二零二二年八月六日(星期六)

當係預約好酒店之後，上網搵過西貢有咩好玩，當時睇中咗個KLOOK的西貢獨木舟體驗，雖然價錢要$550一位比其他貴，但少有的可以接受年滿4歲的小朋友參加，所以大家都決定去體驗一下。點知出發前一星期睇天氣預報，星期六有80%機會下雨，到時太大雨，又或者凍親病咗就弊，於是都係決定今次暫時唔玩獨木舟住喇~

今天起床已經沒有再下雨，而且天色有點光，是好的預兆。

再睇下天氣報告，今日雖然仍然有40%機會落雨，但係起碼至1:00PM都仲係陰天有少少太陽，可以計劃一下去邊度玩。

不過點都要食咗早餐先，係酒店的WA THEATER RESTAURANT用餐。

坐係吧台加塊隔板就可以一齊食早餐喇~

日式餐廳所以供應日式早餐，三間房包六份早餐，如果要加早餐就要接近100蚊一份，而且份量好細好唔抵。妹妹一家四口點都要加一份，我地一家三口SHARE兩份就算了。

今次我們點了SET A 鹽味柚子雞配紫薯甘栗餅同埋SET B日式西京麵豉燒三文魚，樣樣都好味，特別係個紫薯甘栗餅，真係好正。逸逸其實都食好多，除左主菜之外樣樣都鍾意，所以我其實食左好少。不過都唔緊要，反正我平日返工都唔食早餐。

出發去玩之前先去買些少糧餉，無諗過附近士多原來都係景點價，所以只係買了少量餅乾同飲品，同埋買左包薯片就算了。詩詩早上太肚餓，開了一包酒店的百力滋，妹妹叫我們看看有同款就買返包補回去，士多確實看不到有售相同品牌，不過就算有恐怕價位也與酒店差不多。

難得天氣好，我地就住係白沙灣碼頭隔離，最方便就係坐船去三星灣。昨日還在擔心怎樣找船如何買船票，沒想到一行到碼頭就有船家招攬我們了。

三星灣算是隱世的西貢沙灘，因為前往三星灣的交通比較迂迴，一係好似我地咁係白沙灣碼頭坐街渡，一係就從西貢的對面海邨出發行山入三星灣，需時大約一個半小時。

我咁大個女還是第一次在香港特登坐船去沙灘玩。

我們坐藍旗船，船家話今日無乜人，走的時候打電話給他就會來接我們。明明碼頭咁多人，三星灣點會無乜人？

無諗過三星灣真係只得幾個人。沙灘唔大人又唔多，今次終於唔駛有人留守大本營，全部人一齊落水玩。

三星灣都算水清沙幼，如果加埋藍天白雲一定會更靚。

可以一齊落水玩真係好開心

我同阿妹結伴游出浮台，原來今次係阿妹第一次游出浮台，明明佢小學時已識游水，真係估佢唔到。

阿媽我得左喇﹗

累了可以上岸休息一下 (媽媽真係好怕曬)

食嘢時間

薯片係要配給的

食完嘢妹妹鼓勵曉曉挑戰游去浮台，妹妹、DAY同埋我做護法，帶埋浮板出發，挑戰成功﹗逸逸非常羨慕，問我係咪佢學識游水就可以游去浮台，梗係喇﹗

游水的時候，大家討論午餐要吃什麼，突然發現這兒原來設有小食亭，難免就好想食沙灘名物餐蛋麵，於是我們的討論就轉移到如此隱世之地究竟一碗餐蛋麵賣幾多錢，究竟賣到有幾貴我地先唔捨得食。

依個時候，不禁想起早陣子彌撒上的一篇聖經，創世紀入面亞巴郎向天主為索多瑪城內的義人求情的故事。

到了差不多吃午飯的時間，正當預備要同小朋友就上水時間討價還價之際，聽到沙灘發出廣播：雷暴警告現正生效﹗於是大家就乖乖上水了。

好凍呀﹗沖個身乾乾淨淨舒舒服服先食嘢。

我們點了七碗麵一個熱狗，食物製作需時，所以都叫住魚蛋燒賣食住先。

開餐囉﹗一家人親密D坐迫D都無問題，

店家其實一直覺得對我們感到抱歉，除了要我們坐咁迫之外，因為雞蛋唔夠要轉其他配料，餐具也是湊合而成，最重要係我們什麼也說沒問題。

其實出嚟玩太計較唔開心的只係自己。

食飽飽就聯絡船家過來接我們

雖然船家話食緊飯要我們等多一陣，不過最後都算好快就到。

回程囉﹗大家都玩到好累，依家先返酒店沖個涼休息一下，之後再決定下一個節目。

Comments

comments