二零二四年二月二十五日(星期日)
今日又跟公司康樂會去玩，今次係由香港觀鳥會主辦的新界魚塘節嘉年華。依個活動已經來到第九屆，但係我以前從來都未聽過，如果唔係公司組團去都唔知有咁有趣的活動。
活動地點在元朗大生圍村，我們在錦上路站集合，再乘搭香港觀鳥會安排的穿梭巴士入去會場。去到錦上路站派發活動注意事項時先察覺唔記得咗帶餐具，醒目的恆仔即刻去咗車站鴻福堂買咗一碗燒賣……
嘉年華會的節目好豐富，遊戲區、遊樂場、美食區和魚塘區散落在大生圍村的各處，每個家庭還有一張烏頭換領券，臨走可以帶一條元朗烏頭返屋企。
參與活動後就可以蓋印仔，蓋滿指定數量印仔就可以換禮物。
我們來到的時候主舞台正在進行開幕典禮
我們第一時間前往美食區，美食區有免費試食、付費美食攤擋，以及和食物相關的體驗活動。
每個參加者都可以免費換領一份鹽燒烏頭試食，沒想過我們一家三口就可以換到半條魚，結果我地個鴻福堂碗唔夠放，好彩工作人員借咗隻碟俾我地。鹽燒烏頭整得好好食，連逸逸都鍾意，依家烏頭已經成功晉身成為逸逸自己DEFAULT會食的食物了。
我仲忍唔住買咗溏心醉蛋嚟食，好好味，逸逸就買咗一大碗啫喱糖，YUM YUM~
我地要行返出去遊樂場預備參加12:30PM的漁塘導賞團，經過主舞台遇上翠翠子(普通翠鳥)與烏頭君(元朗烏頭)MEET AND GREET，我地又同佢地影返張合照先。
大生圍村是一條重置村落，所以村公所歷史沒有很悠久，建於1980年，村民的原居地就是現時錦繡花園的所在地，
工作人員為我們講解漁塘生態，介紹魚塘運作七部曲，包括校水、試養、放養、餵飼、收獲(俗稱刮魚)、曬塘以及剷塘。
點解香港觀鳥會咁著重漁塘保育？魚塘屬於人工濕地，由於養魚戶在「刮魚」時會先將水位降低，淺水的魚塘會吸引大量過境、越冬及居留本地的水鳥來捕捉刮魚後剩下的低經濟價值的雜魚。乾塘及曬塘時，鷸科及鴴科雀鳥可在露出的泥地覓食。另外，長滿植物的塘壆為秧雞科雀鳥提供藏身之所，魚塘也為眾多動物提供棲息及繁殖的地方，生物多樣性極之豐富，具很高的生態價值。
所以除咗講解魚塘生態，也有睇雀的環節，見到大小白鷺、黑面琵鷺等等，對於上個月才去過米埔觀鳥的我們來說有種溫故知新的感覺。剛剛在漁塘上面飛過的雀仔好似係東方白鶴……
剷塘進行中 – 由於塘底會積聚有害的微生物，養魚戶通常在旱季放乾魚塘內的水，待日光曬乾塘底，再以推土機剷塘，修理塘壆並回復其原來的深度，一般養魚戶每隔兩至三年便會進行曬塘和剷塘。
原來魚塘會養不同的魚不是為了生態平衡，而是因為土地問題，不同的魚在不同的水位生活，可以fully utilise個魚塘。
用推土機剷起塘底的泥便是塘泥。塘泥營養豐富，含豐富礦物質，密度高兼且重，可作為鞏固塘壆之用。另一方面亦較科學泥天然，可以用作種花及農作物之用，不少漁民亦會在塘壆上種植不同種類的果樹。
雀仔飛得好有隊型
路上拾到估計係普通翠鳥的羽毛，導賞員仲即刻拎本書出嚟比對。
參加完漁塘導賞，我地係魚塘區睇下有乜嘢好玩。
有參加者參加繪趣魚塘活動，在魚塘邊寫生。
浮duck起：遙控Decoy模型體驗
用一隻假的綠頭鴨，去吸引真的綠頭鴨，讓牠們認為魚塘安全可以在這兒停下來休息。為了觀察生態，有時會在假的綠頭鴨的頭上放置攝錄機。
Face Painting也是免費的，不過逸逸揀畫手，姐姐幫逸逸畫咗隻好靚的普通翠鳥。
之後我地要趕返出去遊戲區參加公司一早幫我地報咗名的毛球雀鳥BB製作。
毛球雀鳥BB其實係加了眼睛和嘴巴的毛球。
對於一個7歲的小朋友來說也不簡單，不過逸逸一直勇於嘗試，連工作人員主動叫我幫下手逸逸都想自己來。
佢係白胸苦惡鳥的BB
毛球雀鳥BB與普通翠鳥
已經2:45PM，仲未食午餐的我們返去美食區搵食，首先換左碗用本地羅非魚和鯇魚煲的魚粥，好鮮甜，不過無得ENCORE，因為它是免費換領的食物。
我仲食咗用魚塘蝦和本地菜製作的天婦羅、茶果、燒賣、腸仔、魚蛋、啫喱糖、豆漿同埋蔗汁，好好味。
逸逸用自己零用錢買咗一隻用飲管製作的蟋蟀，我又同農家買咗棵大白菜，真係特別爽嫰鮮甜。
我地報咗名參加要付費的傳統小食清明仔製作，清明仔即係「雞屎藤粿」，由在地婆婆預備好粉糰再由參加者整造型。
係蒸清明仔期間，我地返咗去魚塘區繼續體驗。
體驗割草，草可以用來餵魚。
我哋三個都有試吓，逸逸超鍾意用來影相的淡水魚公仔。
小朋友版由家長幫手的拋網體驗
真實版拋網體驗，有啲似擲鐵餅，可以按上圖睇下我拋網。
清明仔食得喇~依個茶粿入面加咗花生碎好正，依個RECIPE超級好味！
臨尾整埋襟章，恆仔揀咗大白鷺圖案。
今日真係有得食有得玩又有嘢學，其實好想玩整翠鳥黏土同埋學用葉子吹笛，可惜時間唔夠玩唔到。
依條就係嘉年華會帶返嚟的元朗烏頭，未劏未刮鱗，所以今次我絕對係技能解鎖。
為咗唔駛刮鱗，我整咗鹽焗烏頭，雖然略嫌唔夠乾，不過都算係整得幾好食架喇~