二零二二年六月十八日(星期六)
雖然帳篷入面有冷氣,床亦都軟綿綿,不過因為昨晚俾蚊咬得好厲害,所以逸逸成晚都覺得好痕,瞓得唔係太好。
7點左右就起身了
今次雖然帶左蚊香,不過作用都唔太大,同四季農莊的職員傾開計,原來佢地都係會俾蚊同蠓咬,所以佢地工作時會著長衫長褲。
刷牙洗面之後就話要去跳彈床,仲認識咗朋友仔。
小朋友同逸逸一樣係讀K3,佢主動問逸逸可唔可以一齊玩,逸逸梗係好喇~
不過大家都要返去食咗早餐先。
我同逸逸的早餐係炒蛋配牛角包
當然我仲要飲咖啡喇~
恆仔話要食杯麵,露營食杯麵特別有FEEL喎~
舒舒服服嘆早餐
食完早餐,我就帶逸逸去玩,恆仔就留係大本營執野。
六個小朋友一齊玩
一齊玩石仔
佢地跑得好快,追都追唔切~
逸逸同兩個小女孩去咗小木屋玩,其中一個妹妹既爸爸扮自己做大野狼,話佢地係三隻豬小姐呀~
一齊跳彈床,超級熱鬧﹗
突然間落起雨上來,於是一齊走去大鞦韆個度避雨,避完雨又返去繼續跳彈床。
逸逸同依個妹妹做咗好朋友,可惜無機會再見。明明其他小朋友在瘋狂跳彈床,這兩個小女孩卻靜靜的邊談話邊盪鞦韆,這就是一個4歲半小女孩和一個5歲半小女孩的離愁。
今次旅程,逸逸俾蚊咬,我就俾蠓咬,兩隻腳都係,好跨張。
雖然痕到飛起,但係完全無影響逸逸對露營的印象,還是期待住下一次的露營。