首爾平昌冰雪世界之旅 – DAY 3 – 雪地包廂燒韓牛‧第一屆爆笑保齡球大賽

滑雪實在太疲累,逸逸瞓咗兩個半鐘晏覺先起床,再去阿妹間房玩一陣之後就出發去食晚餐。

我們今晚再次去CENTER PLAZA食晚餐,兩個小朋友一邊行一邊傾計。

昨晚預約了的餐廳,今晚我們要食烤韓牛。餐廳叫做평창 푸줏간,阿妹話意譯為平昌肉店,我笑說點解改名改得咁無誠意,阿妹話叫佢做平昌庖丁喎。🤣🤣

雖然都可以選擇坐室內的座位,但我們看中了這些雪地上面的帳篷小屋。

帳蓬入面有暖氣,也有提供暖包,所以好溫暖。

正在換牙的逸逸今天剛剛在睡午覺之前甩咗隻門牙,最搞笑係當時因為隻牙向外斜,換衫時撞甩埋。自從逸逸隻牙開始鬆之後就變咗哨牙妹,依家變成甩牙妹可愛返好多,終於重拾顏值。

這兒是半炭火燒烤,即是氣體爐燒住炭,所以有炭香又不需要換炭。入座時店家已經SET好TABLE,小菜同埋包飯菜都已經放好,除了比較常見的白泡菜和水泡菜之外,一碟三款的泡菜都比較特別,左邊的可能係沙參,中間粉紅色好像蟲蛹樣子的是酸和爽口的植物、最右邊的估計是醃辣椒。另外也有烤肉必備的蒜頭和醃洋蔥。

枱面也放有MENU,但係點樣落單?即管派探子阿DAY出去視察一下,點知佢返嚟搵埋RITA一齊出去幫手。

原來餐廳採半自助形式,可以在雪櫃選購不同部份的韓牛,也在這兒買飲品,買好自己帶回帳篷享用。

我們前後兩次共買了三碟韓牛,其實買了什麼也不清楚,只可以肯定是三款不同的肉,因為張單顯示的韓文不一樣。

其實看紋理也是三個不同的部份,只係我地唔太熟悉,不過估計左下角的是牛五花。另外我們也買了唯一可以燒烤的蔬菜:杏鮑菇和蘑菇。

兩位男士負責烤肉,女士們可以舒舒服服的享用美食。

餐牌上沒有太多主食的選擇,本來怕逸逸不吃肉,特地點了一碗冷麵,但天寒地凍冰天雪地冷麵入面還要加碎冰真係好似OVER咗﹗其實冷麵都幾好味,不過只係天氣太凍唔太啱時候。

這兒只可點石窩飯,沒有白飯供應,我們唯有去便利店買叮熱了的即食白飯,因為只有白飯先至可以襯托出烤韓牛的美味。

烤肉點可以無酒?妹妹提議今晚飲燒啤,即係燒酒溝啤酒,據說比例是一分燒酒三分啤酒,看韓劇時有很多飲燒啤的場面,還有很多調酒的花式用來炒熱氣氛。我還是第一次飲燒啤,燒酒的甜遮蓋了啤酒的佬味,啤酒的氣壓抑了燒酒的消毒藥水味,竟然變成有氣雞美酒的味道。

開動囉﹗每一款肉都非常好吃,肉味好濃,內質也嫰,是逸逸也會吃的肉。真的不禁要慨嘆:牛肉真的是一分錢一分貨的食物﹗

詩詩話仲係好凍

臨尾燒牛五花時太大煙,曉曉頂唔順走咗出去透下氣,逸逸跟埋出去就純粹貪玩。

烤肉帳篷旁邊就是BLUE CANYON,BLUE CANYON係一個水上樂園,分為室內區和室外區兩個部分,本來我們也帶備泳衣過來,不過滑雪比想像中疲累需要休息,明天早上BLUE CANYON不開放,所以今次無緣嘗試零度以下享用室外溫泉池了。

吃完晚飯時間尚早,我們在CENTER PLAZA逛逛。

韓國天團BTS曾在平昌拍過BTS IN THE SOOP,這兒設有紀念品店,但上網SEARCH又不知道這個節目跟平昌鳳凰度假村有什麼關係,可能要睇下個節目先知。

妹妹提議去玩保齡球,贊成﹗三個小朋友都是第一次打保齡球,聽到要換鞋都有啲擔心,因為想起早上那硬蹦蹦的滑雪鞋,換鞋後又不停讚嘆保齡球鞋好舒服,我也驚訝現在的保齡球鞋咁柔軟。

第一屆爆笑保齡球大賽現在開始,參賽陣容包括:曉曉、逸逸、詩詩、恆仔、RITA同埋我,大家實力相當,只係分唔太差、差以及非常差。

逸逸選手差啲連拎起個保齡球都唔夠力

不過唔駛擔心,我地依條係永不落坑球道,小朋友都可以好有成功感。

(按上圖觀看影片)

大家可以看看逸逸選手的比賽實況。

一齊玩保齡球好熱鬧

比賽期間有大量爆笑場面:詩詩球速太慢我地要幫佢個波打氣,不過有一次真係停咗係中間要職員幫手執返個波;大人無論打中幾個個樽,只要碰到防落坑裝置就會互相取笑係假成績;中途妹妹和詩詩去咗洗手間,阿DAY竟然著到阿妹對鞋落場代打……

成場比賽打了超過一個小時,最後只有恆仔一個的分數勉強達到三位數(記住係有防落坑裝置),第一屆爆笑保齡球大賽完滿結速。

玩完保齡球我地去參觀埋遊戲機中心,依兩個玩緊跳舞機的女士好似擁有摩打腳咁,好厲害。

影埋張相我地就返房浸浴、做網上功課同埋休息了。

Comments

comments

4 則迴響於《首爾平昌冰雪世界之旅 – DAY 3 – 雪地包廂燒韓牛‧第一屆爆笑保齡球大賽

  1. 「燒酒的甜遮蓋了啤酒的佬味,啤酒的氣壓抑了燒酒的消毒藥水味,竟然變成有氣雞美酒的味道。」飲酒是主觀的口味,能用文字去形容個中的變化,很難得,也讓人躍躍欲試。

  2. 估唔到香港都有得玩嘅保齡球可以咁搞笑,笑到斷氣,唔知係咪因為飲咗酒high high地~

發表迴響

你的電子郵件位址並不會被公開。 必要欄位標記為 *