我11個月大了！
今個月我去左第二次澳門，同上次相比，我唔再係爸爸媽媽的行李，而係真真正正的參加者，我有一齊睇風景，一齊游水，一齊食buffet，仲有一齊係遊樂場玩，好開心，我依家識得騎搖搖馬喇，坐係上面我會自己搖搖搖，下次我地一齊去公園玩呀！另外，我又第一次去左海洋公園，睇左好多動物，又玩左旋轉木馬、吊車、摩天輪同小火車；仲有，今個月我又第一次去沙灘玩，無論玩沙定踢浪我都好鐘意呀！
係食野方面，今個月最犀利就是係澳門食buffet，廚師叔叔特登整左個無加調味既瑤柱龍蝦生滾粥俾我食，好好味。媽媽又買過麥當勞的開心樂園餐俾我做晚餐，粟米同埋麥芝蛋包（其實係走醬走芝士走蛋白）都唔錯架。另外，今個月我試的新食物，除左之前提過的龍蝦之外，仲有青提子同埋紅提子，我依家有10隻牙仔喇，可以食既野都越來越多。
我依家行動力越來越強，除左通屋爬之外，無時無刻都想大人扶住我行，講個秘密你知，依家唔扶住野我自己都可以企到幾秒架！我一向都鐘意爬來爬去，依家我已經可以唔駛人幫手自己爬上梳化，大部分時間都記得點樣安全落番地，不過有時心急起上黎就乜都唔記得LU！
今個月我學識左Give me Five同埋握握手，如果你問我光光燈係邊我都可以指俾你睇，我又識得一邊講「無」一邊做埋手勢，仲有，今個月我除左識叫媽媽同爹爹之後，仲識指住暐姨姨叫姨姨，TUM得佢好開心呀！
