我二十三個月大了﹗
今個月我地分別係澳門同埋海洋公園坐纜車，真係好好玩，好似飛咁，我到依家仍然對紅色纜車念念不忘。另外，我地係海洋公園玩騎魚魚轉轉轉時第一次自己坐，開始之前又期待又緊張。有個姐姐幫我地影左相，玩完用個好靚既相架裝住，上面除左有爸爸媽媽逸逸之外，仲有熊貓、纜車、企鵝、貓頭鷹、海豚、海馬、青蛙、仲有ladybug，我成日都拎黎睇，同埋指晒佢地俾爸爸媽媽聽。
我繼續好鍾意游水，依家可以用水泡自己游屋企樓下個泳池成個直池了，又會學爸爸媽媽踢水水，真係好好玩。另外，將唔同形狀入盒盒同埋水果切切切都係我近排喜歡的玩具。形狀入盒盒有時自己做得到，有時要爸爸媽媽幫，每次我都會同佢地確認「係咪逸逸自己」；另外，我試過玩切切切時因爲切唔到心急得滯喊，爸爸叫我慢慢黎，依家每次拎切切切出黎時我都會同自己講「逸逸無喊」。
我開始學用小廁所了，都成功左幾次係小廁所疴尿尿，好似書書入面既小朋友咁，不過我暫時都係鍾意用片片多d，好彩爸爸媽媽都無迫我，等我預備好先再試。
今個月我又學識左幾首新歌，包括大西瓜、河邊有隻羊同埋打開蚊帳，有機會唱比你地聽呀！
