夏之北海道 – DAY 6 – 洞爺湖畔散步‧天鵝船‧足湯‧餵魚魚

二零一九年七月五日(星期五)

今天我起得很早,因為我要趁逸逸起床之前再去浸一趟溫泉。

由於男女湯交替的關係,今早終於可以試試頂樓的星之湯了。

星之湯最大的賣點,就是有如INFINITY POOL般望著洞爺湖的美景,加上今天天色麻麻地,洞爺湖中間的小島嶼被雲層遮蔽,若隱若現,更加有如仙境一樣,在這樣的環境下浸溫泉實在太美妙了。

浸完溫泉我還享用了按摩椅,成個人平躺甚至有少少頭部向下,有點無重力FEEL,由頭到腳都按得好舒服,仲要因為太舒服而越按越眼瞓添!

不過都唔能夠返房再瞓,仲要叫逸逸起身,因為早餐只供應到9點,酒店10點就要CHECK OUT。

我猜所有房客都是含早餐的方案,所以早餐不用早餐券。之前已提及過因爲老爺爺老奶奶佔很高的住客比例,所以他們都偏向早起,所以我們8:20AM落到去已經好少人食早餐。

早餐的選擇也很多

我當然主攻日式小菜配白飯了

我試了這款豆腐,原本按照設計,用牙簽刺穿膠袋後應該是可以順利取出圓形的豆腐球,但經過粗手粗腳的我去處理,豆腐球變了豆腐碎,破壞晒美感。

另外,其中有一個COUNTER有即製飯團,我選了充滿日本風情的梅子做餡料,原來日本人整飯團會在外面沾幼鹽,所以我覺得個飯團內內外外都好鹹。

依張相的重點不是逸逸食早餐,而是她的食物盤上面的蜜瓜包,係KIDS CORNER限定,恆仔非常喜歡,拎完又拎。

至於令我拎完又拎的就是依個法式西多士配忌廉和紅豆茸,真係好食到不得了。

食完早餐執好行李,就開始今日洞爺湖的行程了。

起初計劃行程的時候,我好想去附近的果園摘水果,不過因為果園沒有公共交通工具直達,沒有駕車的人只能乘的士。7月初是車厘子的季節,與對車厘子的喜好很飄忽的逸逸和不吃車厘子的恆仔去摘車厘子,縱然我知道他們很樂意陪我,自己都覺得無癮,所以最後還是決定省下的士錢和果園入場費,隨便在洞爺湖畔散散步就算了。

一轉出酒店就見到洞龍之湯的手湯,在寒冷的冬天應該很有吸引力。

落到去湖邊,逸逸一見到草地就瘋狂跑,還要我或恆仔陪她跑。

好靚的繡球花

見到天鵝船,逸逸話想坐,其實洞爺湖其中一個熱門玩法就是坐遊覽船,甚至可以上岸遊覽洞爺湖的湖中島,如果要坐船就不如坐下天鵝船喇。

逸逸還是第一次玩水上單車,1500円30分鐘時間好像有點短又有點貴,點知原來係有浪的湖上踩水上單車30分鐘已經筋疲力盡。

逸逸負責掌舵,恆仔和我負責踩。

我指住另一架也是載著一家三口的天鵝船跟恆仔說:「你睇下你幾幸福,有我幫手踩,對面隻天鵝船真係一家大細靠晒個爸爸。

點解我地咁累?因為掌舵亂咁轉,有時差d轉番埋岸,有時就朝住人地架船直進,雖然湖上船隻不多,但恆仔不時都要搶番個控制權,我地先成功安然無恙準時的返到碼頭。

返到上岸,我同恆仔有d腳軟,逸逸就又走上草地狂奔,今次仲同一個同樣來自香港的小朋友一齊跑,後來有緣的我們在富良野又重遇這一家人呢!

繼續向前行,我們來到洞龍之湯浸免費足湯,前一晚才第一次體驗溫泉的逸逸非常喜歡這個足湯,又不停問我嗰個龍點解唔坐低,結果我們浸了接近30分鐘,浸到皮都皺晒,仲第一次出動計時器同逸逸解釋幾時要走。

洞爺湖八景是什麼我都沒有考究,只知道這兒很漂亮。

好似明信片一樣

再向前行,我們發現了魚糧扭蛋,逸逸繼泰國之後終於再有機會體驗餵魚的樂趣,一提到餵魚逸逸真的超級開心。

其實岸邊的石壆都幾闊,逸逸初頭技巧不足拋唔到魚糧落水,經過多番練習才越做越好。另外,這兒的海鷗搶食問題非常嚴重,縱然我們已盡力將魚糧拋到魚的嘴前,不時還是會被海鷗搶走。

繼續沿住湖邊散步

欣賞洞爺湖美景

其實沿路也是洞爺湖雕刻公園,可以欣賞不同的雕塑,不過我們要追隨住逸逸的步伐,實在無暇兼顧去留意一下那些雕塑。

這是2008年第34屆八大工業國高峰會議宣言之地紀念碑

依棵樹好CUTE,成棵西蘭花咁。

原本簡單的湖畔散步,最後竟然變得意想不到的精彩呢﹗

Comments

comments

發表迴響

你的電子郵件位址並不會被公開。 必要欄位標記為 *