二零二三年十二月三日(星期日)
香港迪士尼的魔法奇緣世界終於在2013年11月16日開幕了。因為11月尾正值遇上逸逸學校第一次評估，踏入12月差不多每個週末都已安排了節目，這天是唯一還有點空閑時間的一天，當然要去阿德爾朝聖了。
還有一點空閑時間的意思是逸逸上午還是要學游水，學完游水吃過午餐來到園區其實已經2:45pm了。
今天的目標很清晰，只有新開的魔法奇緣世界，亦有晒心理準備排好耐隊，仲以為自己好醒咁好似上次去日本Universal Studio咁帶定櫈仔俾逸逸排隊時坐，點知原來迪士尼係唔可以帶櫈仔入場，職員Offer我哋可以俾$140拎張櫈仔做行李寄存，又或者幫我哋棄置，我哋梗係兩樣都唔揀，恆仔先將櫈仔拎返車放好再入場。
我哋兩母女入場先，嘩！後面係自2019年2月18日起開始停駛2023年11月17日先再次投入服務的香港迪士尼樂園鐵路呀！
對於逸逸嚟講，香港迪士尼樂園鐵路對她來說絕對是新玩意，不過話時話，睇返自己的記錄，原來我上一次坐都要追溯返到2013年，即係10年前，不過當時的Comment係：「只是黑麻麻的繞了一圈，卻看不到什麼，以後也不用再坐這個小火車了」。
既然要等恆仔，我帶住逸逸去排隊坐下先。
我哋都排咗20分鐘先上到車，小火車繞一圈確實唔太多嘢睇，最有趣係從另一個角度欣賞已經玩咗N次的森林河流之旅，同埋發現到部分動物係專門俾小火車乘客欣賞㗎！
本來打算坐到去幻想世界火車站落車，不過逸逸堅持要完滿的繞一圈。落車時先有機會同小火車影張相，小火車其實係一架仿蒸氣火車，我當然要趁機會介紹一下我啦嚟緊的澳洲之類會坐真正的蒸氣火車Puffing Billy了。
同恆仔匯合之後，係美國小鎮大街影下聖誕樹先，今年無時間特登嚟睇聖誕樹亮燈儀式了。
終於來到魔法奇緣世界了，原來我哋好幸運，之後有些日子連進入園區都要排隊。
阿德爾真係好靚，充滿歐洲風情，只可惜欠缺了藍天白雲，否則仲靚。
美美的噴水池
我們首先排隊玩「雪嶺滑雪橇」，沿住排隊路線好多影相位，最有趣一定係Oaken係桑拿房入面同大家打招呼。
排隊連玩大約45分鐘，個Ride速度感好強，逸逸係有啲驚，但係超級快玩完，據說全程只得30秒，對我來說有點到喉唔到肺。
我哋去森林美食站買咗香腸拼盤試吓，味道好價錢也相宜。
食完就排隊玩埋「魔雪奇幻之旅」，依個Ride絕對值得俾10個讚，場景全部都靚到飛起，如果只夠時間二選一一定揀佢，我地係度排隊時仲見到Anna添！
逸逸又拎住啲公仔愛不釋手
入夜之後的阿德爾又有另一番美態
難得唔使等位，我哋今晚試埋阿德爾港畔餐廳，食埋晚餐先走。
餐廳的設計以Elsa同Anna屋企為藍本。
唔知依度會唔會有無馬提斯中尉的畫像？
依度點餐後你會睇住職員直播幫你擺盤，即刻乜嘢幻想都無晒。另外，佢托盤的設計係可以安全地叠高，但其實我一個人拎三份餐雖然唔會跌落嚟，但其實我唔係咁夠力。
開餐囉
我試了港畔海鮮燴，口味比較清淡份量也略細；恆仔試了小鎮芝士火腿雞肉卷，味道不錯不過比較Heavy；逸逸的兒童餐有森林貓意粉配肉丸，啱晒逸逸口味。要特別提提之藍色Fanta，職員推介話係阿德爾限定的桃味汽水，確實很有氣氛。
食飽飽逸逸去咗舖頭買火之靈Bruni做聖誕禮物
晚上的友誼噴泉仲靚
我們參觀埋旁邊的極光糖果屋
入面的甜品超靚，下次要留返個肚買嚟試吓。
今年聖誕節都唔會有時間再嚟迪士尼，走之前逛埋個Duffy and Friends Winter Wonderland。
可以影下聖誕Theme的靚相
依度啲飄雪超級勁，勁到逸逸超級High，周圍裝飾靚唔靚已經變得完全唔重要。
好辛苦先捉得住逸逸影返張全家福
美國小鎮大街繼續飄雪
聖誕快樂！