二零二三年三月四日(星期六)
自從去年六月第一次睇咗迪士尼最新推出的多媒體夜間城堡匯演 – 「迪士尼星夢光影之旅」之後，真心覺得超級精彩，當時已覺得如果可以企前啲睇就好了。
後來迪士尼推出了火箭餐廳甜品自助餐+迪士尼星夢光影之旅特別觀賞專區入場的套票，有一次有衝動想即場購買套票，但因為正值炎夏但自助餐只剩下室外位置，硬是覺得付了錢還要熱很不化算，所以當時就此作罷。
後來迪士尼又換了PACKAGE，今次改為冒險家半自助餐+特別觀賞專區入場，正正經經享用晚餐然後睇SHOW確實更加吸引，於是趁住逸逸剛剛考完試，就約埋還未看過夜間城堡匯演的爸爸媽媽一齊去迪士尼玩返晚。
為了保留體力，我們決定吃過午飯才入園，不過兩婆孫未入園已經跑到興高采烈，今晚夠唔夠力玩到咁夜架？
逸逸話佢幫迪士尼賣廣告喎~
每次經過火箭餐廳都會係外面的火箭HYPER一番
終於可以正正經經影返張相
星期六入場的人好多，排隊都要等好耐，第一樣我地去玩的玩意就係蟻俠與黃蜂女：擊戰特攻﹗上星期才跟朋友來過迪士尼的媽媽都話好鍾意玩。本來逸逸話要同婆婆坐，但係公公為了嗲個孫表演出未玩過有啲驚的樣子，最後好有愛心的逸逸決定要陪公公坐保護公公，真係不得不讚下我個女真係好SWEET。
之後我地去玩鐵甲奇俠飛行之旅，逸逸繼續坐公公隔離保護公公。
排隊的時候逸逸提議話想食雪條，公公主動話請客，逸逸竟然問公公：「你帶咗雪條嚟？」因為係逸逸心目中，公公每次請食雪條都係屋企的冰箱拎出嚟架。
逸逸好主動咁話想食史迪仔雪葩，佢竟然記得自己上次食過米妮雪條，話下次要食勞蘇雪葩喎~其實你再之前都已經食過史迪仔雪葩。
食完就去城堡前面睇迪士尼尋夢奇緣，今次爸爸還是第一次欣賞，逸逸睇到載歌載舞。
但係城堡SHOW的出事率真係好高，上次睇迪士尼米奇與好友聖誕舞會就因為音響問題腰斬，今次就係玩轉極樂園隻神獸返唔到入去。
好彩問題好快解決咗，順利睇晒成個SHOW。
時間剛剛好，睇完SHOW就等睇遊行，我地好好彩搵到個靚位~
首先係銀樂隊
跟住係迪士尼四大美人，逸逸話公主睇佢唔到好失望~
又係依架迪士尼火車
今次有啲驚喜，因為米奇佢地換咗慶祝迪士尼100週年的新衫亮相~
我地仲第一次見到幸運兔OSWALD添﹗
壓軸嘉賓係POOH POOH、PIGLET、丁滿同埋拉飛奇，每次見到PIGLET都覺得佢紅得好唔自然。
丁滿同埋拉飛奇擺晒POSE影相
之後我地去玩森林河流之旅
又係歷奇噴水池瘋狂一番
本來想去玩轉轉彈弓狗，點知要排50分鐘，我地無咁多時間，所以行下舖頭就算了~
只有兩吋高的逸逸
我地6:15PM準時去到大冒險家餐廳吃晚餐。
我們的晚餐包括自助頭盤、沙律、餐湯、麵包、甜品及飲品，再加自選主菜一款，以非常豐富。以迪士尼本身的物價，這個價錢包埋專賞區入場，我覺得好值得試下。
每人一杯發光蜜桃汽水，我們特地留待帶走先飲，不過平日飲好少水的逸逸竟然咕嚕咕嚕的在餐廳就飲晒，燈光的魅力真係好強。依個發光杯晚上拿著它在園區遊走好吸睛，還有遊人向我查詢它的構造和發光的原理呢。
精緻的頭盤，比午市半自助餐更加多樣化~
主菜我們四人都點了烤牛肋肉及香煎帶子伴南瓜薯蓉醃洋葱配砵酒燒汁，份量唔會太大，非常好。
逸逸的兒童餐就無得揀，一定係魚漢堡、炸薯條、燒汁雞髀、牛油粟米和啫喱。
甜品都好好味，食得超級超級飽~
食飽就慢慢散步過去城堡預備睇SHOW。
不過都係一邊行一邊玩
又影下相
逸逸第一次拉灰熊山谷的大水桶，佢話自己好頑皮喎~
憑手帶進入超正的特別觀賞區，職員檢查得好嚴格，我們四個大人已展示了手帶，也要確認逸逸的手帶才放行。
一繩之差都係超級靚位，不過要好早就過來留守等候。
我們的位置旁邊樓梯還有幾行梯級坐位，只有大約10個人，應該是VIP之中的VIP，聽到分別有兩組旁邊的人都說那個位置要$18,800，唔係呀嘛？
演出8:30PM開始，8:23PM逸逸同我講想去洗手間，職員話8:25PM就唔可以返入嚟特別觀賞區，唯有忍喇~我都同佢講忍唔住都無辦法，都要出去去廁所架喇~
開SHOW喇~
靚位真係唔同，立體光雕投影、水幕投影、激光、噴泉水柱、火焰、煙花及音樂，所有效果都一覽無遺，非常震撼，而且不用人擠人，逸逸自己可以站在地上都可以看得一清二楚，不用抱起或騎膊馬都不會被人阻擋視線，真的絕對值得花錢睇一次﹗
睇完SHOW即刻9秒9衝破人羣帶逸逸去廁所，最後力保不失，終於可以鬆一口氣。