因為新亞餐廳於11月尾結業,早前已經寫了一篇NA CAN的回憶,後來我亦趁安排到時間,於結業前兩天回了中大與NA CAN告別。
我還是第一次駕車回中大,熟悉的路段,往日經過都是坐校巴和走路,今次自行駕車,感覺很奇怪。
直接前往NA CAN
熟悉的外觀,但入面已變得不一樣。我來的時候剛巧遇著轉堂時間,排隊買飯的人很多,我決定先周圍逛一下再來。
令人懷念的志文樓
每次來都覺得很美的合一亭
當年宿生例牌吹水位:大鐘底,唔知依家仲係唔係呢?
圓形廣場擴建工程經已完工
落本部行下,好彩仲記得點行MMW落去。
寬闊的百萬大道,下次要帶逸逸黎跑下先得。
經過MED CAN,竟然有檸檬批賣,當然要買一件懷念一下,我想講賣檸檬批俾我的阿姨好眼熟,唔通仲係我讀書時個阿姨?
檸檬批味道好FRESH,不過個粟米片底濕濕硬硬已經唔脆,今次見到的檸檬批只係得兩三件放係雪櫃,可能係擺得太耐之故,以前讀書時直接係個大盤即切即食好味好多。
返去NA CAN食午餐,成個NA CAN裝修擺設已經唔同晒,也沒有看到熟悉的臉孔,所以對我來說最有感覺的就是這塊牌匾。不過,話晒我已經畢咗業18年,如果一樣其實仲恐怖,
至於兩餸飯同紅豆冰的味道真的不敢恭維,餸只係微暖,飯有點硬,紅豆結成一舊好難攪開,我想講我公司CANTEEN好食啲(滴汗)。
點都好喇,今次來沒有想過可以回味什麼美食,只是想靜靜的來與大學時代的飯堂 – NA CAN道別。