我愛露營之天寒地凍初體驗 – DAY 1 – 露營去寫生

二零二三年一月二十七日(星期五)

今天請假陪逸逸早上去做學童健康檢查,下午梗係要搵節目,我地又去露營喇﹗

其實之前已經去了三次的怡樂大江埔悠閒農場,佢有清晰的獨立空間同埋好靚的草地,雖然頭兩次都只是偶然有點豬味,適應咗就聞唔到,而且他的優點絕對可以彌補依個小問題。不過上次因為下大雨問題就出來,草地的疏水非常好,落完大雨都完全無水浸或泥TUM的問題,但係豬味好勁,勁到我都唔係好頂得順,逸逸都忍唔住出聲投訴……

於是我決定要搵下新營地,我發現幾個位於大江埔的營地都有豬味的評價,所以首先隔絕晒所有大江埔一帶營地,再搵下有地方泊車又唔太貴,最後揀咗為於大棠的稻場。

首先在查詢和預訂時,對這個營地已經非常有好感,負責人好快有回應,而且非常詳盡,亦好老實咁事先講明附近有搖控車場,日間有搖控車聲音。付款後清楚列明露營禮儀,又提供清晰的GOOGLE MAP定位,仲俾埋相提醒邉個路口要轉彎因為好而錯過,非常貼心。

俾齊貼心資訊之後,就是給你百分百的自由,這是全自助式的營地,無人同你登記,無人對你資料,入到草地自己搵個鍾意的位就可以起營,現場只見到一個工作人員默默的在草地撿垃圾。

近公共設施個邊的草地質素麻麻地,不過行入去我地紥營個度就好唔錯。

有SINK盆洗潔精可以洗碗,仲設有廚餘筒俾人隔走食物殘渣,但唔係個個都咁有公德心,最後大SINK盆渠位都係塞滿食物。

洗手間分男女廁,依個係女廁,外面6格係廁所,入面6格就係沖涼的地方,有冷熱水供應。

依度仲有個小小的公用空間,有雪櫃、微波爐、電磁爐、各式廚具、風筒等等,另外依度同時係一個自助形式的小賣部,要買嘢自己用PAYME俾錢就可以了。

依家恆仔搭營已經好熟手,只係偶然要我過去幫手扶一扶就可以了。

今日好大風,玩唔到逸逸好想玩的羽毛球,不過就非常適合放風箏﹗

(按上圖觀看影片)

夠風既話放風箏真係好好玩~

另外,因為睇咗《搖曵露營》,入面講到如果SOLO露營就要幫自己安排活動,如果唔係就會變得無所事事。雖然我們一家三口去露營而唔係SOLO,但無其他人陪逸逸玩就即係要諗下活動,今次我地買咗畫簿,決定要試下寫生。

我地帶咗粉彩,打算畫粉彩畫~

依兩幅係我既作品,係真寫生~

逸逸竟然兩日內畫咗六幅畫,真係興緻勃勃﹗

天空真係靚到暈~

之前提到露營場的附近有搖控車場,我們也聽到搖控車的FEE FEE聲,所以好有興趣去搖控車場睇下。

散下步真係好舒服~

恆仔做先頭部隊搵路,我同逸逸係後面慢慢行~

搵到喇~只係透過門隙都感受到搖控車的車速好快,真係好想入去睇下,不過門口企咗隻狗係度,我地都唔敢行埋去,後來再多一隻狗出嚟,仲向我地的方向走過來,嚇到我地即刻急急腳走~

我地估計因為我們來的時間有點晚,狗狗知道唔應該再有人來,所以對我們特別有戒心。

天氣好凍,我地返營地煲水沖茶休息一下,同埋食下午茶。

首先要介紹一下今日下午茶的菜單:拼盆是火腿+芝士+朱古力,係初三係黃金海岸的超級市場為咗今次去露營而買的,火腿同朱古力都好味,芝士就麻麻地。另外朱古力曲奇就係初一去逛超級市場時講起好耐無食過藍罐曲奇,買了回家但平時又沒有機會食所以帶來;薯片則是今早漏了買清雞湯於是要用DELIVEROO買百佳而湊數免運費買的。

好彩下午茶夠豐富食得夠飽,晚上做晚飯出問題的時候都無咁狼狽。不過最老土的是我們還帶了為露營而已經買了一個月的爆谷,竟然唔記得咗佢,最後完封不動要帶返屋企。

Comments

comments

發表迴響

你的電子郵件位址並不會被公開。 必要欄位標記為 *