我十六個月大了﹗
今個月我做表姐了﹗詩詩表妹由暐姨姨個肚出左黎，BB好細個好得意，爸爸媽媽成日提我摸BB要溫柔，我識架﹗我每次見到詩詩表妹就想同佢腳腳(大家腳碰腳)，見到詩詩表妹奶奶我又會想搵媽媽奶奶，不過一見到詩詩表妹喊我就唔知點算好喇~
我最好的朋友是麵麵(BAYMAX)、查查(查理仔)同埋兔兔，每朝起身同埋臨瞓都要搵佢地玩同埋錫錫佢地，對於其他公仔我都會錫錫表示友好，不過如果你地見到我唔好叫我錫錫你地，你地係大人黎架，我淨係錫錫我D朋友仔架咋~
我依排最鍾意就係畫公仔，用紙筆畫或者神奇畫板畫都咁開心，尋晚我仲畫左架車車添﹗另外，我都好鐘意爸爸媽媽畫太陽伯伯俾我睇，又鍾意按神奇畫板上面的英文字母，會有個姨姨講野好好聽架，最鐘意當然係A~P~P~L~E~APPLE喇，因為我識呀嘛。
除左玩玩具之外，我好鐘意著拖鞋，起初著爸爸的拖鞋，有時會著媽媽的番工鞋，成日俾爸爸媽媽話no no no，後來嫲嫲送左對HELLO KITTY拖鞋俾我，我有自己既拖鞋了。開始時著得有D論盡，但依家HANDLE得好好，可以著住拖鞋通屋走，真好。
我依家除左識叫爸爸媽媽公公婆婆同埋姨之外，今個月開始識叫爺爺嫲嫲；問我叫咩名我識答你”逸逸”；飲左婆婆煲的蓮藕湯會講”好味”；見到婆婆閃閃的衫會講”靚靚”；最近發現左爸爸媽媽個電話可以睇相，我會同佢地講”睇~逸逸”。另外，去到聖堂會幫媽媽放錢錢入奉獻袋；去到公園夠膽自己玩滑梯；出街會自己拎鞋鞋同埋外套，快D同我出街玩喇~
