首爾平昌冰雪之旅 – DAY 6 – ISAAC TOAST‧明洞逛街‧BEANSBINS COFFEE美味窩夫

二零二二年十二月三十一日(星期六)

今天妹妹一家回港,只有我們一家三口自己活動,行程立即變得相對鬆散。

我們今早打算食ISAAC TOAST做早餐,起床梳洗後我就負責做胡胡送出去買外賣。

負責跑腿的人當然會有私心,首先在酒店旁邊的A TWOSOME PLACE買返杯AMERICANO暖暖身子先出發。

上次我們住明洞的時候,只知道近明洞站5號出口有一間ISAAC TOAST,不過經常大排長龍;今次第二天去香港飯店0410PLUS食午餐的時候,發現附近有一家ISAAC TOAST明洞聖堂店,當時沒有人排隊,所以今早決定去那兒碰碰運氣。

果然這間ISAAC TOAST比較少人,排第二的我很快就買好早餐完成任務了。

我們買了三款包,逸逸的是HAM AND CHEESE、恆仔的是BACON,我的就是HAM AND CHEESE POTATO,因為店的位置同酒店好近,返到酒店先食仍然非常美味。

逸逸的三文治獨門食法。

食完早餐就出發今天的行程,今天早上的節目就是在明洞逛街。

話說逸逸每次住酒店都好鍾意睇卡通片,今次係明洞的酒店就主力睇CARTOON NETWORK,唔知點解明明香港的CARTOON NETWORK也是英文,但係韓國的CARTOON NETWORK是韓文的,點知逸逸又有殺錯無放過,全韓文的卡通片都可以睇到津津有味唔願意出門。

今年逸逸的聖誕禮物一早說好讓她可以在韓國揀,而逸逸就竟然係睇廣告時睇中咗一個類似他媽哥池的玩具,是可以伸手指入去摸的他媽哥池。上網查一下,原來這是日本玩具品牌TAKARA TOMY推出的一款遊戲「Punirunes」,不過香港無得賣。既然係韓國的電視頻道播廣告,即係韓國有得賣,於是上網睇下韓國買玩具的地方,可能因為用中文SEARCH的關係,只搵到東大門的玩具批發市場,應該是類似香港的玩具街,我諗未必買到,於是決定即管今日去百貨公司睇下。

世界盃剛剛過去,韓國最火紅的運動員當然就是孫興慜了。

好可愛的CAFE,我們只是在外面拍照。

好有氣勢的廣告牌,真係好似好多水從天傾瀉下來,戲子逸令成個畫面更加逼真。

不過相比起剛才的廣告牌,逸逸更加讚嘆依款我們小時候常見的三角形轉動式廣告牌。

逸:嘩!好新奇呀!

(按上圖觀看影片)

果然係未見過啲咁古老的東西的小傢伙😅

警署外面有兩個可愛的小警察,感覺好親民。

點解NIKE SHOP咁多人排隊?剛剛開始入場,我哋都入去八卦下。

原來係唔知排乜嘢限量版,反正我哋都唔知係乜,當然沒有興趣喇!

我們反而被依個小小更衣室吸引住⋯⋯

為了搵逸逸想要的禮物,我們在韓國第一次逛百貨公司,就係明洞的樂天世界百貨。

我們首先行低座的樂天Young Plaza。

首先吸引我們的就是KAKAO FRIENDS專門店,逸逸都係因為收到韓文老師送的RYAN公仔先對KAKAO FRIENDS產生了感情。

另一個充滿吸引力的就是LEGO專門店,係依度會見到香港未見過的產品。

韓國的戲院原來都上映緊皮靴貓。

好多怪物

我地行過去百貨公司,百貨公司兒童層點都有玩具部卦。

童裝部的貨架好可愛

可惜只有賣衣服的地方,回來後看Running Man在超級市場做購物任務,先發覺在韓國要買玩具原來係去超級市場。😅

在百貨公司的門口發現賣冰糖水果串,買來讓逸逸試試。

士多啤梨同提子的品質都是一等一,好甜,不過冰糖皮更加甜,而且黏牙,逸逸和我都不太喜歡。後來回香港後食團年飯時有拔絲蘋果做甜品,也是類似的做法,逸逸試了一啖就不要,還說她曾在韓國已經試過了。

