二零二三年六月二十一日(星期三)
自從疫情之後老爺一直都無返過鄉下，成日心掛掛住鄉下的屋企人，所以趁六月逸逸成日都唔駛返學，我地一家三口就陪老爺一齊返鄉下。
老爺的鄉下在塘廈，逸逸第一次去，我也是自剛結婚時返鄉下擺酒去過一次之後都無去過，仲記得當時係羅湖過關然後有親人駕車接我們過去，以前老爺自己上去就係羅湖轉大巴。但係我一諗起要去羅湖就很頭痛，除了過關的人超級多之外，深圳羅湖區也是非常混亂，總之印象非常差，近年我也只會選擇在深圳灣或落馬洲過關。
上網搜查一下羅湖以外的交通選擇，原來依家東莞有高鐵到，而高鐵的東莞南站正正就是位於塘廈附近，就決定搭高鐵了﹗
早上我們搭的士由屯門出發，先去尖沙嘴接剛剛飲完茶的老爺，再直駛高鐵站。不過去到高鐵站後發現原來高鐵站的停車場有泊車轉乘優惠，如果即日來回或兩日一夜，自己駕車比搭的士更化算。
CAPTAIN GO咁可愛既？
去到高鐵站先食早餐，食完早餐先發覺原來依家高鐵站係無垃圾筒架~
今次係我們第二次搭高鐵，周圍的環境都同四年前唔同晒~疫情後還是第一次返回內地，現在進入內地要先上網申請又稱為黑碼的健康碼，因為恆仔有微訊帳戶，就由他負責幫大家處理。
過關的人很多，我們花了40分鐘才終於來到候車大堂。
我們乘搭10AM的班次，15分鐘前先開始可以入閘，所以閘外排了長龍~
我地要搭高鐵喇~
上次仲係坐我大脾，今次就已經要買票，自己坐一個位了。
沿路風景跟香港很不一樣，在香港好少機會見到咁多條路軌並排~
內地的高速公路風光
今次見到的最高時速係190km/h，睇返好似唔夠上次快喎~
大約40分鐘就來到東莞南站了，周圍都是荒蕪一片，聽說以前這兒是荔枝園，恆仔的堂哥駕車來接我們。東莞南站大約位置就在塘廈和樟木頭中間，原來去康湖都可以坐高鐵。
今天的節目就是探親戚，先在其中一個親戚家吃午餐，明天就是端午節，所以也順道聚在一起做節，午餐之中其中一道菜是炆脆肉鯇魚，魚是從自己的池塘捉上來的，真的超級美味，滑得來有嚼勁，瓜菜也特別清甜，跟平日在香港吃到的不一樣，他們說疫情期間也可以自給自足不愁沒有東西吃。
最後總共去了三個親戚的家，因為老爺是老么，所以我們包括逸逸的輩份都很高，唯一一個家庭屋企有玩具，那些玩具是逸逸堂哥女兒的，叫做有得玩一陣，好彩我地帶咗遊戲機，大人傾計時逸逸可以打下機無咁悶。
仲有一件有趣的事，就係我地拜訪老爺的哥哥，逸逸忍唔住話乜佢地咁似樣既﹗平日就算係主日學的孖仔同學，逸逸都話好分到佢地，只係唔知佢地邊個叫咩名咋嘛，由此可見老爺同哥哥真係超級似樣。
東莞盛產荔枝，而六月又正值荔枝的季節，所以我們去到每一個家庭都拎荔枝來招呼我們。
臨走堂哥話要送我們荔枝，帶我們去了一個荔枝園，說請朋友留了荔枝給我們。
雖然沒有親手摘荔枝，都叫做讓逸逸看看樹上的荔枝。
大家都是一箱箱荔枝當手信~
我們也是搭高鐵離開，東莞南站的候車大堂很冷清，也沒有餐廳，只有兩家貨品唔太吸引的小賣部，我帶住逸逸逛完小賣部之後就叫逸逸記住想要的東西後帶爸爸來付款，因為恆仔先有微訊支付。其實上網睇資料都話好多內地店舖都可以用香港支付寶，不過內地店員樣子實在太冷漠，我連問都唔敢問……
又是開車前15分鐘才開始可以入閘，入閘全是自助閘機，只是旁邊有一個職員在協助。因為要SCAN証件入閘，但係老爺動作太慢，都未拿回証件閘口已經關上，結果要突出重圍走去職員個邊處理，而期間大家有趕住入閘，有點狼狽。
返到香港，過內地關口時先突然發現原來離境都要健康碼，好彩只要修改自前的記錄就可以重新GENERATE個QR CODE，唔駛所有資料重新入過。
今次帶左一大堆荔枝返香港，粒粒都又甜又飽滿，而且核好細粒，真係好好味，果然產地出品真係特別正﹗