NA CAN今個月尾結業的消息鬧得熱血沸騰,新亞校友會還搞了一個「NA Can最後一夜:新亞餐廳歡送晚會」,仲要唔駛半日180個名額已經滿咗。
其實我根本沒有想過,今天NA CAN的OPERATOR仍然係我讀YEAR 1時的OPERATOR,今天的餐廳經理仍然係我讀YEAR 1時的鄧經理。
對上一次返NA CAN食嘢已經是2006年,當時因為剛巧係附近工作所以上咗去食午餐,仲記得因為無我當年最鍾意的燒雞髀飯而食咗雙餸飯,仲覺得食物真係幾好食,點解讀書時唔覺得好食嘅?個時可能都仲未係畢咗業好耐,加上住咗三年HALL,NA CAN入面有個姐姐都仲認得我。
其實飯堂對於住HALL嘅人黎講,就係唔會在乎有乜嘢食同埋好唔好食,去食係因為懶得自己煮,咁懶當然行多步都懶,NA人梗係食NA CAN,所以唔難食就可以了。
講到NA CAN,當然不得不提O’CAMP就已經有組爸組媽爭相介紹的粟米斑塊反轉再反轉,示範表演係指定節目,還有那螢光汁咕嚕肉⋯⋯不過聽說那廚師已離任多時了,不過在任時正好就是我的大學時代。
另外還要學唱NA CAN之歌(調寄新亞校歌):
多多油 少少餸 新亞飯 夠晒硬 等出餸 兩個鐘 人人媽媽聲 鄧經理不會聽 真慘 真慘 這是我新亞餐廳
明明當年身邊的新亞同學嗰嗰都話唔想食NA CAN,但又繼續日日去食,畢咗業仲話要返去搵鄧經理寫圍菜做Gathering,NA CAN的回憶可能就係食開有感情的那一份人情味吧!