一齊玩完小遊戲，大伙兒開始要預備晚餐了﹗
大家都紛紛去SOPHIA個度領取今晚BBQ的每物資。
每兩個家庭SHARE一個爐，我地同AIDEN家一齊BBQ。
生好火之後，AIDEN爸爸首先煲水，見到佢帶來的水煲，我就懊惱自己點解唔帶埋係大阪買的新露營水煲嚟，仲有逸逸張新露營椅……
我地預備食物的時候，小朋友去遊樂場繼續玩，日歸的小朋友已經走得七七八八，公園依家已經歸於平靜。
依個係逸逸的城堡，她特地要帶我上來看看。
逸逸玩飛索坐唔到上去，拉住吊起雙腳滑過去一樣咁好玩~
已經SET好晒架步
有人嚟探班呀﹗就係今朝我們玩陶瓷體驗的店主，他們特地將我們的作品送來，還帶埋他們的小狗狗來散步呢~
我們的晚餐非常豐富，我個人覺得多春魚特別正﹗AIDEN爸爸又請我們吃炒菜心、魚塊、秋葵，我們又回請他們吃多春魚、香腸和雞肉丸，基本上係大家的食物都分著吃，令晚餐更加豐富。
不過為了貪方便而買的幾款醃菜反而麻麻地，太酸~
至於逸逸一如我們所料，晚餐只吃了腸子和麵包，不過除了因為大病初癒而胃口麻麻地之外，更大的原因係掛住去同小朋友玩。
主角嚟喇~就係燒和牛，我們今次和AIDEN一家買了同款和牛，不過他們買的份量是我們的一倍~依六片牛真係超級好吃，我覺得簡直比得上我們在大阪吃了30,000円的神戶牛。
小朋友已經聚在草地上面一齊玩，同埋話好想去探險喎~
於是我同DEREK媽媽帶住幾個小朋友去探險。
小心地下的毛毛蟲
其實都唔係行咗好遠，唔知係咪因為氣氛關係，兩個男孩子一邊行一邊猛咁話驚好想返轉頭，彤彤昕昕就少少驚但又好想挑戰一下，反而最勇敢的係平日好細膽又怕黑的逸逸堅持話要繼續行，係我們兩個媽媽鼓勵之下大家定咗個目標一齊行到去就折返，去到之後本來DEREK媽媽想再行遠啲DEREK即刻抗議，於是大家唯有返去大本營。
聽彤彤講原來貓同狗係沖繩有極大的差別待遇，沖繩周圍都好多貓，大家都習以為常，但係如果見到流浪狗就一定要通知政府捉咗佢地架。
另外，原來沖繩有好多蝙蝠架﹗夜晚雀仔已經瞓晒覺，所以晚上如果見到天空飛過的就係蝙蝠嚟架喇，我諗我剛才有見過蝙蝠……
返到去營地，大家突然驚覺已經8:45PM，去到9:30PM就無得沖涼喇，於是媽媽們立即帶班小朋友去沖涼。雖然啱啱恆仔先燒緊最後的豬肉片，唯有沖完涼先食。
沖涼環境好乾淨，熱水都好舒服，我同逸逸都分別係3分鐘完成沖涼，仲可以嘆多十幾秒先夠鏡，不過最驚嚇的係剛剛入到去時浴室有隻田雞，逸逸超級驚，不過我諗隻田雞仲驚，好快就走咗了。
出到嚟見到大家係個草地圍住睇嘢，原來係隻蟹﹗其實我地依度好近海邊，唔通佢迷路？
返嚟食埋啲豬肉，晚餐就告一段落，坐低抬頭一望，沖繩的星空真係好靚~
9:30PM逸逸就話眼瞓要瞓覺，佢係成班小朋友入面最早瞓既一個呀﹗我地都係第一次無冷氣之下夏天去露營，帶備咗幾款風扇。
怕熱的逸逸除咗身邊的紫色風扇之外，仲要加埋白色風扇直接吹住個頭先瞓得著覺。其實恆仔都要攬住個風扇先瞓到覺，最唔怕熱係我，心靜自然涼嘛~
逸逸瞓咗覺我地就坐返出嚟坐下傾下計，其實沖繩的晚上都好清涼，坐坐下著住背心短褲的我仲有少少凍添~
可以望住個草地發呆真係好正
越夜越靚的星空，只係用I-PHONE影都影到超多星星。
露營就要食杯麵，無帶水煲的我們要問營友借，又再懊惱點解無帶個新水煲嚟~
美味的咖哩杯麵，好正﹗仲引到另外兩家人都食埋一份添~大家果然做購物任務時都好認真，無買漏嘢。
係沖繩露營真係好舒服~