二零二二年六月十七日(星期五)
本來打算過咗個夏天先再去露營，點知上網不停有大量GLAMPING的廣告，夏天唔去露營因為太熱，如果有冷氣又唔同講法，露營癮真係忍唔住，於是就BOOK咗四季休閒農莊的中型蒙古包，包一張雙人床、一張單人床、三個枕頭、三張被、一張枱、兩張櫈同埋一盞露營燈，最重要當然係仲有一部冷氣機喇~
四季休閒農莊位於鶴藪燒烤場附近，不過門口沒有大招牌，旁邊是永霖花園，當日我們車子在入口前經過也不知道，最後面行入去確認。
這兒總面積達16萬平方呎，分開露營區、燒烤區和停車場，車子離營地比較遠，確實沒有之前去怡樂大江埔悠閒農莊車子就泊在營地旁邊那麼方便，不過可以借用營地提供的露型推車搬運物資，所以還是OK的。
左邊是燒烤區；右邊露營車是士多，我地無幫襯過唔知貴唔貴；睇FACEBOOK中間位置有時會搞放映會或者音樂會，不過只見POST節目相，但又唔見宣傳，所以幾時有活動唔係太清楚。
入營第一件事係先做快測，快測棒由場地提供，都係一件好事，讓大家都玩得安心啲。不過佢都有個漏洞，就係只要求大人做快測，小朋友唔洗，雖然話小朋友朝早返學做咗者……
恆仔和逸逸身後就是我們今次入住的中型蒙古包，恆仔身旁的就是營地可借用的露營推車。夏天是露營淡季，加上我們來的是星期五，所以沒有看到自攜營。
不用紮營，打開枱櫈就可以開始玩了。
營內的設施
我們的蒙古包後面有一條小河
斜對面就是洗手間和浴室，兩者都超級乾淨，看過訪問稿原來每半小時就有人清理一次，超讚﹗
洗手間和浴室是分開的，沖涼洗腳都非常舒服。浴室除了有熱水供應之外，還有浴室寶，冬天沖涼都唔怕凍。
浴室的旁邊是一列的洗碗盆，這個位置晚上也有足夠的燈光，唔駛戴頭燈洗碗；這兒也有免費共用雪櫃，之前冬天去露營其實有無雪櫃都無乜所謂，但係夏天露營可以雪定冰凍的飲品就真係正好多。
有個大草地梗係要盡情跑下喇，我地帶咗泡泡機，逸逸玩得超開心。
其實我們出發前幾日一直都落雨，本來天氣預報都話露營依兩日會落雨，我仲已經同自己做定心理建設，今次係一個好機會俾逸逸著住兩褸係雨中跑跑跳跳。不過，最後好好彩無落雨，不過個大草地疏水唔係太好，其實有好多看不到的泥氹，著住鞋跑好滑，所以我地索性除鞋跑，好爽。
逸逸就成個PEPPA咁，見到泥氹就特登跳多幾下，結果彈到成身泥，件衫最後要報銷。不過唔駛擔心，正常人 – 即係我雖然都有係草地上面赤腳跑，只要唔刻意瞄準啲泥氹狂跳，件衫係唔會有事的。
跑完一輪，坐低飲啲嘢 。依張枱同埋恆仔坐緊張櫈都係營地提供的，坐得高啲真係舒服啲既，不過要自己帶就太BULKY喇~
我都要沖返杯咖啡飲下，正﹗
始終天氣唔太穩定，都擔心今晚食飯會落雨，都係SET個天幕穩陣啲。第一次係空地SET天幕，梗係論論盡盡喇~印象中都搞咗20分鐘，而且SET得唔係太夠高，似乎又要添置一下裝備了。
依度有兒童遊樂場，SET好天幕就陪逸逸去玩~
兩母女玩雙人鞦韆
睇下逸逸個樣幾浮跨，有無咁刺激呀？
最鍾意係跳彈床
我可以係隔離坐下
仲有攀爬架同滑梯
對於逸逸嚟講，依度梗係好玩過只有草地的大江埔喇~
係燒烤場旁邊仲有啲影相位
恆仔係我地個大本營休閒一下，我同逸逸繼續周圍探索。
小橋流水
逸逸超級鍾意依間為小朋友而設的小木屋，話係佢屋企。
HELLO~
入面仲有櫈仔可以坐
野孩子草地狂奔