昨晚收到航空公司的電郵提及有關回港的檢疫要求,當中提及要在航班預定起飛時間前24小時內進行快測或48小時內進行核酸檢測的陰性結果,我們出發前仍是要在機場做核酸,怎可能帶備快測棒呢?所以我們今日另一個任務就是要買快測棒。

我們先在這家7-ELEVEN搵快測棒,店員主動問我們在找什麼,得知我們在找快測棒就叫我們到斜對面的7-ELEVEN買,所以我們很快就完成任務。

7-ELEVEN店員很年輕,應該就是那些韓劇常提及的工讀生,同一日又有一個年輕人看我拖住逸逸特地幫我推門,兩個都是暖男,為什麼韓國的年輕暖男長大後會變成沒禮貌的大叔?二十幾三十年前韓國人行路已經是出名橫衝直撞,逸逸在韓國都唔知俾大叔大嬸撞過幾多次,是韓國的生活太迫人?太過強調長幼有序令年紀越大要欺壓返年輕人?壓力爆煲令人變得不再理會別人的感受?

韓國買的快測棒好貴,好似大約要W18000四支。

下一站係去BEANBINS COFFEE食窩夫,上網確認過明洞店仍然健在,我們不用GOOGLE MAP都識行去。

點解要講店面係咪健在?因為COVID的關係,成個明洞持續三年係無旅遊業的支持之下變得蕭條,BABYMOON時光顧過的CONGEE HOUSE已經結業,沒法再次品嚐美味的鮑魚粥;BEANSBIN COFFEE對面的LINE FRIEND STORE沒有營業,諗返起逸逸仲係我個肚時已經同過依隻BROWN影相四年前逸逸亦曾經係依度摸過BROWN個PAT PAT……

LINE FRIENDS STORE係最好的記認,因為對面就係BEANSBINS COFFEE。我地連續兩次首爾之旅都有食BEANSBIN COFFEE,BABYMOON時光顧三清洞店,上次帶埋逸逸一齊都係嚟依間明洞店

這個是季節限定的士多啤梨窩夫,韓國的士多啤梨很有名,今次窩夫上大堆頭的超甜士多啤梨吃得我好滿足,加埋超甜的新鮮士多啤梨汁,我們也不用再特地去超級市場買士多啤梨來吃了。

因為當午餐吃,所以我們點了兩份窩夫,我最愛的組合香蕉朱古力窩夫暫時售罄,唯有點了朱古力窩夫配雪糕,沒想到竟然有兩片香蕉,對我來說也算是BONUS了﹗

美味的BEANSBINS COFFEE,繼續保持住係我心目中窩夫的第一名﹗

吃過美味的窩夫,我們去埋手信店買了手信,逸逸也在手信店選了一個粉紅色韓服吊飾當她的小禮物,這個實在比第一天她發瘋扭計要買的首爾塔磁石好得多了﹗

Comments

comments

2 則迴響於《首爾平昌冰雪之旅 – DAY 6 – ISAAC TOAST‧明洞逛街‧BEANSBINS COFFEE美味窩夫

  1. 今次去韓國,好似真係缺少咗呢啲隨便逛街嘅行程,所以嗰日人哋問我去韓國係咪買好多嘢,我話冇時間買嘢,佢以為我去得好短,估唔到去10日都冇時間買嘢~😂😂

    • 明明去韓國應該安排去明洞、新村、弘大、東大門、狎鷗亭……全部都係SHOPPING﹗

發表迴響

你的電子郵件位址並不會被公開。 必要欄位標記為 *