今天晚餐的菜單很豐富。
因為看了《搖曳露營》電影，看到她們在冬天圍著火爐喝著暖呼呼的三文魚雜菜湯真的好幸福，所以決定試下，也特地買了即食飯配湯來吃。另外，我們也預備了烤牛肉和豬肉，也為逸逸預備了烤餅和日式咖哩……
因為預備三文魚雜菜湯大約需時30分鐘，所以大約7點左右我就開始煮湯。
逸逸繼續食零食，露營可以零食放題真好，唔知依個會唔會係逸逸喜歡露營的原因之一呢？
唔知係咪因為太大風，我個三文魚雜菜湯，竟然煲咗半個鐘頭水都滾唔起……
好彩之前係DISNEY PLUS下載定《魔法奇緣2:再見魔法》，可以俾逸逸自己乖乖坐係度睇消磨時間，依套電影我都未睇架。
好彩今次打算煲湯，所以問定妹夫借多個爐，所以一個爐繼續嘗試滾起個湯，另一個爐就加熱日式咖喱。加熱日式咖喱需要比較少水，總算成功，恆仔開始煎餅的時候，我決定將一半的三文魚雜菜湯拎去用微波爐加熱，直接叮熟佢就算了。
叮熱咗的三文魚雜菜湯收晒水變成汁，搞到有啲鹹，不過配埋叮熱咗的白飯終於有熱食落肚總叫做唔錯。逸逸的日式咖哩配煎餅好不容易整熱咗咖哩，點知煎好餅咖哩已經凍晒，好彩逸逸無投訴。不過天氣實在太凍，逸逸的嘴唇久違了凍到變了紫色，要急急腳幫逸逸加多條褲係外面。
雖然逸逸凍到嘴唇變紫，始終剛剛才經過韓國好凍好凍的洗禮，所以逸逸話今晚雖然凍，不過都無韓國咁凍喎，起碼唔會凍到喊先喇。
之後我地開始煎肉，不過煎好第二ROUND肉白飯已經凍晒了~
後期烤肉個爐啲火成日熄，發覺唔夠GAS，換咗GAS有返啲力。明明支GAS係新的，原來大風用GAS特別快。以往去露營打埋邊爐都只係用大半支GAS，今次竟然用咗兩支半。
之後叮埋剩返的半鍋雜菜湯，不過今次無加三文魚，三文魚留返嚟烤，又香又脆，好食過叮熟好多。
最後，我地食到10PM先食完晚餐。
上次露營傾盆大雨以為已經夠狼狽，今晚煲唔滾啲湯簡直有無助的感覺，不過依啲亦都係露營的魅力，我同恆仔係會討論下次再遇咁凍既天氣有咩合適的菜單。
因為太狼狽，好後期先至有閒情拎支酒出嚟嘆下，仲要陪逸逸瞓覺時都未飲完支250ml的紅酒。不過依支酒真係好唔錯，又便宜又好飲，細細支唔駛驚飲唔晒要帶走。
GOOD NIGHT~我地只係用15度睡袋，幫逸逸加張薄毛毯，再加多個暖包都OK。
逸逸瞓咗覺我走返出嚟同恆仔傾下計，享受一下寧靜的大自然。
飲埋支酒，同埋食下小食。
雖然睇唔到星星，不過竟然睇到放煙花。
真係又凍又大風，行去洗手間要戴埋帽擋下風。
今晚11度，明早7時跌至7度，希望個營同睡袋頂得順，唔駛好似搖曳露營動畫版第二季咁要係車上面過夜就好了。