JUMPTOPIA HOLIDAY VILLAGE渡假樂園

二零二三年一月二十四日(星期二)

我一直都知道黃金海岸酒店有吹氣彈床嘉年華,但一諗起好多人就無特別衝動想帶逸逸去,直至見到妹妹一家年三十去咗玩,仲話好正,而且大人都可以一齊玩,我就開始心動,當一知道年初三無嘢做就即刻上網買票去玩。

門票分親子同行門票 – 1大1小單次入場1小時以及家庭套票 – 2大1小單次入場1小時兩款,恆仔話唔玩,所以我們買了親子同行門票。原來早前還有全日任玩套票,可能經已售罄,不過依個遊戲體力消耗好勁,1小時其實真係乜都夠晒。

原來JUMPTOPIA係新加坡遊樂場KIZTOPIA旗下品牌,有五個巨型吹氣城堡,睇落已經覺得好吸引。

我們預約了12:30PM-1:30PM的時段,每個時段中間都會有職員進行消毒,確保衛生。

最吸引逸逸的一定係依個4.5米高的充氣長滑梯。

(請按上圖觀看影片)

我諗我地玩咗超過二十次,兩條滑梯呈相反方向,即刻玩完一條滑梯行過對面又可以再排隊玩另一條,連職員見到我依個跟得阿媽都問我累唔累。

兩條滑梯之間仲可以踢波。

另一個令逸逸流連忘返的當然就係大象波波池了。

因為疫情的關係,真係好耐無玩過波波池了。

彈下彈下咁玩波波池又係另一種感覺

坐係大象上面幾威風。

原來好多人係波波池唔見嘢,我地係波波池都執到個兩蚊,聽到有工作人員話有人唔見咗車匙,搵到佢地腰骨痛。

依個係蛋糕主題吹氣彈床

除咗蠟燭之外……

仲有唔同的蛋糕食材例如雞蛋、牛奶……

爬咗上蛋糕的第二層,要SIR滑梯返落嚟。

依個吹氣城堡無乜影相,印象中係太空主題,最好笑係我一推逸逸前面條柱,逸逸俾條柱成個人撞跌咗,場面好滑稽。

依個係恐龍主題,好多唔同嘢玩~

都幾有趣~

仲可以打下GOLF

玩下擲圈圈

同埋騎下馬仔

農曆新年無乜做運動,依一個鐘做返晒。去到最後15分鐘,簡直好似平日上空中瑜伽咁,已經無晒力,不停望錶希望時間快啲過,努力頂埋佢﹗至於逸逸當然玩得好開心,仲話好想再嚟,好彩個活動只係至到1月31日,如果唔係下次留返恆仔陪佢做運動喇~

Comments

comments

發表迴響

你的電子郵件位址並不會被公開。 必要欄位標記為 *