二零二三年一月二十八日(星期六)
昨晚靠住暖包放係腳邊，再用羽絨蓋一蓋上身，我們的15度睡袋成功戰勝咗寒風，逸逸仲熱到晚上要除返一條褲。另外，上次換咗個新枕頭已經瞓得好唔錯，唔知係咪加埋十二月時係韓國瞓咗幾晚地習慣咗，昨晚竟然瞓得超級好，瞓到8點幾先起身。
朝早起身時已經有返9度，加埋有太陽曬住，完全唔覺得凍。
一起身就要玩，刷完牙洗完臉連早餐都未食，就話趁無乜風要打羽毛球。
睇完搖曳露營，恆仔都話露營要食咖喱麵喎~個咖喱麵係昨天早上特地叫DELIVEROO送上門架。
煲一煲水可以一次過淥杯麵同埋沖咖啡~
天氣凍食熱辣辣的合味道咖哩海鮮杯麵真係好正﹗
竟然連逸逸都食到？下次要預備三個咖喱海鮮杯麵先得喇~
恆仔同逸逸食完麵，我飲完咖啡，就開糸煮今朝真正的早餐，逸逸就乖乖坐低畫下畫。
今朝我預備咗煎腸粉
原來依款鐵鍋煎腸粉超級正，可以煎到個皮脆卜卜，屋企個易潔鑊完全無得比。
加埋今次特登買嚟配腸粉的甜醬同埋甜豉油，真係好好味呀~
食完早餐逸逸繼續完成她的創作
我都可以休息一下
之後又係陪玩的時間，因為太大風玩唔到羽毛球，所以我地踢下波……
同埋玩閃避球，逸逸閃到埋草叢堆好誇張。
又玩下又執下嘢，好快又肚餓。
今次到我食我個杯咖喱海鮮杯麵，依啲咁高卡路里既嘢，真係出去玩先會食架咋﹗YUM YUM~
我地隔離營的夫婦嚟玩三日兩夜，所以今朝唔駛怱怱忙忙咁執嘢，仲駕車出咗去一趟唔知係去行下定食早餐。見到佢地咁悠閒，我都好想有機會挑戰一下三日兩夜的露營呀﹗