二零二三年十月一日(星期日)
今次BOOK酒店時我都無留意到原來包兩份早餐，CHECK IN時職員表示如加一位早餐就$128，大小同價，有見如果三個人一齊出去附近茶餐廳食早餐也便宜不了多少，即管先去酒店餐廳看看情況。
逸逸第一個反應：乜咁少嘢食既？但當我提議出去食佢又話要係度食喎~
簡單的食物，味道不錯，最正係有凍燕麥，即刻幫依個早餐加晒分﹗
7歲的逸逸做了7仔，不停出出入入為我們供應飲品，正在減肥的我點可能不停添飲橙汁，好彩可以揀冰水~
今天的目的地是水上樂園，是今次小旅行的主菜，揀酒店時都係以方便去水上樂園為目標。
我地搭地鐵去到海洋公園站，再轉免費的接駁巴士去水上樂園。
大約11:15AM來到海洋公園的正門，水上樂園的門票都好貴，幸好在KLOOK發現了有成人買一送一優惠，否則門票真的非常貴。
已經開始踏入萬聖節的月份，水上樂園舉辦鬼馬水上南瓜祭，比平日多少少特別活動。
租LOCKER都好貴，家庭儲物櫃要$200一日，只夠放同恆仔兩個背囊，已再沒有多餘的空間了。
依個係萬聖節特備節目：打水戰
每人獲發四個裝滿水的氣球，逸逸+恆仔vs我,要半膝蹲下發射才夠力射到對面成臉水架！
激流旅程係Lazy River快速版，同埋無水泡，所以一定要著救生衣隨水漂流，咁樣會有趣好多。中間有好多變化，除了各式各樣的射水之外，還有隨機小水筒和泡泡按摩，它的多樣式促使逸逸總共玩了12次。
湧浪灣真係好大浪，要捉實逸逸隻手我先安心。
入返室內玩真正的Lazy River漂流探秘，依個就無咁特別，好彩今次搵到南瓜仔同逸逸一齊漂。
依個係KID ZONE威威水地帶
逸逸都係度無限LOOP咗一輪滑水梯
亦都玩咗較高的橙色滑水梯和黃色滑水梯各一次，其中一條落嚟時連轉三個圈，真係玩到有啲暈。
依度都有大水桶，我都特地去體驗過，不過無華欣個大水桶咁勁！但係逸逸都係驚唔敢試。
望住個海等食午餐
我地幫襯咗威威水地帶旁邊的洞天美食HORIZON GRILL
係室外食午餐暖下個身
恆仔食漢堡，我就食KEBAB，逸逸就幫佢點咗份兒童餐，全部味道正常無驚喜，最驚喜係個裝汽水的紙杯，完全唔駛再用膠蓋，摺埋變垃圾又唔佔空間，幾唔錯﹗
食完午餐逸逸興緻勃勃咁話要玩彩虹滑梯，結果上到去驚得滯臨陣退縮，唯有先陪佢返落去搵爸爸。之後我重新排過隊再玩，排到之後已經趴在滑水道口結果俾職員叫返起身，原來對講機壞咗，等咗差唔多15分鐘先有得玩。所以玩依個八彩天梯真係一波三折。
依個八彩天梯係趴係度玩，好有趣，而且好似無以前五彩天梯咁恐怖。
上次去華欣無玩到太空艙式滑梯，今次決定試吓。去到見到有幾個人都在排黃色的極速迴環，我唔想等就舉手話玩橙色的深谷飛瀑，行入太空艙然後關門，Three Two One Go就突然唔見咗塊地直跌落去，原來深谷飛瀑係直落所以刺激啲，不過我又覺得唔算恐怖，反而倒數時驚啲。
因為唔記得同個太空艙影相，於是上多次去。黃色的極速迴環又係好多人，見紅色的勇者之巔無人排隊於是就試咗。我覺得佢無華欣的free fall咁高所以衝力無咁大，完全無鼻哥入水的問題。
最後決定試埋極速迴環，一小段free fall之後就轉到頭都暈埋，睇唔清前路淨係轉來轉去唔係咁過癮。不過玩依次的時候見到隔離深谷飛瀑出現機件故障，有個人入咗太空艙落唔到去又打唔返開個太空艙出返嚟，要等工程部過來救佢。
挑戰完一輪就返去搵返兩父女，最後梗係喺激流旅程搵到佢地喇~
好彩最後鼓起勇氣玩咗旋風雙子梯同埋急轉雙子梯，終於感受到坐水泡滑梯的樂趣，立即贏左激流旅程，成為今日的No 1，下次我要引導佢挑戰更刺激的⋯⋯
向玩緊激流旅程的人射水
最後玩埋萬聖節攤位遊戲
玩完可以扭蛋
禮物係動物相機
新的水上樂園真係好正呀﹗
玩完就沖涼換衫，不得不讚下水上樂園的沖涼設施，沖涼間隔好寬敞，而且乾濕分隔得好好，又有沐浴露供應，我地係真真正正咁舒舒服服沖返個靚涼先走~
係海洋公園站的鴻福堂買燒賣食，竟然做緊買一送一，所以份量好澎湃，大家都食得好滿足~
搭地鐵返到銅鑼灣站，逸逸仲精力充沛的扮做瑜伽。