二零二一年二月二十八日(星期日)
去年聖誕趕不及再去看一次聖誕樹亮燈就因為疫情的關係要閉園,再次宣佈開放已經是今年的2月19日了。迪士尼重開的第一個週末還是農曆新年的特別日子,奇妙處處通金咭會員未能入園,所以再多待一個星期我們就來了。
今次樂園重開,除了要預約入園之外,預約時仲要填埋入園者的個人資料,代替登記安心出行。
排隊入場中。大家都很久沒來,雖然說防疫措施是控制入園人數在50%,但仍然感覺到今天遊人真的很多。
久違了的迪士尼樂園
逸逸最近在婆婆屋企睇左小飛象電影,所以今次入園第一時間就要先玩小飛象。
仲要坐埋假的小飛象影相添。
下一站是旋轉木馬,最近每次逸逸都要幫馬仔改名,今次逸逸的馬叫玫瑰,我的叫格仔,恆仔的叫宋兔馬(RUNNING MAN上腦)。
之後就去玩小小世界,逸逸的儀式是玩小小世界一定要拎相機。
我地竟然見到愛麗絲呀~
每次都唔可以錯過的轉轉杯
再次挑戰蜜糖杯,今次逸逸同爸爸坐,唔駛再烏底身,長大了4個月的逸逸果然勇敢左。
嘩﹗今日食飯好多人排隊呀~偉大的爸爸負責排隊,本來我諗住帶逸逸去玩彈弓狗消磨時間。
點知彈弓狗都好多人,於是帶逸逸去影下相。
同埋逛下商店
終於有得食喇。今次樂園重新開放之後,食肆加強了管制,不再是自己搵位,而是在外面排隊由職員帶位,咁既做法都有好處,唔駛企係人地後面等位。
食完飯就去玩返彈弓狗,逸逸擺晒POSE影相。臨上車之前,職員同我地講:為安全起見,公主盡量坐入面或坐中間……好彩我個女好理性,佢會話:「點解佢會以為我係公主?我扮架咋」雖然依個講法令到成個EXPERIENCE好夢幻,但係小朋友好容易真係以為自己係公主,哈哈。
我地又見到翠絲、巴斯光年同埋綠色士兵,今次樂園重開多左好多迪士尼朋友出嚟同大家見面喎~
逸逸書包方便佢拉拉鏈的ELSA爛左,恆仔叫逸逸今日揀一個新的,逸逸好快就揀左近期至愛 — 小飛象。可惜返到屋企先發現這個小飛象的掛鈎設計好易甩,唔適合做拉鏈的輔助……
下一站去玩IRON MAN
今次見到美國隊長同埋黑寡婦
係舖頭我終於忍唔住買左睇中左好耐的IRON MAN泡泡機,真係好有型﹗
之後係玩飛碟
再ENCORE小飛象
仲玩埋米奇幻想曲
入夜的城堡襯埋MERRY GO ROUND真係好FANCY
15週年裝飾
玩到夜晚7:30PM才回家,真的算是盡興而歸了。