自從我開始學習空中瑜伽之後，一直都好想搵下有無可以帶埋逸逸一齊玩的親子空中瑜伽，終於發現咗YOGA DREAMS係聖誕節搞左個親子空中瑜伽工作坊，適合5-9歳的小朋友參加，於是約埋妹妹曉曉一齊參加。
YOGA DREAMS位於屯門中央廣場，個VIEW一流，可以睇到無敵海景。
今次工作坊全長1個半小時，有6對母女參加，一開始就每人派一頂聖誕帽，增添節日氣氛。導師帶埋女女做小助手，既幫手做示範，又幫手影相，好乖。
首先做一啲地面瑜伽動作熱下身，不過印象最深刻的是成班媽媽圍圈做DOWNWARD FACING DOG，然後成班小朋友係下面玩火車捐山窿，好搞笑。
其實5歲的小朋友玩空中瑜伽好似有啲勉強，特別係大小肌肉都麻麻地的逸逸，手腳都好似唔識用力咁~
依個係聖誕襪，大個啲的曉曉表姐就做到，逸逸就搞唔掂。
唔緊要喇~等我做然後坐上嚟影相喇~
依個星星其實都係我做完然後由老師抱逸逸上來一齊影相~
唔記得依個咩名堂，表姐做得好靚~
依個蝴蝶就反而逸逸做到表姐做唔到，因為其實係高難度動作，逸逸輕磅，靠住我搬搬抬抬反而做得靚靚~我自己都做唔到，哈哈~
今次整體的感覺都唔錯，可以同逸逸一齊玩瑜伽真係好開心好溫馨，不過力度一定同自己去玩唔同，搬搬抬抬仲累過自己玩。逸逸應該成功感唔太大，不過佢好ENJOY今次親子空中瑜伽，仲不時問我幾時再有得去玩，等我留意下喇~