二零二二年十一月五日(星期六)
星期一晚來了一趟快閃迪士尼，當然唔夠喉，所以在接著的星期六我們又來喇~
今天真幸運，一入園就預上了美人魚ARIEL同埋長髮公主樂佩。
逸逸真係好愛小小世界，明明星期一都有玩過，今日第一個要玩的竟然又係小小世界，由好細個開始每次去到RAIN FOREST都叫我用手幫佢扮擔遮，不過最近話唔駛喇，因為有耶穌叔叔幫佢擋雨喎~
當KIKI遇上跳跳虎，究竟邊個興奮啲？
跳跳紥的跳跳虎
真係好活潑可愛
之後我地又遇到TINKERBELL同埋翠絲
我們來到灰熊山谷。
其實逸逸係四月的時候已經夠高玩灰熊山極速礦車，但當時去到門口都係太驚唔敢玩，之後再去了好幾次迪士尼都無再提，今次終於鼓起勇氣去玩了。
迎接新挑戰
好緊張要媽媽拖住
終於挑戰成功喇~
逸逸一向唔太驚刺激的玩意，但好怕突然有聲或者有嘢跳出來的東西，所以對於她來說SPACE MOUNTAIN和小熊維尼，總對是小熊維尼比較可怕。玩灰熊山極速礦車之前逸逸都問過我入面有無會動的東西，憑我的印象真的只係會見到熊爸爸、熊媽媽同熊BB，因為FOCUS通常都係其中一段模擬纜索斷裂令礦車急速倒行的快感吧﹗點知沿路原來熊是會動的，然後還有大量的燈光和聲效，仲有爆炸添，簡直令我一邊玩一邊心虛，因為我知這些都是逸逸會怕的玩意，果然返落嚟的時候逸逸就一直嚷著說我騙佢，我好無辜地說：我真係唔記得咗嘛~
雖然已經過了萬聖節，還是可以欣賞《惡人舞動迪士尼》，其實已經過晒午餐時間，我地一邊排隊一邊食烤魷魚和腸仔頂下肚餓先。
整體演出跟去年的差不多，內容也記憶猶新。
我也記得去年也有看到這個HOOP的演出，當時覺得真係超級厲害，經過咗一年學習空中瑜伽，演出者雖然厲害但動作也是我有在學的，分別只是他用HOOP我用布，以及他吊得比較高。
逸逸今次用她自己的安心出行電話做電筒星星特別興奮。
今年跟去年最大的分別就是其中一段由《101斑點狗》嘅庫伊拉變成《睡公主》的黑魔后。
仍然覺得好好睇
由食午餐變咗食下午茶，我地去咗美國小鎮大街的牙醫診所附近坐低食嘢，幫逸逸點咗個LINABELL窩夫~
我同恆仔就幫趁大街餅店食包，味道都好唔錯。
一邊食一邊欣賞小朋友的演出
跟住逸逸話要去睇奇妙夢想城堡故事展，每次都要睇好耐，因為太多互動玩意了。
咪就係依個城堡囉~
跟住去玩逸逸稱之為發夢的鐵甲奇俠飛行之旅
然後就去玩俠與黃蜂女：擊戰特攻射槍槍
最後行埋舖頭
臨走仲順便睇埋小火車巡遊添呀~