二零二三年十一月十九日(星期六)
天氣開始轉涼，又到了露營開季的日子。
今次又試下新地方，係網上評價不錯的牧緣田里。
預約的時候都已經知道泊車的地方和營地有點距離，起初以為是像四季休閒農莊那樣停車在門口然後要推裝備入營地，沒想到原來車要停在外面的停車場，沿住斜路行落黎過條橋再入村，大約10分鐘先行到去牧緣田里的門口。
因為我地係重裝備，又無合適的容器，最後前前後後行咗三次先搬晒我們的行裝去營地。
依度係登記處，基本上出示確認預訂E-MAIL對返號碼就搞掂，職員就會領我們去分配好的營地。
牧緣田里佔地10萬呎，除咗自攜營之外，還提供各式各樣的GLAMPING選擇，今次我們被分配在右邊最高處的ZONE C山景露營區 – C33 翠柏里。
這兒基本的設備齊全，洗手間和即熱式熱水淋浴間在同一空間，不過也算清潔，旁邊就是廚用鋅盤，洗菜洗碗洗嗽也是在這兒。
這個波波是共用雪櫃，不過今次天氣夠凍，我地又有保溫袋，所以無需存放食物在雪櫃。
依度都有汽水機，價錢比外面貴一點是意料之中，不過點解罐裝汽水賣$10，細罐咁多既雀巢咖啡竟然賣$25，真係好好奇點解會咁定價，因為要飲咖啡既人貴一貴都要買？
最重要的是這兒有兒童遊樂場，彈床攀爬架足以令小朋友玩得好高興。
逸逸一嚟到就瞓係草地嘆下先~
恆仔開始起營的同時……
逸逸都幫手SET UP其他設備，果然大個女﹗
下一張相點解返咗去屋企？可能因為太耐無露營，我地竟然帶漏好多嘢。係出發的路上恆仔已經開始突然諗起發現唔記得帶濕紙巾，我話：唔緊要喇~諗下諗下又話唔記得帶抹枱布，我話：唔緊要喇~又諗下諗下唔記得帶風擋，我話開火煮食時搵其他嘢擋下都得既~
恆仔起起下營我開始搬物資出來的時候突然問返一句：個鑊係邊？弊傢伙﹗唔記得帶﹗今晚飯都煮唔到，於是恆仔繼續起營，我就立即駕車返屋企拎鑊，再返到營地已經6:45PM了。
大家都肚餓，立即開始煮晚餐，第一道菜係煎大阪之王將餃子。
鐵鑊煎餃子比屋企用易潔鑊煎更加好味﹗
下一道菜係逸逸點名要的韓國腸仔，輕輕煎一煎就食得，仲特別帶咗茄汁來當沾醬添~
第三道菜又係逸逸話要的魚肉燒賣，我地都係第一次用鑊煎，個皮微脆又無炸咁油膩，好味道喎~
依張相係主要影下我枝酒同埋恆仔枝新燈。
因為上次沖繩露營食過番尋味，今晚的主菜係燒和牛，竟然俾恆仔係DONKI搵到盒正嘢~
起鑊喇~
煎起上來又軟又嫰，入口即化，美味又JUICY，最重要係連不喜歡肉的逸逸都話好食﹗
下一道菜要搵逸逸做小幫手切午餐肉
因為我地帶咗即食飯嚟整午餐肉蛋炒飯，今晚天氣真係好凍，又超級大風，食返碗又香又熱辣辣的炒飯，夠晒暖胃同飽肚，正呀﹗
去露營當然要食下薯片喇~依家逸逸已經可以同我地一齊食熱浪。
晚餐時間除咗凍之外，完全沒有忙亂的情況，同上次2月時去露營打瀉籮蟹咁，今次真係食得好嘆~
外面太凍又食得好飽，入帳幕休息下睇下ELSA先~
我叫逸逸帶我去遊樂場參觀下，今日我返咗屋企拎嘢時，兩父女SET好場就落嚟玩咗一陣。不過當時咁啱係逸逸埋去玩時小朋友預備走，逸逸同我講埋小朋友唔同佢玩喎，好可憐咁呀~
等媽媽陪你玩下喇~依個搖搖橋真係幾刺激﹗
踩單車我就無能為力了，雙腳太長頂住呀~
又跳下彈床，不過因為天色太黑，跳緊既時候影唔到相呀~
飯後甜品係原本買嚟當下午茶的西餅。
臨瞓之前去個洗手間，返去途中都忍唔住要坐下搖搖椅~
逸逸瞓覺先喇~今次我地轉咗比較輕巧的蛋格地墊，確實無我地之前的軟墊咁舒服，不過我地張軟墊實在太BULKY，可以每次衡量過營地情況再作考慮。
逸逸瞓咗之後我地又開火煲水了，依張相最重要係介紹下我地個新爐同埋係日本買的摺叠水壺。
點解要煲水？因為露營要食咖哩麵囉~
食完成個人都暖烘烘的
今晚個天好清，見到非常多星星，真係好AMAZING。
因為自小媽媽就教我認獵戶座的腰帶，所以這個密密麻麻的星空，我唯一認出的就是獵戶座。
坐喺外面真係凍到震，不過可以一邊飲住暖水一邊睇星星真係好正。
熱鬧的營地開始慢慢靜落嚟，不過可能我地第一次星期六去露營，未去過咁熱鬧的營地，第一次遇到12點過後仍在喧鬧的情況，覺得真係有點嘈。
這兒燈光很足夠，只要在上落我們營區的斜路小心一點，不帶營燈上廁所還是可以的。
望住個咁靚既星空，真係唔捨得瞓呀~