二零二一年五月二十九日(星期六)
真係無諗過，曉曉已經六歲了，一切出國去過幾次旅行，竟然今次先係同佢第一次一齊去迪士尼樂園⋯⋯
我們約好了9:45am海景集合，兩架車九個人就向迪士尼樂園出發，因為要用奇妙處處通的免費泊車優惠，所以我帶住逸逸同媽媽及曉曉坐爸爸車，Day、妹妹同詩詩就跟恆仔車；媽媽曉曉逸逸全程車無停過講嘢，結果都未開始玩媽媽已經開始聲沙。
今日天氣好熱，我哋終於記得帶太陽帽了！
妹妹一家四口買咗套票，包四個迪士尼頭箍，所以進場之後先去小鎮大街的舖頭㨂好頭箍先開始玩。
城堡前合照
第一個遊戲係小飛象，逸逸一味痴住我的媽媽她的婆婆，夠違了同恆仔兩個人拍拖玩小飛象。
跟住就去隔離玩轉轉馬，一班人一齊玩特別熱鬧。
下一站係坐蜜糖杯，曉曉唔肯玩話驚喎，反而詩詩無有怕，最後Day陪咗曉曉去玩多次轉轉馬。
其實逸逸同詩詩玩蜜糖杯都有啲緊張，以前真係無諗過小朋友原來會驚。
之前經過N次石中神劍都無理，今次見暐姨姨同曉曉表姐扮拎劍，逸逸即刻過嚟一齊湊熱鬧。
跟住去玩轉轉杯，曉曉逸逸丟低爸爸媽媽系列，大個女果然係獨立啲。詩詩又無話想湊熱鬧，可能覺得除笨有精，可以獨霸爸爸媽媽仲好。
兩表姊妹Friend過打Band
跟住係小小世界，小朋友拎住頭箍扮呔盤揸船，實在太好玩，最後連續玩咗兩次。
下一站本來係去食飯，經過轉轉狗小朋友又想玩，就玩埋先食飯喇。因為最多三個人一組，為了方便照顧小朋友，最佳的組合係逸逸跟返住我和恆仔，曉曉跟住爸爸媽媽，詩詩就跟住妹同Day。可能因為小朋友已開始累，曉曉只肯跟住爸媽，逸逸卻嚷著要跟住婆婆，難搞。
這時候的逸逸是一副不情不願的表情。
我們去了大冒險家餐廳吃午飯，因為只能四人一枱，而且人很多，所以各自搵位分組食。
上星期才吃過大冒險家餐廳，今日再叫了一模一樣的食物，實在有點膩。
食完飯逸逸話想玩迷離大宅，於是一行九人一齊玩。排隊期間兩側都有一同的展品，小朋友們都看得津津有味，點知好戲在後頭，坐上架車真係開始玩就被嚇得有啲驚。
下一站係灰熊山谷，難得有人可以幫手睇住小朋友，我同妹妹恆仔三個人去咗玩灰熊山極速礦車，依個絕對係一個歡樂度高又唔辛苦的過山車。
話算上車不久竟然收到爸爸的電話，當然我沒可能接聽。爸爸成功幫我們拍下這張照片，佢話打俾我唔聽即係已經上咗車喎！
跟住返去明日世界玩大人小朋友都啱玩的飛碟
不過依個時候詩詩已經無電要休息一下
逸逸只要有得玩就可以Keep住精力旺盛
跟住我哋去玩Ironman，曉曉唔敢玩，於是由Day帶住邱氏姊妹逛商店。
玩完出嚟見到蜘蛛俠呀
因為邱氏的門票包4份小食（雪條或爆谷），我們早前儲落的印花又可以換一條雪條，最後換咗4條雪條一盒爆谷，坐咗係依家沒有營業的笑匠歡宴坊食啲嘢休息一下。
史迪仔雪條係清爽的雪芭，消暑一流！
之後我哋去咗睇米奇幻想曲
然後去咗探險世界打鼓
仲有係歷奇噴水池玩水，好興奮
點都想睇一個Show，差唔多時間就去坐定定預備睇魔海奇緣凱旋慶典。
咁多人一齊睇特別熱鬧。
三個小朋友都鍾意公主，我地去咗參觀奇妙夢想城堡故事展。入面有好多互動小遊戲，介紹同城堡有關的公主，小朋友都睇到唔捨得走。
我哋去玩今日最後一個遊樂設施，就係Space Mountain，於是大夥兒再次向明日世界進發。
影下啲可愛相
今次玩Space Mountain的，除了剛才灰熊山極速礦車三人組之外，仲加咗4歲7個月29日大的逸逸小朋友。話說因為曉曉跟現在的逸逸差唔多大的時候好有義氣咁陪阿妹玩過一次Space Mountain， 結果玩完驚到喊，所以早些時候逸逸蠢蠢欲動咁話想試我都唔積極，因為她是玻璃心女孩，驚佢從始對過山車有陰影。
今次逸逸好堅決咁話想一齊玩，於是就試吓啦，結果挑戰成功，仲話好好玩添！我諗依趟Ride我仲緊張過佢⋯⋯
另外，我好似都係第一次玩加咗Star War原素的Space Mountain，成個場面變得更加有動感。
最後係Shopping時間，阿妹都叫逸逸揀份禮物，逸逸揀咗Toy Story入面的獨角獸牛油仔呀！
離開迪士尼之後大夥兒上咗阿妹屋企食晚餐，三個小朋友繼續狂歡。