我十七個月大了！
今個月過左我的第二個農曆新年，不過今年我先知道原來過年咁開心，日日都可以黏住爸爸媽媽周圍去，又有好多小朋友同我一齊玩，周圍都見到靚靚的「花花」同「吉吉」，仲有好多「籠～」（燈籠）添！我知道乜嘢係舞獅，不過一打鑼打鼓我就驚驚了。其實過年最重要的是有「好味」的「蔔蔔糕」，我真係好鍾意食。
講開蘿蔔糕，其實近期最愛的食物是蘿蔔，紅蘿蔔白蘿蔔都咁鍾意；烏冬、魚蛋蛋、果汁汁、蛋糕糕同埋水果都唔錯架。
最近我最鍾意的玩具是聖誕歌音樂書書，入面有八首聖誕歌，我成日會自己㩒黎聽，歌入面的「Hey」、「Ho」、「Hahaha」我會一齊唱架！當中我最喜歡的就是Jingle Bells，我仲識唱「Bell Bell Bell」添！其實這書是爸爸媽媽在台灣買給我的聖誕禮物，佢哋話我農曆新年聽聖誕歌好似唔係幾合時喎，其實有咩所謂？好聽咪得囉！
另外，我仍然好鍾意玩馬馬，依家識得坐係馬馬上面前進；我會係我的小廚房洗手；我仍然最鍾意我個三個朋友仔麵麵、兔兔同埋查查，我會同佢地玩婆婆成日同我玩的「魚魚」同埋「點蟲蟲」。
我依家識得多左用短句子表達自己，想食乜玩乜又或者想其他人做乜都會講出黎；我又會回應提問，問我好唔好要唔要我係諗過先答你架；依家我除左識話俾人知我叫逸逸之外，我仲識話俾你知我幾歲添！
上個月學識左數字之後，先發現原來出街周圍都見到架，我會指住講俾爸爸媽媽知，佢地就會讚我叻叻，令出街更加充滿趣味。不過有時我明明認得個個係「8」，佢地話係「B」，明明係「6」佢哋又話係「G」，我有少少亂囉。
我今個月最大成就，就係年初三去拜年時自己由牛頭角巴士站行到去牛頭角上邨最高個座，充分展示我的腳骨力！
