二零二二年八月七日(星期日)
來到旅程的第三天，今日望出去見到藍天白雲，天氣好好呀﹗
我地CHECK OUT寄存好行李先去食早餐，LOBBY個張櫈真係好搞笑架。
今日叫咗素食早餐，野菜湯烏冬配紫薯甘栗餅，啱晒偏食逸逸的胃口，佢自己一個可以KO一份，都係嗰句，好彩我平日習慣唔食早餐。
今餐早餐仲有個小插曲，話說昨日我地一行人可以一齊坐晒係BAR枱，只係根據防疫要求在中間加了隔板；今日經理當值表示我們要分開坐，因為BAR枱屬一張枱，就算加了隔板也違返防疫條例。妹妹已向他表達了迴轉壽司餐廳全餐廳可能只得三張超長BAR枱，也是這樣的安排，但經理仍堅持其決定。
這類餐廳好明顯係屬防疫政策入面的SPECIAL CASE，有店家會主動向有關當局CLARIFY，但這酒店餐廳平日係做高級日式料理，堅持坐晒成張BAR枱的人沒幾多個，也沒理由為了不賺錢的早餐客為餐廳帶來危機。
食飽飽就搭巴士入城了，今早我地打算去西貢聖心堂參加主日彌撒。
兩表姐妹雞啄唔斷不停咁傾計
聖心堂位於西貢墟一小山坡上，外牆以紅色和藍色為主，屋頂邊緣由麻石組成，蓋上紅色瓦片，正中央有一個由石塊砌成的十字架，樸素又有教堂特色。
我們來得早，彌撒還未開始，三個小朋友在輕聲談話，突然神父走過來跟她們說：「在我們這個聖堂，如果喜歡說話，就會邀請上來祭台做輔祭，如果再喜歡說話，就要做神父。」神父本來應該是想風趣的提醒她們彌撒開始就不要說話，但卻嚇得曉曉哭了。當時逸逸和詩詩好似覺得神父好搞笑，但隔了差不多三個月，逸逸有一日突然同我講唔想再去西貢依間聖堂。
所以，大人同小朋友講嘢，特別係對唔熟悉的小朋友，一定要慎言。
久違了的在彌撒進行期間祝福小朋友
彌撒完咗見到好多小朋友搵神父簽名，到今年逸逸開始上主日學，先知道依個係成個教區的做法，用來鼓勵小朋友參與彌撒。
下一個節目係去市中心欣賞壁畫。
上網搵資料時，發現西貢有好多壁畫，仲有壁畫地圖可以跟住參觀，原來依系列壁畫係源自2021年5月香港大型街頭藝術節HKwalls的活動，當時匯聚了大約20位街頭藝術家創作壁畫。
不過因為曉曉想上廁所，於是我們一邊搵廁所一邊欣賞沿路的壁畫，只有緣看到上面幾幅。
在萬宜灣村文娛康樂中心遇上週末市集，貨品都好精緻，我地飲咗冰涼的蜜糖檸檬特飲，逸逸又無端端收到一個汽球做禮物。
對面有一棵大榕樹，我地話氣根係榕樹的鼻毛，逸逸話要摸下。
走著走著，我們來到碼頭旁邊的火山探知館。
我還是第一次進去火山探知館參觀，除了想起以前學過的地理知識之外，更加想去現場睇下充滿特色的地貌。
天氣實在太熱了，不想再走咁遠同埋周圍搵食，我們決定就在火山探知館旁邊的TURTLE CAFE吃午餐。
雖然沒有冷氣，但有一陣一陣的海風吹過來，好RELAX﹗ (不過三個小朋友唔太識欣賞)
漢堡、PIZZA、三文治，全部都係小朋友鍾意的食物，加埋靚靚特飲，睇見都開心，而且味道都唔錯。
這兒的環境加食物，簡直好似去咗外國旅行咁既FEEL，正呀﹗