拎返行李,我地就搭一個站鐵路去關西機場。
同一個月台同時可以搭JR或者南海電鐵,所以好快就上到車。
只需要6分鐘車程,過條橋就去到機場了。
立即衝去航空公司櫃台寄行李,然後去旁邊的美食廣場吃午餐,好彩第一日到埗的時候已經探好路,非常順利。
美食廣場有五家店,我選了覺得會出菜快吃得也比較快的拉麵,點知原來依間神座拉麵係即煮的,我望住個OPEN KITCHEN,看著廚師四碗四碗拉麵的精心炮製,結果等了20分鐘才拿到食物。
結果要趕4:35PM飛機的我們,3:50PM才開始用餐。
恆仔點的是人氣NO.1的小叉燒溏心蛋拉麵,我唔想食咁多肉但又想食溏心蛋,所以點了美味拉麵另加溏心蛋一隻。依個拉麵非常好吃,湯底清甜,而且加了大量蔬菜,吃進口裏爽口不油膩,感覺上唔太似典型的日式拉麵,反而偏向中式的口味。
原來依間都算係關西有名氣的拉麵店,創始人曾是一家法國餐廳的主廚,以創造可每天食用的溫和高湯為目標,打造了這款打破常識的全新口味拉麵。
連最近食慾不振的逸逸都吃得唔錯,終於唔係食兩啖就停落嚟,而係我同佢講夠鐘喇無時間再食喇先至放下筷子。(不過佢都係只食菜和麵,叉燒都係唔啱佢口味)
登機証寫4:05PM開始登機,我們4:05PM才開始入閘跑過來,只係簡單對一對登記証同PASSPORT同埋手提行李過一過安檢就可以直接過來登機閘口,好彩過到嚟都仲要等多陣。
仲有時間掃下QR CODE同可愛機師影返張相添~
我地今次依程內陸機係坐捷星航空,話時話我都係第一次係日本坐內陸機架咋~坐內陸機同坐JR差不多,所以係無食物亦無任何娛樂設施,我係DISNEY+下載定《優獸大都會》坐飛機時同逸逸一齊睇。
今日下午未飲啡,我叫咗杯咖啡飲,只要300円都幾抵飲,空姐直接收現金。
機程2小時20分鐘,遠過香港飛去台北。
我地嚟到沖繩了,看到藍天白雲真好~
對面架JAL係鯨鯊嚟架~原來依架係隸屬日本航空的日本越洋航空的飛機,總部設於沖繩,難怪以沖繩美麗海水族館的明星鯨鯊做主題了。
看到首里城再建的BANNER,諗返起2019年的火災,造成首里城正殿等6棟建築物全毀,真的很可惜。現在首里城在重建中,所以我地今次都無安排參觀首里城的行程,就讓我暫時回憶住2007年的首里城先喇~
機場四週都充滿住沖繩的特色
仲有個小小水族館添呀~
咦~原來沖繩仲用緊依隻小心夾手的蟹仔……我當年覺得佢好可愛特登影低咗佢~
我地搭單軌火車出市區
好靚的玻璃畫
原來今屆世界盃籃球賽由菲律賓、日本和印度尼西亞獲得了聯合舉辦權,而位於日本的賽事就在沖繩舉行,難怪我們在沖繩好多地方都看到有關世界盃籃球賽的宣傳品。
今晚住國際通附近,最近的單軌電車站是県庁前站。
好美的夕陽
我們入住的HOTEL ABEST NAHA雖然只是一家小小的酒店,但係LOBBY唔單止有WELCOME DRINK,仲有SHAMPOO BAR,真係估佢唔到。
小小的房間有一張雙人座+一張單人床,仲有浴缸可以浸浴,一家酒店房要有的設備都齊全,咩叫麻雀雖小五臟俱全咪就係佢囉~不過要落去問櫃台拎多個枕頭……
一落樓就係國際通了
成條街都係紀念品店
太晏食午餐其實仲好飽,食壽司比較容易按需要去點菜,我地去咗係香港成日都要排長龍的壽司郎。
一入舖頭就見到大把位,但係完全無人SERVE,原來要自己拎飛,然後螢光幕就會話你知要坐邊張枱。
外賣凍櫃又幾好喎~
仲有填色紙俾小朋友畫下嘢,不過就無顏色筆供應。
點菜同香港一樣都係用PAD自己搞掂,仲有中文版添,雖然部份食物翻譯得有點奇怪,不過都睇得明。
連飲品都係用運輸帶送過來架~
整體壽司的質素好一般,香港的壽司郎反而仲好食,難怪日本人唔明白點解香港人要排隊食壽司郎。
逸逸慣左去壽司郎一定要食雪糕,不過胃口不佳的她食左一半就要爸爸幫手執手尾。
埋單終於有職員嚟服務,不過依度數碟無咁先進,香港唔同顏色叠埋一行用機一掃就知道唔同顏色碟的數量,依度要先分好顏色再數。
俾錢都係全自助
返酒店要浸浴,我去拎枕頭時幫逸逸係SHAMPOO BAR揀咗麵包超人沐浴露同埋鴨仔玩具陪逸逸沖涼,逸逸超級開心呀~