二零二三年七月二十二日(星期六)
今天早上6點就起床了。
自己外出走走，竟然看到日出，實在是意想不到的驚喜﹗
不消幾分鐘太陽就已經出來了。
不過仍能看到早上特有的超級長影子
究竟有幾熱先至要攬住個風扇瞓覺？真係好可愛~
點解要係汽水機面前影相？因為逸逸係依度技能解鎖，第一次自己入錢、揀飲品、拎找贖同埋拎飲品，一次過要兼顧咁多嘢都唔簡單架~
點解咁大個先第一次經歷？因為平日係香港用八達通，完全不會遇到入錢同找贖的情況。之後我都叫逸逸跑腿過幾次去買飲品，不過都唔係每次都成功，因為有時我揀的飲品按鈕太高唔夠高按掣。
逸逸今朝好唔開心，因為玩玩下唔知班小朋友跑咗去邊，唯有我陪逸逸去遊樂場玩。
逸逸自己跳唔到上去坐住個繩結，都係就咁捉住滑過去，今日有我幫手抱佢坐上去，終於可以感受到滑翔的感覺，按上圖可以睇下逸逸玩飛索
我都玩下條長滑梯，依類滾輪式滑梯身體越重滑得越快，大人坐上去超有速度感。
跟住又去隔離的幼兒廣場玩下遊樂設施，依邊的設施真係舊好多，不過我覺得睇落更加刺激。
不過搵唔到班朋友仔的逸逸無乜心情玩，後來再諗返，佢心情唔靚另外一個原因可能係肚餓，係咪發現到點解玩咗咁耐都無提到食早餐依個環節？
因為今天早餐係食返昨晚剩下的食物，翻熱食物就要透爐，加油呀恆仔﹗
去到9:45AM終於有早餐食了﹗
小朋友食早餐喇~
食飽早餐又去爬樹
除咗未夠兩歲的小BB之外，今日所有小朋友都爬晒上樹喇~
逸逸的勇氣只夠爬到依個位置，有時會俾其他小朋友話佢阻住上落，所以好唔開心呀~
AIDEN爸爸今朝出咗去租車公司拎車，返嚟時帶咗雪條俾班小朋友。
大熱天時食雪條，正呀~
貪玩的我都身痕，好想試下爬樹，仲越爬越高，真係好想分少少勇氣俾逸逸。AIDEN媽媽見我爬樹都忍唔住跟埋我上嚟呀~
小朋友又返嚟喇~
之後AIDEN爸爸帶咗小朋友去扭蛋，個個滿載而歸。
小朋友去扭蛋，大人就係度煮麵，因為今日我地要食竹架流水冷麵呀﹗
真係無諗過有啲咁得意的設備可以租嚟玩，工作人員會幫手SET好晒所有工具，流咗落嚟的水會泵返上去作循環，開始之前係水入面加了一大包冰，就變成了冰凍的流水了，比當年係鹿兒島唐船峽食流水冷麵有FEEL得多。
大家各就各位
將煮好的素麵係高位放落去
睇住佢順住水流一齊SIR落嚟
夾到
依個時候識用筷子真係好重要
按上圖可以睇下動態版竹架流水冷麵
最偉大的裝置係夾唔晒的麵會流返落去個筲箕，唔會阻塞水流，又可以食埋佢唔好浪費。
只係簡單的加上蔥花同埋冷麵汁，自己夾的麵特別好食。
我地仲要食埋昨日玩扑西瓜的大西瓜，DEREK爸爸無大刀用鑊鏟都切到真係好勁。
成班小朋友一齊食西瓜的畫面好幸福
夠鐘要走喇~收營之前一家三口係帳蓬前面影返張相留念，之後我地就開始收拾了。
逸逸就跟咗彤彤和昕昕三個女仔自己去咗鄉土館嘆冷氣玩波波池同埋填色，真係識嘆，亦要慨嘆我的女兒真的長大可以獨立了。
除了收拾好帳篷之外，仲要清理其他借用的設施，洗得唔夠乾淨職員會會彈鐘，要你再清乾淨啲先再拎返去。丟垃圾也很有要求，除了要用專用收費垃圾袋裝垃圾之外，仲要可回收物品例如鋁罐、膠樽係嚴禁放入垃圾袋，如果俾佢發現到會要你拎係袋垃圾入面執返出黎放入回收筒。
香港就快開始垃圾徵費，但只要你肯付款購買垃圾袋，政府賴理是否放有可回收物，所以在垃圾處理方面，日本還是嚴格得多。
燒烤剩下的炭碎也有指定回收位置。
大家分工合作，花了一個半小時，終於整理完成，要跟沖繩綜合運動公園說再見了。
我們大約2PM就離開營地了。