揮霍。
結果逸逸竟一擊即中，勁﹗所以佢分咗少少幣俾夾唔到的朋友仔。
逸逸又主動想分一個俾邵神父，結果俾邵神父整估。
將個幣貼咗係逸逸額頭上面，哈哈~後來再玩埋淨返的幣都夾唔到公仔了。
臨走影下哈比村，本來我都覺得佢似模似樣，不過返屋企比對返當年去紐西蘭HOBBITAN的拍攝地ALEXANDAR FARM的HOBBIT HOLES，其實相差好遠。
之前一路玩一路蓋印，最後可以換小禮物。
可以揀靚靚的筆或者萬字夾
原來近門口位置仲有兩種特別的動物可以觀賞。
佢叫做無毛貓，好似假咁，不過係真架~
佢地係熊貓羊，有個姐姐仲分咗少少牧草俾逸逸餵羊呀~
返到聖堂參加星期六提前彌撒，邵神父講道時提醒我地天主創造的世界蘊藏着天主的智慧，所以周圍都可以找到天主的智慧。