事隔四年，我們終於可以再參與五月天的演唱會了。
自2010年開始，今次是我第十七個五月天演唱會，參加第十個香港的五月之約。(雖然今次係超前相約於四月)
今年五月天分別在4月份的兩個星期五六日舉行共六場演唱會，選址中環海濱活動空間。今次買票壓力好大，因為今年決定帶埋逸逸去睇演唱會，第一個星期五六日我們去了旅行不在香港；第二個星期五逸逸放學後要學跆拳道會，如果晚上再看演唱會會好累，星期日的話第二朝要早起返學唔想夜瞓，所以我們必定要買到4月22日(星期六)的票。
優先訂票開售當日，好好彩都幾早成功入到系統可以選票，為了確保買到票以及矮小的逸逸可以比較舒服的睇演唱會，二話不說的就放棄最貴的$1380以及較接近舞台的$1080地面座位，直接就搶$1080樓梯座位，10AM開售，10:30AM就買到票了。
久違了的一片藍，加上香港的夜景，畫面真係好震撼，好彩天公造美叫做無落雨，配上矇矓的天氣，猶如置身夢境之中。
可以跟家人和老友一起欣賞五月天演唱會，實在太幸福了﹗
今次演唱會的主要印象：
- 事隔四年，終於可以再次離開地球表面盡情地唱盡情地跳盡情地跳，叫到把聲沙晒，我諗逸逸應該未見過這個模樣的爸爸媽媽。
- 我們的位置非常不錯，又夠正中又夠高，無遮無擋睇得好清楚﹗不過如果坐地面後排，唔好話逸逸，我諗我都淨係睇到螢光幕睇唔到人，再次要讚一下自己買票那天做咗GOOD CHOICE。
- 可能太耐無睇過五月天演唱會，開頭都未係好進入狀態，需要時間熱身，直至唱到《孫悟空》感覺先至全部返晒嚟。
- 五月天各人年紀都大咗，唱到《離開地球表面》的時候淨返阿信係度跳，再睇唔到怪獸、石頭同瑪莎一邊彈結他一邊跳的畫面。
- 點歌環節超級正，用「五個渣男讓我苦等四年」嚟吸引五月天注意真係超級搞笑。
- 太耐無去五月天演唱會，好多歌都好想聽，不過最最最遺憾係無唱「笑忘歌」。
- 我對五月天的歌好熟悉，但係對歌名好陌生，永遠都記唔住。連只聽過幾次的2022年新歌《你的神曲》以及《為你寫下這首情歌》都識跟住唱，點解突然唱咗一首歌同歌名都一樣陌生的《玫瑰少年》？原來依首係蔡依林的歌，恆仔仲話2019年演唱會都有唱，但我完全無印象。
- 期待2024年的五月之約……
今次係逸逸第一次參加五月天演唱會
特登買咗件XS碼蔡頭粿TEE俾逸逸，增強儀式感。
逸逸本身對五月天的歌都耳熟能詳，因為車的PLAYLIST入面放咗五月天大部份作品，有首歌仲識問點解未聽過。(因為是2022年新歌，沒有放在PLAYLIST)今次演唱會她比我想像中更加投入，HIGH足全晚，跳足全晚，螢光棒FING足全晚，第一次玩人浪，仲怪爸爸唔教佢唱晒阿信要現場觀眾接唱的歌添。
小五迷已經講好下次都要一齊去睇五月天演唱會了。